საქართველოს აგრარულ სექტორში მუშახელის დეფიციტი ბევრ ფერმერს აწუხებს.

სავარაუდოდ, მსხვილი მწარმოებლები საკმარისი რაოდენობის კადრების მოძიებას მოახერხებენ და ეს მათთვის უფრო მარტივი იქნება, ვიდრე წვრილი მეწარმეებისთვის. თუმცა, ცხადია, რომ ამ სეზონზე მუშახელის დაქირავება უფრო ძვირი იქნება.

შექმნილ ვითარებაში ფერმერები ამ პრობლემის გადაწყვეტად მოსავლის აღების მექანიზებას მიიჩნევენ. ოფიციალური სტატისტიკის მიხედვით, ბოლო 10 წლის მანძილზე საქართველოში სოფლის მოსახლეობა 8%-ით შემცირდა - ადგილობრივები ან საცხოვრებლად დიდ ქალაქებში გადადიან, ან სეზონურ სამუშაოებზე მიემგზავრებიან უცხოეთში, სადაც დასაქმება უფრო სტაბილურია, ხელფასები კი უფრო მაღალი.

2021 წელს საქართველოში სეზონური მუშების ხელფასი 2020 წელთან შედარებით 30%-ით გაიზარდა - კახეთში 30-35-დან 40-45 ლარამდე, ხოლო სამეგრელოში, სადაც თხილის კრეფის პერიოდია - 50-მდეც კი.

შექმნილ ვითარებაში სულ უფრო მეტი მწარმოებელი აქცენტს სამუშაოს მექანიზებაზე აკეთებს.

სამეგრელოს ფერმერთა კავშირის თავმჯდომარეს ოთარ შეროზიას თქმით, ორგანიზაციაში შემავალი თხილის 18 მსხვილი მწარმოებლიდან თითქმის მესამედი მოსავლის კრეფის დროს კომბაინებს იყენებს, დანარჩენები კი ამ კუთხით ინვესტირებას გეგმავენ.

„კომბაინები საქართველოში უკვე მუშაობენ და შედეგებიც კარგია. თუმცა, ამისთვის ფერმერებს ბაღების შესაბამისი მომზადება მოუწევთ. მანქანის გამართული მუშაობისთვის მიწა სწორი უნდა იყოს და ეს დროს მოითხოვს. ასე რომ, არ უნდა გვქონდეს იმის მოლოდინი, რომ საკმარისია კომბაინი იყიდო და ყველაფერი თავისთავად მოგვარდება“, - მიიჩნევს შეროზია.

თხილის მწარმოებლების გარდა, საქართველოში ლურჯი მოცვის უმსხვილესი კომპანია GeorgianBlue მომავალ სეზონში კომბაინის დატესტვას გეგმავს.

კომპანიის გენერალურმა დირექტორმა რატი მორჩილაძემ განაცხადა, რომ ამ წლის სეზონმა ნათლად დაადასტურა, რომ მუშახელის დეფიციტი გარდაუვალია და ეს მომავალში მხოლოდ გაიზრდება. კომპანია წარმოების ზრდას გეგმავს და შესაბამისად, ახლო მომავალში საჭირო რაოდენობის სეზონური მუშების მოძიება შეუძლებელი გახდება, რადგანაც საუბარია ასობით ადამიანზე.

„მომავალი წლიდან ჩვენ კომბაინს მოვსინჯავთ და იმედი გვაქვს, რომ მოსავლის მექანიზებული კრეფა პროდუქტის ხარისხზე ნეგატიურად არ აისახება. დასაწყისისთვის ჩვენ აუცილებლად უნდა შევამოწმოთ ტექნიკა კენკრის უკვე არსებულ სახეობებთან როგორ მუშაობს“,  - ამბობს ის.

მოსავლის მექანიზირებული კრეფა ზოგადად ფერმების მექანიზების მხოლოდ ერთი, მაგრამ არა ერთადერთი კომპონენტია. ბევრმა მსხვილმა მწარმოებელმა საქართველოში მუშახელის რაოდენობის შემცირების მიზნით სხვადასხვა ოპერაციების მექანიზება უკვე განახორციელა - მაგალითად, მორწყვა, სასუქით მიწის დამუშავება და ტოტების მოჭრის პროცესი ბევრ ფერმაში უკვე მექანიზებულია, თუმცა, მოსავლის აღება დღემდე ძირითადად ხელით ხდება.