ახალქალაქის რაიონის სოფელ ალასტანში გლეხებს და ფერმერებს თითქმის 700 ტონა კარტოფილი ულპებათ. ადგილობრივი მოსახლეობა აცხადებს, რომ მთავრობის მხრიდან სასწრაფო დახმარებას ელის, წინააღმდეგ შემთხვევაში მზადაა მოსავალი გადაყაროს.
მათი თქმით, კარტოფილის რეალიზებას მასშტაბური იმპორტი ართულებს.
„ამ წელს მოსახლეობას მოსავლის გადაყრა მოუწევს, რადგანაც არც ერთი მყიდველი ჩვენთან ჯერ არ მოსულა. მთავრობა სულ ლაპარაკობს სოფლის მეურნეობის განვითარებაზე, მაგრამ ასე როგორც უნდა განვითარდეს რამე? კარტოფილის იმედი გვქონდა, მაგრამ ვერაფერს ვერ ვყიდით. არც იმდენი ფული გვაქვს, რომ დარჩენილი კარტოფილი გადმოვტვირთოთ და გადავყაროთ. არც ის ვიცით, ქალაქში რომ წავიღოთ გაიყიდება თუ არა - სავსეა ყველა ბაზარი და მაღაზია კარტოფილით. ჩვენ გვინდა, რომ სახელმწიფომ თურქეთიდან იმპორტი შეზღუდოს, მაშინ შეიძლება რამე გვეშველოს“ - ამბობს სოფელ ალასტანი მკვიდრი ნორაირ მარგარიანი.
ადგილობრივები დარწმუნებულები არიან, რომ ჯავახეთს ქართულ ბაზარზე კარტოფილზე მოთხოვნის დაკმაყოფილება ყოველგვარი იმპორტის გარეშეც შეუძლია.
„ყველა ოჯახში 20 ტონაზე მეტი კარტოფილია დაგროვებული. გვთავაზობენ 1 კილოში 50-60 თეთრს, მაგრამ ჩვენ ეს არ გვყოფნის - ეს ფასი ხარჯებსაც კი ვერ ფარავს. შექმნილი ვითარებიდან ერთადერთი გამოსავალია - იმპორტის თუნდაც დროებით შეჩერება“ - თვლის ადგილობრივი გლეხი არმენ ადალიანი.
2020 წელს ჯავახეთში კარტოფილს რეკორდული რაოდენობა დაითესა - მოსახლეობა უცხოეთში სამუშაოდ ვერ წავიდა, ამიტომაც მთელს იმედებს სწორედ კარტოფილზე ამყარებდა.
„ალასტანში 175 ოჯახია, მათ შორის 160 კარტოფილზე მუშაობს. ჩაკეტილი საზღვრების გამო უცხოეთში სამუშაოდ ვერ წავიდნენ, ამიტომაც თუ 2020-ში კარტოფილი 200 ჰექტარზე დაირგო, ამ წელს - 350-ზე. სახელმწიფო უნდა დაგვეხმაროს. კარტოფილი უცხოეთიდან არ უნდა შემოვიდეს, მაშინ ადგილობრივი აუცილებლად გაიყიდება“ - თვლის ახალქალაქის მერიის წარმომადგენელი არტურ ირიციანი.
ახალქალაქის საკრებულოს წევრის სიმონ მანანიანის თქმით. მოსახლეობისთვის დახმარების გაწევის ერთ-ერთი საშუალებაა ადგილობრივი კარტოფილის შესყიდვა სახელმწიფო სტრუქტურების მიერ.
„ჩვენ ჯარი, პოლიცია გვყავს, გვაქვს საავადმყოფოები, სკოლები, და საბავშვო ბაღები . ისინი მაინც რატომ არ ყიდულობენ ადგილობრივ კარტოფილს? ახალქალაქის საკრებულოს უფროსმა ნაირი ირიციანმა „ქართულ ოცნებას“ ამ საკითხზე უკვე მიმართა, მაგრამ ვერანაირი პასუხი ვერ მიიღო. მოსახლეობა კარტოფილის ქალაქის მერიასთან დაყრას აპირებს, სხვა გზა არ არსებობს. სოფელში 700 ტონა კარტოფილი ფუჭდება, და მოსახლეობა მას ნაგავივით ყრის“ - თვლის ადგილობრივი დეპუტატი.
ახალქალაქის მერის იურიკ უნანიანის თქმით, ეს ვითარება არა მხოლოდ კონკრეტულად ალასტანს, არამედ მუნიციპალიტეტის ყველა სოფელს აწუხებს.
„ეს საერთო პრობლემაა, და მთავრობა საქმის კურსშია. ბიზნესმენებმა ჩამოსვლა დაიწყეს და კარტოფილს ყიდულობენ, თუმცა მაინც ბევრი რჩება - მოსავალი ამ წელს ძალიან კარგი იყო. მაგრამ ძალით ხომ ვერ გავყიდით? პრობლემა არსებობს, და ჩვენ მთავრობას ამის შესახებ შევატყობინეთ - გვითხრეს, რომ კარტოფილის რეალიზების კუთხით შესაბამისი ზომებს მიიღებენ. რა, როგორ, და როდის - არ ვიცით“- ამბობს უნანიანი.