პანდემიამ სხვა ბიზნესებთან ერთად მნიშვნელოვანი გავლენა ავეჯის მაღაზიებზეც იქონია, თუმცა სექტორის წარმომადგენლები „კომერსანტთან“ აღნიშნავენ, რომ მაღალ საფასო სეგმენტზე არსებულმა ვითარებამ უფრო ნაკლები გავლენა მოახდინა. ქართულ ბაზარზე წარმოდგენილი ავეჯის სახლები პანდემიის და ლარის გაუფასურების გამო იმპორტირებული პროდუქციის გაძვირებაზე აკეთებენ აქცენტს და ამბობენ, რომ ფასების გაძვირების მიზეზებს შორის მომატებული ლოგისტიკური ხარჯებიც არის.

ავეჯის მაღაზიების „ლაბორატორია ჩემი სახლის“, „კარეს“ და „მობლერის“ მმართველი მენეჯერი გურამ მგელაძე „კომერსანტთან“ ამბობს, რომ მოთხოვნა განსაკუთრებით შემცირებულია დაბალ საფასო სეგმენტში, მაგალითად „მობლერში“ წარმოდგენილ პროდუქციაზე, ვიდრე მაღალ საფასო სეგმენტში, სადაც ძვირადღირებული ავეჯის გაყიდვები მხოლოდ 10%-ით არის შეცვლილი.

„ჩვენს სეგმენტში ძალიან ცუდი სიტუაციაა, მეორე ლოქდაუნის შემდეგ ნორმალურად დაიწყო გაყიდვები, თებერვალ-მარტში როგორც ჩანს დაგროვილი საყიდლები ჰქონდათ მომხმარებლებს და ასე თუ ისე გაყიდვები იყო, მაგრამ აპრილში არასახარბიელო მდგომარეობაა. გარდა ამისა, ლარის კურსის კუთხით მნიშვნელოვანი ძვრებია და ალბათ მომხმარებლებს ცუდი მოლოდინი გაუჩნდა, როგორც ჩანს უმრავლესობა თანხებს იზოგავს და გაყიდვებიც შემცირებულია.

მოთხოვნა დაბალ საფასო სეგმენტში ძალიან შემცირდა, რა თქმა უნდა კლება არის მაღალ საფასო სეგმენტშიც, მაგრამ ისეთი არა, აქ დაახლოებით 10-15%-ია, ხოლო შედარებით დაბალ ფასიანი სეგმენტის შემთხვევაში 30%-იანი კლება გვაქვს“, - აღნიშნავს გურამ მგელაძე.

გურამ მგელაძე გვიყვება, რომ ლარის გაუფასურების და ხარჯების ზრდის გამო ფასები 10%-დან 30%-მდე გაიზარდა როგორც ძველ ასევე ახალ კოლექციაზე.

„ლარის გაუფასურების გამო ფასები გაიზარდა როგორც ძველ კოლექციაზე 10%-დან-20%-მდე ასევე უფრო მეტად ახალზე, დაახლოებით საუბარია 30%-ით გაძვირებაზე, აქ გარდა იმისა რომ ლარის კურსი მოქმედებს, ლოჯისტიკური ხარჯებიც არის გაზრდილი და ესეც ახდენს გავლენას. გაზრდილი ფასები უფრო მეტად ამცირებს მომხმარებელთა რაოდენობას, მაგრამ სხვა გზა არც ჩვენ გვაქვს, თუ არ გავყიდეთ შესაბამის ფასად, შემდეგ ახალი პროდუქციის ყიდვას და ვალდებულებების დაფარვას ვერ შევძლებთ, ასეთ შემთხვევაში კი საერთოდ დაკეტვა მოგვიწევდა.

მესამე ლოქდაუნი ჩვენი სექტორისთვის და ზოგადად მთელი რითეილისთვის დახვრეტის ტოლფასი იქნება. მხოლოდ ონლაინ გაყიდვების იმედად მოგვიწევს დარჩენა, რასაც არც თუ ისე კარგი შედეგები ჰქონდა. თუმცა აქვე, მნიშვნლობა აქვს პერიოდს და რაოდენობას, რამდენი ხნით დავიკეტებით, თუ ეს ერთი კვირა გაგრძელდა როგორმე გადავაგორებთ, მაგრამ უფრო დიდი ხნით ჩაკეტვა უკვე ძალიან რთულ სიტუაციას მოგვიტანს. ზაფხული შედარებით აქტიურია, შარშანდელ ზაფხულშიც კი გაყიდვების ძალიან დიდი ზრდა დაფიქსირდა, მაგრამ წელს ეს მოლოდინი არ გვაქვს, ყველას შემოსავალი შეუმცირდა, ხარჯები კი გაეზარდათ.

სიახლეებსაც ვგეგმავდით, შარშან მოლოდინები უფრო ოპტიმისტური გვქონდა, მაგრამ ახლა ბევრად პესიმისტურად ვართ განწყობილი, რადგან სიტუაციის გაუმჯობესების პერსპექტივა არ ჩანს, ამას ლარის გაუფასურებაც ემატება და მინიმუმ მომავალ წლამდე ახალი ბრენდების და მაღაზიების დამატებას აღარ ვაპირებთ“, - აცხადებს გურამ მგელაძე.

„ვერონას“ ერთ-ერთი დამფუძნებელი არჩილ მგალობლიშვილი „კომერსანტთან“ამბობს, რომ კომპანია ძირითადად ძვირადღირებულ პროდუქციაზე არის ორიენტირებული და პანდემიის პერიოდში მაღალ საფასო სეგმენტში კლება ძალიან მცირე იყო, უფრო მეტიც, ამ პერიოდში ახალი მაღალფასიანი ავეჯის ბრენდების შემოტანა დაიწყეს.

„პროდუქცია გაძვირდა, იტალიაში მწარმოებლებმა გაგვიძვირეს, მაგრამ ეს ჯერჯერობით არ ასახულა ადგილობრივ ბაზარზე. მიხედავად კურსის გაუფასურებისა, ვცდილობთ ფასები შევინარჩუნოთ. გარდა ამისა, შოურუმში ახალი ძვირადღირებული ბრენდები დავიმატეთ, მაგალითად როგორიცაა Tonin Casa, Tomasella, Santa Lucia, Pinton და სხვა.

ჩვენი პლიუსი ის არის, რომ ძირითადად ის მომხმარებლები მოდიან, რომლებსაც უკვე აქვთ ეს ავეჯი, არიან ძვირადღირებული პროდუქციის მომხმარებლები და კომფორტის მოყვარულები. რაც შეეხება კლებას, რა თქმა უნდა გვაქვს, თუმცა არც ისეთი მაღალი, ვცდილობთ იგივე ფასით და მაღალი ხარისხით პანდემია ნაკლებად აისახოს გაყიდვებზე.

მესამე ლოქდაუნზე საუბარი მიმდინარეობს, თუმცა ონლაინ გაყიდვების კუთხითაც გამოცდილება გვაქვს და ეს არც ისე გვაშინებს. მომხმარებლები სახლებში რომ აღმოჩდნენ, დაიწყეს კომფორტის მოწყობა. გარდა ამისა, პანდემიის დროს მოგზაურობის ფუფუნება აღარ არის, ამიტომ ვფიქრობ რომ მომხმარებლებმა ამ თანხების ავეჯის შესაძენად დახარჯვა დაიწყეს, რათა კომფორტული გარემო მოიწყონ. ზაფხული მოდის და გარე ავეჯის მიმართულებითაც ახალი ბრენდები შემოგვყავს და სიახლეებს ვგეგმავთ“, - ამბობს არჩილ მგალობლიშვილი.