„ძირითადად ჯარის, პოლიციის, მასწავლებლების და სასწრაფო სამედიცინო პერსონალის ხელფასების ზრდა ხდება“, – ასე უპასუხა საქართველოს ფინანსთა მინისტრმა, ლაშა ხუციშვილმა ოპოზიციონერ დეპუტატს ალეკო ელისაშვილს საქართველოს პარლამენტში 2022 წლის ბიუჯეტის პროექტის საბოლოო ვერსიის განხილვისას.

როგორც მან აღნიშნა, 2013-2014 წლებში, საჯარო სექტორში საშუალო ხელფასი კერძო სექტორში არსებული საშუალო ხელფასის 90%-ზე მეტი იყო. ხუციშვილის თქმით, 2014 წლის შემდგომ, კერძო სექტორში საშუალო ხელფასის ზრდამ მნიშვნელოვნად გაუსწრო საჯარო სექტორში ხელფასების ზრდას, შედეგად, 2020 წლის მდგომარეობით, საჯარო სექტორში საშუალო ხელფასი კერძო სექტორის 80%-ზე დაბალია.

„თუ მიმდინარე წლის პირველ ნახევარში, საშუალო ხელფასის ზრდის დინამიკას გავაანალიზებთ, მოსალოდნელია, რომ 2021 წლის ბოლოს, საჯარო სექტორში საშუალო ხელფასი კერძო სექტორში არსებულის 75 პროცენტზე დაბალ ნიშნულზე ჩამოვიდეს. აღსანიშნავია, რომ 2019-2020 წლებში, ძირითადად, გაიზარდა ჯარის, პოლიციისა და მასწავლებელთა ხელფასები, ხოლო სხვა საჯარო დაწესებულებებში ზრდა თითქმის არ ყოფილა. თუ ჯარის, პოლიციისა და მასწავლებლების ხელფასების ზრდის ეფექტს გამოვაკლებთ, 2020 წელს საჯარო სექტორში საშუალო ხელფასი კერძო სექტორის 71%-ია“, — განმარტა ხუციშვილმა. 

„ადრე „ქართული ოცნება“ ბიუჯეტის განხილვის დროს ახსენებდა ხოლმე ტერმინს „ქამრების შემოჭერა“, ახლა ეს აღარც ისმის, ლექსიკაშიც აღარ არის. ამ ბიუჯეტში თქვენ სად ხედავთ „შემოჭერილ ქამრებს“... ამ ქვეყანაში ხალხს ისეთი შემოჭერილი აქვს ქამრები, წელში წყდება და ბიუროკრატიას, მთავრობას „ქამრების შემოჭერის“ არაფერი ეტყობა“, - მიმართა ალეკო ელისაშვილმა ფინანსთა მინისტრს.

აღსანიშნავია, რომ “საჯარო დაწესებულებაში შრომის ანაზღაურების შესახებ“ საქართველოს კანონის შესაბამისად სახელმწიფო ბიუჯეტით ყოველწლიურად განისაზღვრება საბაზო თანამდებობრივი სარგო, რაზეც მრავლდება თითოეული საბიუჯეტო ორგანიზაციის საშტატო განრიგით განსაზღვრული კოეფიციენტი და შესაბამისად განისაზღვრება საჯარო მოხელის ყოველთვიური ანაზღაურება. აღსანიშნავია, რომ საბაზო თანამდებობრივი სარგო 2017 წელს განისაზღვრა 1000 ლარის ოდენობით და მას შემდეგ არ შეცვლილა. წარმოდგენილია ბიუჯეტის პროექტის გადამუშავებული ვარიანტის მიხედვით იზრდება საბაზო თანამდებობრივი სარგო და 1000 ლარის ნაცვლად განსაზღვრულია 1100 ლარის ოდენობით.