„ძალიან ვწუხვარ, რომ მსოფლიოში საუკეთესო სამსახურს ვტოვებ!“ — ამ სიტყვებით მიმართა ბორის ჯონსონმა მოსახლეობას. მან ბრიტანეთის პრემიერ-მინისტრის თანამდებობიდან გადადგომის შესახებ განცხადება რამდენიმე წუთის გააკეთა.
„ნათელია, პარლამენტის „კონსერვატიული პარტიის“ სურვილია, რომ ამ პარტიას უნდა ჰყავდეს ახალი ლიდერი და შესაბამისად, ახალი პრემიერ-მინისტრიც. ვეთანხმები, რომ ამ ახალი ლიდერის არჩევის პროცესი უნდა დაიწყოს ახლა, ვადები მომავალ კვირაში გამოცხადდება“, – აღნიშნა ბორის ჯონსონმა.
„კონსერვატორების ლიდერის“ პოსტსა და პრემიერის თანამდებობაზე ჯონსონი დარჩება ახალი ლიდერის არჩევამდე.
მანამდე მთავრობის წევრებმა პროტესტის ნიშნად უარი განაცხადეს ჯონსონის მთავრობაში მუშაობაზე. ჯონსონთან თანამშრომლობის შეწყვეტის შესახებ გამოაცხადა ფაქტობრივად მთელმა კაბინეტმა: თანამდებობიდან გადადგა კაბინეტის 50-ზე მეტი წევრი.
დღეს თანამდებობა დატოვა განათლების მინისტრმა, მიშელ დოულანმა, რომელიც ამ პოსტზე ორი დღის წინ დაინიშნა. დღესვე, 7 ივლისს, დილით, პრემიერ-მინისტრს გადადგომისკენ მოუწოდა ფინანსთა მინისტრმა ნადიმ ზაჰავიმ, რომელიც ჯონსონმა თანამდებობაზე 5 ივლისს დანიშნა.
პროტესტი კი უკავშირდება სექსუალურ სკანდალს, რომლის გამოც ბორის ჯონსონმა ბოდიში მოიხადა.
საქმე ეხება „კონსერვატორების“ პარტიის საპარლამენტო მდივნის მოადგილე კრის პინჩერს, რომელსაც სექსუალურ შევიწროებაში სდებენ ბრალს. პინჩერმა ბოდიში მოიხადა და თანამდებობა 30 ივნისს დატოვა, თუმცა, როგორც მედია წერს, აღმოჩნდა, რომ პინჩერის წინააღმდეგ საჩივარი 3 წლით ადრეც არსებობდა, რომლის შესახებაც ბორის ჯინსონი საქმის კურსში იყო და ამის მიუხედავად, ის მაღალ თანამდებობაზე დანიშნა. ბორის ჯონსონის განცხადებით, ბოდიშს იხდის იმის გამო, რომ კრის პინჩერი მის მთავრობაში მუშაობდა.
ჯონსონი გაერთიანებული სამეფოს 77-ე პრემიერ-მინისტრი იყო 2019 წლის 24 ივლისიდან. იმავე პერიოდში „კონსერვატიული პარტიის“. პრემიერობამდე ჯონსონი ბრიტანეთის საგარეო საქმეთა მინისტრიც იყო, მანამდე 8 წლის განმავლობაში ლონდონის მერი იყო.