„მიმდინარე წელი ყველა შემთხვევაში რეგრესულად დამთავრდება, 2021 წელს ეკონომიკა გამოცოცხლდება, ხოლო 2022 წელს გვექნება საკმაოდ მაღალი ეკონომიკური ზრდა თუ ჩვენ კერძო საკუთრების ფორმულირებას მოვახდენთ ძალიან სწრაფად დროსა და სივრცეში“, - ამის შესახებ „კომერსანტს“ „ეკონომიკური ტრანსფორმაციის ცენტრის პრეზიდენტმა“ რამაზ გერლიანმა განუცხადა. მისი თქმით მაშინ როდესაც ქვეყანას პრაქტიკულად ეკონომიკური სტაგნაცია აქვს, როგორც არასდროს ისე სჭირდება სწორი ეკონომიკური პოლიტიკის გატარება. ეკონომისტი აცხადებს, რომ მხოლოდ ამ შემთხვევაში ექნება საქართველოს შანსი ჰქონდეს ორნიშნა ეკონომიკური ზრდა, სხვა შემთხვევაში მისი განმარტებით, არა თუ ორნიშნა შესაძლებელია დადებითი ეკონომიკური ზრდა საერთოდ არა ჰქონდეს.

„ხშირად საუბრობენ, თუ რომ არის სწორი ეკონომიკური პოლიტიკა? სწორი ეკონომიკური პოლიტიკა გულისხმობს, იმას რომ საბაზრო ეკონომიკის მთავარ მამოძრავებელ პრინციპებს ხელი შეუწყო, ნებისმიერი ამ ტიპის პოლიტიკა იქნება სწორი. ეს სისწორე დგას ორ მთავარ პრინციპზე ერთი არის ეფექტიანობა და მეორე სამართლიანობა. ნამდვილად არ არის ეფექტური, როდესაც სასოფლო ან არასასოფლო მიწა გამოუყენებელია და ის საზოგადოებრივ კეთილდღეობას ვერ ქმნის. იქნება ეს შენობა, ურბანული მიწა, წიაღისეული თუ სახელმწიფო საწარმოები რომელიც ხორცმეტივით არის ბიუჯეტში ჩამოკიდებული“, - განმარტავს რამაზ გერლიანი.

რამაზ გერლიანის თქმით საქართველოსთვის სტაგნაციის ვარდნის სიმძიმე არ იქნება ისეთი რთული, როგორიც განვითარებულ ქვეყნებში, მაგრამ არასწორი პოლიტიკით სტაგნაციის პროცესი უსასრულოდ გაგრძელდება, რაც ქვეყანას დიდ პრობლემებს შეუქმნის.როგორც გერლიანი აცხადებს, მძლავრი ეკონომიკით საქართველო არც აქამდეც  გამოირჩეოდა და თუ კერძო საკუთრების ფორმირების პოლიტიკა ახლა მაინც არ გატარდა, შანსი ხელიდან იქნება გაშვებული და სტაგნაციიდან გამოსვლის პერიოდი შეიძლება 5- 6 წელი გაგრძელდეს.

„ეკონომიკა მცირდება, შესაბამისად, მცირდება სახაზინო შემოსავლები, როგორც არასდროს ისე გჭირდება რეფორმის ჩატარება, ვინაიდან, ეს ერთის მხრივ მოგვცემს კერძო საკუთრების სრულად ფორმირებას, მეორეს მხრივ, მოგვცემს სწორ საბაზრო ნიშნულს, როგორიც არის საყოველთაო თანაბარი კონკურენცია. საბოლოო ჯამში, ამას მივყავართ ეკონომიკურ თავისუფლებამდე, ეკონომიკური თავისუფლება კი ნაკლებ საბაზრო წნეხი ნიშნავს. იაფ ფულზე ხელმისაწვდომობა, ბუნებრივად უნდა იყოს შესაძლებელი, ხოლო ბუნებრივად შესაძლებელია მაშინ, როდესაც საფონდო ბაზარი ყალიბდება. ჩვენთან დღეს საფონდო ბაზარი არ არის. მეორე საკითხია ასე ვთქვათ საგადასახადო  ტვირთი, ორი ძირითადი ხარჯი აქვს ეკონომიკას, ბიზნეს სუბიექტებს, ფიზიკურ პირებს,  ვინც ეკონომიკის მიმართულებით მოქმედებს, ეს არის ერთი საგადასახადო ტვირთი  და მეორე -საკრედიტო ტვირთი. საგადასახადო ტვირთი დიდი არ არის ჩვენთან, მაგრამ საკმაოდ დიდი არის ჯამში თუ ავიღებთ ტვირთს კრედიტთან ერთად, რადგან კრედიტის პროცენტი ჩვენთან საკმაოდ მაღალია. სწორედ ამ ფონზე ძალიან მნიშვნელოვანი არის უპირობოდ და უსასყიდლოდ განხორციელდეს კერძო საკუთრების ფორმირება“, - აცხადებს რამაზ გერლიანი.

„ეკონომიკური ტრანსფორმაციის ცენტრის პრეზიდენტი“ რამაზ გერლიანი აცხადებს, რომ თუ საფონდო ბაზარს განვავითარებთ და კერძო საკუთრების დროულად ფორმირებას განხორციელებთ, ქვეყანას ეძლევა შანსი ინვესტიციების დიდი წილი მიიზიდოს.

„მსოფლიოს ქვეყნებში აუცილებლად აღდგება საფონდო ბაზრები, რომელიც დღეს სტაგნაციას განიცდის, იმ მომენტისთვის ჩვენ რეფორმა უკვე უნდა გვქონდეს ჩატარებული. პრივატიზების პროცესი ძალიან სწრაფად უნდა განვახორციელოთ, რომლის შედეგადაც, კრიზისი ჩვენთვის იქნება პროგრესის მომტანი და არა რეგრესის. ჩვენი ეკონომიკა გააკეთებს ძალიან დიდ ეკონომიკურ ნახტომს. მსოფლიო ეკონომიკურ წესრიგში ხდება გადაწყობა და ეს აშკარად გაცხადებული პოლიტიკაა, რადგან კორონავირუსმა როგორც კი წარმოშვა ეკონომიკური პრობლემები, გაცხადდა, რომ რიგ რეგიონებს მსხვილი ინვესტიციები დატოვებს. შესაბამისად, ჩვენ ვართ ერთ-ერთი არეალი, სხვა თანაბარ პირობებში, თანაბარი შანსების მქონე, მაგრამ გეოგრაფიული არეალით და ჩვენი ზოგადი მისწრაფებებით ეს შანსები არის გაზრდილი და თუ ჩვენ გავატარებთ სწორ ეკონომიკურ პოლიტიკას, ამ შემთხვევაში რასაკვირველია დიდი წილი ინვესტიციებისა, ეკონომიკური სიმძლავრეებისა სწორედ რომ ჩვენთან წამოვა“, - განაცხადა რამაზ გერლიანმა.

ბაჩო ადამია