რადიო კომერსანტის ეთერში აუდიტორული და ბიზნეს საკონსულტაციო კომპანიის Grant Thornton- ის მმართველმა პარტნიორმა ვახტანგ ცაბაძემ 2020 წელი შეაჯამა და სამომავლო გეგმებზე ისაუბრა.
რა თქმა უნდა კორონავირუსმა ეკონომიკური ზრდის შესაძლებლობაზე, ბიზნესებზე, ყოველდღიურობაზე, საქმიანობის სტილზე და ბიზნესის ორგანიზების პროცესებზე დიდი გავლენა მოახდინა, თუმცა შემიძლია ვთქვა,რომ ჩვენ საკმაოდ სწრაფად მოვახერხეთ დისტანციურ რეჟიმზე გადაწყობა და ეს შევძელით ისე, რომ არც ერთ ჩვენ კლიენტს ჩვენი მხრიდან შეფერხება ან ჩავარდნა არ ჰქონია.
ფინანსურ მაჩვენებლებს თუ შევხედავთ, როგორც ადგილობრივად ასევე გლობალურად ზრდა გვქონდა, ბოლომდე წელი შეჯამებული არ გვაქვს, თუმცა ზრდა ნამდვილად გვაქვს. რაც ყველაზე მთავარია, ჩვენ მოვახერხეთ ჩვენი სახელფასო ხარჯების გაზრდა.
წელს ჩვენი ხელფასები უფრო მეტი იყო ვიდრე შარშან. ვფიქრობ, რომ ეს არის წარმატების ყველაზე კარგი ინდიკატორი - აღნიშნა ვახტანგ ცაბაძემ.
რაც შეეხება 2021 წლის სამომავლო გეგმებს, ვახტანგ ცაბაძე აღნიშნავს, რომ Grant Thornton- ის კოლეგებიც და კონკურენტებიც მომავალი წლიდან სხვანაირად გააგრძელებენ მუშაობას.
ჩვენ აუდიტორები და კონკრეტულად Grant Thornton-ი მომავალ წელს აუცილებლად ვიმუშავებთ სვხანაირად.
ჩვენ ამისთვის ტექნოლოგიურად მზად ვართ, 2020 წელს ყველაზე დიდი ინვესტიციები ტექნოლოგიებში ჩავდეთ , რაც დაგვეხმარება იმაში, რომ მომავალში ჩვენი სერვისი კლიენტებს უფრო კომფორტულად მივაწოდოთ.
კორონავირუსის ფონზე, ფინანსურ გეგმებზე საუბარი ცოტა რთულია, თუმცა ვიმედოვნებთ, რომ გაზაფხულიდან რაღაცეების დალაგება დაიწყება. - აღნიშნა ვახტანგ ცაბაძემ
კითხვაზე თუ რომელ სექტორზე აისახა კორონავირუსის გავლენა ყველაზე მწვავედ. ვახტანგ ცაბაძე პასუხობს, რომ პანდემია ყველაზე მწვავედ სარესტორნო ბიზნესებს და საცალო ვაჭრობის სექტორს შეეხო. ხოლო სხვა სექტორებში ჯერჯერობით ისეთი კრიტიკული გავლენა არ ყოფილა.
"ვფიქრობ რომ რთული სიტუაცია გაზაფხულის ბოლომდე გაგრძელდება, აქამდე კომპანიები ინერციით და არსებული რესურსებით აგრძელებდნენ მუშაობას.
ძალიან კარგია, რომ ვაქცინა სწორედ ახლა გამოჩნდა და მგონია, რომ ეს დაგვეხმარება იმაში, რომ რაღაც სექტორები ბოლომდე არ ჩამოიშალოს,". - ვახტანგ ცაბაძე
ვახტანგ ცაბაძის განმარტებით, იმ შემთხვევაში, თუ ვაქცინა იმუშავებს ეკონომიკა 2021 წლის ბოლოსთვის შეძლებს რომ 2019 წლის ნიშნულს დაუბრუნდეს.
არის სექტორები, მაგალითად ავიაგადაზიდვები, რომელთაც ძალიან დიდი ხანი დასჭირდებათ იმისათვის, რომ ძველ ნიშნულს დაუბრუნდენ. ყველაფერი სექტორებზეა დამოკიდებული, თუმცა მე მაინც ოპტიმისტურად ვარ განწყობილი - ვახტანგ ცაბაძე.
თაკო კვაჭანტირაძე