„ყველა მთავრობის და მათ შორის ახალის მიმართ ჩემი თხოვნაა გვამუშავოს, ხელი არ შეგვიშალოს, ათი წელია სამკერვალო მუშაობდა და ხელოვნურად, ეკონომიკის სამინისტრომ გამაჩერა. არცერთი მთავრობის იმედი არ გვექნება, თუმცა ჩვენ მზად ვართ, დავუდგეთ ნებისმიერ მათგანს გვერდით, თუ მუშაობას არ აგვიკრძალავენ“, - ამის შესახებ ბიზნესმენმა ლაურა ღაჭავამ „კომერსანტთან“ მომავალი მთავრობის, პანდემიის და ბიზნესგარემოს შეფასებისას ისაუბრა.

ბიზნესმენის განმარტებით, 300 თანამშრომელი უმუშევარი დარჩა და სახელმწიფო არც ახალი ბიზნესის დაწყების უფლებას აძლევს. მისივე თქმით, პანდემიის დროს ბიზნესმენმა ახალი საქმიანობის წამოწყება სცადა პირბადეებისა და სადეზინფექციო საშუალებების მიმართულებით, რაშიც მათავრობამ ხელი შეუშალა. 

„წარმოება გაჩერებულია, წარმოიდგინეთ 500 დანადგარი მაქვს გაჩერებული და ხალხი კი უმუშევარი დარჩა. მზად ვართ დღე და ღამე ვიმუშაოთ, დავაბრუნო 300 თანამშრომელი, რომელიც ახლა სახლებში სხედან. დიდი თხოვნა გვაქვს, რომ მუშაობის უფლება მოგვცენ. ვითხოვთ ხელშეწყობას, რათა უკან დავაბრუნოთ ჩვენი თანამშრომლები. ძალიან დიდი ბრუნვა გვქონდა. ევროპიდან მოგვდიოდა შეკვეთები, ყოველ ათ დღეში 5000 ქურთუკს ვაგზავნიდით. წარმოიდგინეთ, რამხელა ბრუნვა გვექნებოდა და ახლა ყველაფერი გაჩერებული გვაქვს.

პანდემიის დროს, სხვა გეგმაც მქონდა, შევიძინე სამედიცინო დანადგარი, პირბადეებისთვის, ჩამოვიტანე ჰონგ-კონგიდან და საქართველოს ბაზარზე ვერ შემოდის. ამ ნაწილშიც შემიშალა ხელი მთავრობამ, ყველანაირად შეზღუდულები ვართ, უფლება არ გვაქვს, რომ თბილისის ბაზარზე შევიდეთ. რაღაც პროგრამებია და არ ვიცით, ვერ მოვხვდით იმ პროგრამაში. ასე შერჩევით არ შეიძლება ამუშაო კომპანიები, თბილისში პირბადეები შეაქვს მხოლოდ ვინმე გალუსიანს და საკანელიძეს, ჯანდაცვის სამინისტროს და თვითონ ტიკარაძეს აქვს ასე მოწყობილი. იმედი მაქვს მონოპოლიები მალე დასრულდება“, - ამბობს ლაურა ღაჭავა.

მიუხედავად არსებული მძიმე მდგომარეობისა ლაურა ღაჭავა მიიჩნევს, რომ ასეთ რთულ ვითარებაში მყოფ ქვეყანას ბიზნესმენები გვერდით უნდა დაუდგნენ და გადასახადების შემცირების ნაცვლად, ბიუჯეტში მეტი შეანატანი უნდა გააკეთონ.

„ახლა ქვეყანას ისე უჭირს, რომ ბიზნესს არ გვაქვს უფლება გადასახადების შემცირება მოვითხოვოთ, პირიქით, გადასახადების თვალსაზრისით, მეტი უნდა შევიტანოთ და ხელი შევუწყოთ, რომ პენსიონერებსა და სოციალურად დაუცველ ხალხს დაეხმარონ, ერთმანეთს გვერდში უნდა დავუდგეთ“,- აცხადებს ღაჭავა.

მიმდინარე წლის თებერვალში „ბანკმა ქართუმ“ ბიზნესმენ ლაურა ღაჭავას უძრავი ქონება ჩამოართვა. როგორც „კომერსანტს“ ბიზნესმენის შვილმა დავით კოდუამ განუცხადა, მას არც ერთი სახელმწიფო უწყებისგან ინფორმაცია ქონების ჩამორთმევასთან დაკავშირებით არ მიუღია. რაც შეეხება ქალაქის ცენტრში მიწის ნაკვეთის დაკარგვის სავარუდო მიზეზს, კოდუა აცხადებს, რომ შესაძლოა ეს დაკავშირებული იყო „ქართუ ბანკში“ სასეხო ვალდებულებასთან.