ძაფების მწარმოებელი საწარმო Geofibre, რომელიც ბათუმში თამარის დასახლებაში მდებარეობს, კადრების დეფიციტს განიცდის. კომპანიის წარმომადგენელი „კომერსანტთან“ აცხადებს, რომ დღეისათვის Geofibre 120-მდე თანამშრომელს აასაქმებს, თუმცა საწარმოს დაზგის ოპერატორების დეფიციტი აქვს, რადგანაც სათანადო მუშახელი არ არსებობს. Geofibre მზადაა მსურველებს ხელობა ასწავლოს და გადაამზადოს, თუმცა მსურველები არ ჩანს.
„ჩვენ ზოგადად აგვყავს და სათანადოდ ვამზადებთ კიდეც, მაგრამ ინტერესი არ არის. ხალხი არ არის საერთოდ. ხომ უნდა შემოვიდეს ვაკანსია, რომ ავიყვანოთ?", - განმარტავს Geofibre-ს წარმომადგენელი გელა გაბაიძე.
კომპანია, რომ კადრების დეფიციტს განიცდის და დაზგის ოპერატორებს ეძებს, ეს Geofibre-ს facebook-ის გვერდიდანაც კარგად ჩანს. დღეის მონაცემებით დაზგის ოპერატორების ხელფასი 750 ლარიდან იწყება და 1000 ლარამდე ადის. იმავდროულად უფასოა ტრანსპორტირება და კვება. კომპანიის თანამშრომლები უზრუნველყოფილნი არიან სათანადო დაზღვევითაც.
რაც შეეხება წარმოებას. Geofibre-ს წარმოების მოცულობა თვეში 45-დან 50 ტონამდე ძაფის წარმოებაა, რომელიც ხალიჩების მოსაქსოვად არის განკუთვნილი.კომპანიას ნედლეული თურქეთიდან შემოაქვს, ბათუმში გადაამუშავებს და ამის შემდეგ ისევ თურქეთში, ხალიჩების მწარმოებელ საწარმოებს აწვდის. როგორც კომპანიაში განმარტავენ, ძაფებზე მოთხოვნა მზარდია. საწარმოში ყველა ფერის ძაფის წარმოება ხდება, რის შეკვეთასაც დამკვეთიდან წინასწარ იღებს. პროდუქცია თურქეთში საავტომობილო გზით გადის და მიწოდების ჯაჭვი საკმაოდ აქტიურია.
თუმცა მზარდი ინფლაციის ფონზე, ბოლო რამდენიმე თვეში . Geofibre-ს ნედლეული ფაქტობრივად 30%-ითაა გაუძვირდა და შესაბამისად კომპანიამაც საექსპორტო პროდუქციის ფასი გაზარდა.