ბრიტანულმა ტექნოლოგიურმა კომპანია Dyson-მა, რომელიც მაღალი ხარისხის მტვერსასრუტებისა და თმის საშრობების წარმოებითაა ცნობილი, სასუნთქი აპარატების გამოშვება გადაწყვიტა. კომპანიამ 10 დღეში შეიმუშავა ახალი სასუნთქი აპარატის, სახელად CoVent დიზაინი და მას უკვე აქვს 10 000 ასეთი მოწყობილობის შეკვეთა, გაერთიანებული სამეფოს მთავრობისგან.
Dyson-მა სასუნთქი აპარატები ციფრული ძრავის ტექნოლოგიაზე დაყრდნობით შექმნა, რომელსაც სხვა პროდუქტებში აქამდე იყენებდა. წარმოების დასაწყებად ის გაერთიანებული სამეფოს რეგულატორის ნებართვას ელოდება, თუმცა, მეორე მხრივ, როგორც უკვე ვთქვით, უკვე მიღებული აქვს 10 000 აპარატის შეკვეთა ბრიტანული National Health Service-ისგან.
გამოქვეყნებულ განცხადებაში კომპანიის დამფუძნებელი – ჯეიმს დაისონი აღნიშნავს, რომ ამ ახალი მოწყობილობის წარმოება სწრაფადაა შესაძლებელი. მისი შექმნა კი, რა თქმა უნდა, COVID-19-ისგან შექმნილი კრიზისის გამოსწორებაში წვლილის შეტანის სურვილს უკავშირდება. როგორც უკვე ვთქვით, 10 000 სასუნთქი აპარატის შეძენას გაერთიანებული სამეფო გეგმავს, დაისონის თქმით კი დარჩენილი 5000 შესაძლოა სხვადასხვა ქვეყანას, უსასყიდლოდ გადასცენ. CNN-თან საუბრისას, კომპანიის წარმომადგენლები აცხადებენ, რომ სასუნთქი აპარატები მზად აპრილის დასაწყისში იქნება.
შეგახსენებთ, რომ სასუნთქი აპარატები კრიტიკულად საჭიროა კორონავირუსის მქონე იმ პაციენტებისთვის, რომლებსაც ინფექციის მიმდინარეობის პირობებში, სუნთქვის გართულება აქვთ. სასუნთქი აპარატების წარმოების კუთხით ნაბიჯები გადადგეს მსოფლიოს სხვა ტექნოლოგიურმა გიგანტებმაც, მათ შორის კი ვხვდებით Ford-ს, Tesla-სა და General Motors-ს.
Maketer