BBC-ის ცნობით, Trump Organization-მა მიაღწია შეთანხმებას, ძვირად ღირებული Washington hotel-ის 375 მლნ დოლარად გაყიდვის შესახებ. დაგეგმილი გაყიდვის ფარგლებში, Trump International-ს ახალი სახელი, „Waldorf Astoria“ დაერქმევა და Hilton Group-ის მმართველობაში გადავა.
გასულ თვეში აშშ-ს კონგრესის გამოძიებამ დაადგინა, რომ Washington hotel-მა, დონალდ ტრამპის პრეზიდენტობის დროს, 70 მლნ დოლარზე მეტი დაკარგა. აშშ-ის ყოფილი პრეზიდენტის კომპანიამ სასტუმრო საზოგადოებისთვის 2016 წლის სექტემბერში გახსნა. Trump Organization, რომელმაც შენობა 60-წლიანი იჯარით გამოისყიდა, თავისი 263-ნომრიანი სასტუმროსთვის მყიდველს 2019 წლიდან ეძებდა. The Wall Street Journal-ისა და Bloomberg-ის წყაროს ცნობით, მაიამის საინვესტიციო ფირმა CGI Merchant Group-თან გარიგება, სავარაუდოდ, მომავალი წლის პირველ კვარტალში დასრულდება.
120 წლის შენობა პენსილვანიის გამზირზე, თეთრი სახლიდან ერთ მილზე ნაკლებ მანძილზე მდებარეობს. Trump Organization-მა 2012 წელს ამ ისტორიული, ძველი ფოსტის შენობის განახლებაზე თანხმობა მოიპოვა და 4 წლის შემდეგ სასტუმროს სახით გახსნა. ეს რამდენიმე კვირის შემდეგ მოხდა, როცა დონალდ ტრამპი რესპუბლიკური პარტიიდან პრეზიდენტობის კანდიდატი გახდა.
ტრამპის პრეზიდენტობის პერიოდში სასტუმრო რესპუბლიკელებს შორის, რომლებიც ქალაქს სტუმრობდნენ, მეტად პოპულარული იყო. თუმცა სასტუმროს ირგვლივ 2018 წელს სკანდალიც ატყდა: რელიგიურმა ლიდერებმა სასტუმროსთვის ალკოჰოლური სასმელების ლიცენზიის გაუქმება მოითხოვეს და აცხადებდნენ, რომ მისი მფლობელი „უხასიათო ადამიანია.“ ახლახან კონგრესის გამოძიებამ დაადგინა, რომ დონალდ ტრამპმა სასტუმროს მოგება „გადაჭარბებით აჩვენა,“ როცა ამტკიცებდა, რომ მისი საპრეზიდენტო ვადის პერიოდში სასტუმრომ 150 მლნ დოლარი გამოიმუშავა. კონგრესის კომიტეტმა განაცხადა, რომ სასტუმრომ, ტრამპის პრეზიდენტობის დროს, 70 მლნ დოლარზე მეტი იზარალა.
მოხსენებაში, ასევე, ნათქვამია, რომ ტრამპი „ინტერესთა პოტენციურ კონფლიქტს მალავდა,“ რაც სასტუმროს მფლობელობას, მის კრედიტორულ როლსა და სესხებში მესამე მხარესთან გარანტორად ყოფნას უკავშირდება. დოკუმენტებმა აჩვენა, რომ სასტუმრომ უცხოური მთავრობებისგან გადახდების სახით 3,7 მლნ დოლარი მიიღო, რაც, კომიტეტის თანახმად, საშუალო დღიური კურსით, სასტუმროში 7400 ღამის დაფარვას ეყოფა.
Trump Organization-მა კანონდარღვევა უარყო და მოხსენებას „შეცდომაში შემყვანი“ უწოდა.
bpn.ge