ლარი მკვეთრ ვარდნას განაგრძობს და გაუფასურების ახალი ისტორიული რეკორდის მოსახსნელად ემზადება. Bloomberg-ის სავაჭრო პლატფორმაზე 1 აშშ დოლარის ღირებულება 31 მარტს დღის 12:00 სთ-ისთვის 3.4600-ს აღწევს, რაც ეროვნული ბანკის მიერ გამოცხადებულ ოფიციალურ კურსს - 3.4118-ს თითქმის 5 თეთრით აღემატება.
დოლარი ყველაზე ძვირი - 3.4842 ოფიციალურად 2020 წლის 27 მარტს ღირდა. 1 წლის წინ პანდემიის გამოცხადებიდან სამ კვირაზე ნაკლებ დროში ეროვნული ვალუტა 25%-ით გაუფასურდა. 9 მარტს კურსი ჯერ კიდევ 2.78 იყო, ანუ სულ რაღაც 18 დღეში დოლარის ფასი 70 თეთრით გაიზარდა.
2021 წელს მსგავსი სწრაფი ნახტომი მოსალოდნელი აღარაა, თუმცა ვარდნა მაინც გრძელდება. პირველ კვარტალში ოფიციალური კურსი 4.1%-ით გაუფასურდა. ტემპის შენარჩუნების შემთხვევაში, წლის ბოლოს დოლარის ღირებულება 3.85-ს გადააჭარბებს, არაოფიციალური - რეალური გაუფასურება უფრო მეტია და 5.1%-ს შეადგენს. ასეთ შემთხვევაში 2022 წლამდე დოლარის ღირებულება 4.00-იან ნიშნულსაც გადალახავს.
წლის პირველ სამ თვეში ეროვნულმა ბანკმა ოთხჯერადი ინტერვენციის შედეგად ბაზარს $160 მლნ მიაწოდა. გარდა ამისა რეფინანსირების განაკვეთი 0.5%-ით 8.5%-მდე გაზარდა, რითაც 124 000-ზე მეტ პირს სესხი გაუძვირა. არეგულირებლის ამ ქმედებებმა ვარდნის ტემპი მცირედით შეანელა, მაგრამ არ შეუჩერებია.
მომხმარებელს ოფიციალური კურსით დოლარის ყიდვა არ შეუძლია. სავალუტო ჯიხურებში დოლარი 3.46 ღირს, კომერციულ ბანკებში კი 3.50-3.52.
გიორგი ელიზბარაშვილი