მიმდინარე კვირის განმავლობაში ლარის კურსი გაუფასურების ტენდენციით ხასიათდება. საქართველოს ეროვნული ბანკის მიერ გამოქვეყნებული მონაცემების თანახმად, 16 ივლისის ვაჭრობის შედეგად ერთი ამერიკული დოლარი 3.0652 ლარი, ევრო – 3.4925 ლარი, ხოლო ბრიტანული გირვანქა სტერლინგი – 3.8431 ლარი გახდა.
თიბისი ჯგუფის მთავარი ეკონომისტი ოთარ ნადარაია „კომერსანტთან“ საუბრისას აღნიშნავს, რომ ლარის მკვეთრ გაუფასურებას თიბისი ჯგუფი აღარ ელის. მისი თქმით, დოლარი მსოფლიოში ძალიან მყარია და არის დიდი ალბათობა იმისა, რომ პოზიციები დათმოს, მათ შორის ლარის სასარგებლოდ.
„ლარის კურსი დამოკიდებულია შემოდინება-გადინების ბალანსზე და ამ მხრივ დანაკლისიც მნიშვნელოვნად გვაქვს, თუმცა ლარის მკვეთრ გაუფასურებას თიბისი ჯგუფი აღარ ელის, რადგან შემოდინებებში რა დანაკარგიც არის საკმარისად კომპენსირდება საგარეო დაფინანსებით, რომელიც საქართველომ მოიძია. ასევე ლარის კურსი დოლართან დამოკიდებულია იმაზეც თუ როგორი იქნება ლირის, ევროს, რუბლის და სხვა ვალუტების კურსი დოლართან მიმართებაში. დოლარის მკვეთრი გამყარება მოსალოდნელი არ არის, უფრო პირიქითაც, ამიტომ ამ მხრივაც ლარზე გაუფასურების ზეწოლას ჩვენ არ ველით. დოლარი მსოფლიოში ძალიან მყარია და არის დიდი ალბათობა იმისა, რომ პოზიციები დათმოს. ასევე მნიშვნელოვანია ინფლაციის თემა, ძალიან დიდი გადახრა სამიზნე ინფლაციიდან მოსალოდნელი არ არის. სხვა ვალუტების პროგნოზებიდან გამომდინარე, ჩვენი პროგნოზით, წლის ბოლო ლარის კურსი დოლართან მიმართებაში დაახლოებით 3.0-ს გაუტოლდება“, - განმარტა ოთარ ნადარაიამ.
აღსანიშნავია, რომ „თიბისი კაპიტალის“ კვლევის საბაზო სცენარის მიხედვით, მოსალოდნელია, რომ მიმდინარე წლის აგვისტო-სექტემბერში ლარის კურსი დოლართან მიმართებაში 3.15-ს გაუტოლდება, ხოლო დეკემბერში 3.0-მდე გამყარდება.
კვლევის თანახმად, შემოდინებების გარდა, ლარის კურსი აშშ დოლართან ასევე დამოკიდებულია დოლარის კურსზე ევროსთან, ლირასთან და რუბლთან მიმართებაში. იმის გათვალისწინებით, რომ დოლარი უკვე ძალიან მყარია სხვა ვალუტებთან მიმართებაში, საერთაშორისო ბაზრებზე მისი შემდგომი მნიშვნელოვანი გამყარება ნაკლებ სავარაუდოა. გარდა ამისა, ამჯერადაც, ევროს, რუბლს, ლირასა და ლარს დოლართან მიმართებით გარკვეულწილად მსგავსი ციკლი ახასიათებს.
„თიბისი კაპიტალის“ ახალ კვლევაში რამდენიმე საკითხი გამოიკვეთა:
- ლარი უფრო სტაბილურია ევროს, ვიდრე დოლარის მიმართ; საქართველოში ეკონომიკის ზრდა უფრო სტაბილურია ევროში დოლართან შედარებით;
- ბიზნეს მსესხებლებისათვის შესაძლებელია ევროს შედარებით მეტი წილი იყოს ოპტიმალური;
- სავარაუდოდ, საშუალოვადიან პერსპექტივაში ევრო დოლართან მიმართებაში გამყარდება, რასაც ლარის დოლართან გამყარებაც მოყვება, თუმცა შესაძლოა შედარებით ნაკლები ტემპით;
- დოლარის გამყარების ალბათობა ნაკლებია, თუმცა ასეთ შემთხვევაში ნეგატიური ეფექტი ბევრად მეტია.
ნინო თამაზაშვილი