აშშ-ის პრეზიდენტმა, ჯო ბაიდენმა მობილური აპლიკაციების TikTok-ისა და WeChat-ის დაბლოკვის შესახებ დონალდ ტრამპის აღმასრულებელი განკარგულებები გააუქმა. ინფორმაციას ამის შესახებ თეთრი სახლი ავრცელებს.

თეთრი სახლის განცხადებაში ნათქვამია, რომ პოპულარული აპლიკაციების აკრძალვის ნაცვლად, ბაიდენის ადმინისტრაცია დანერგავს კრიტერიუმებზე დაფუძნებული გადაწყვეტილების მიღების ჩარჩოს და მკაცრ, მტკიცებულებებზე დაფუძნებულ ანალიზს რისკების აღმოსაფხვრელად უცხოური ორგანიზაციების მიერ კონტროლირებადი ინტერნეტ პროგრამების მიმართ.

ჯო ბაიდენის ახალი განკარგულება მიზნად ისახავს ნებისმიერი დაკავშირებული პროგრამული უზრუნველყოფის აპლიკაციის გამოვლენას, რომელიც შეიძლება საფრთხეს წარმოადგენდეს აშშ-ის ეროვნული უსაფრთხოებისა და ამერიკელი ხალხისთვის, ან მოიცავდეს პროგრამებს, რომლებიც სენსიტიურ პერსონალურ მონაცემებს აგროვებენ.

ახალი განკარგულება ასევე მოუწოდებს აშშ-ის ვაჭრობის დეპარტამენტსა და სხვა ფედერალურ სააგენტოებს, შეიმუშაონ გაიდლაინები სენსიტიური პერსონალური მონაცემების დასაცავად.

თავის დროს, დონალდ ტრამპის ადმინისტრაცია აცხადებდა, რომ TikTok-ის მეშვეობით ჩინეთის მთავრობას ამერიკის მოსახლეობის პირად მონაცემებზე ხელი მიუწვდებოდა.

2020 წელს აშშ-ის ვაჭრობის დეპარტამენტში აღნიშნეს, რომ „ჩინეთის კომუნისტურმა პარტიამ აჩვენა, რომ აღნიშნული აპლიკაციების აშშ-ის ეროვნული უსაფრთხოების წინააღმდეგ გამოყენების შესაძლებლობები აქვს“.

imedinews.ge