„როდესაც ჩაივლის კორონავირუსის პანდემია, გამოჩნდება რისი გაკეთებაა შესაძლებელი და რა მდგომარეობაში იქნება ქვეყანა ეკონომიკურად. ჯერ დიაგნოზი უნდა დავსვათ და მერე საჭიროა მკურნალობა, ეს არის კრიზისის მენეჯმენტი.“ - ბიზნესმენმა ირაკლი იაშვილმა მსოფლიოში გავრცელებული კორონავირუსის პანდემიის ფონზე საქართველოს ეკონომიკური პოლიტიკა შეაფასა.
ბიზნესმენი მიიჩნევს, რომ მოულოდნელი დარტყმისთვის მზად არათუ საქართველო, არამედ მსოფლიოს ძლიერი ქვეყნის ეკონომიკები არ იყვნენ, თუმცა, სახელმწიფოსგან უკვე არსებული ღონისძიებების გარდა დამატებით ეფექტურობის მოლოდინი არ აქვს.
„მე არ ვიცი ასეთ დროს რა უნდა მოსთხოვო ხელისუფლებას ეკონომიკური კრიზისის დასაძლევად. ეს არის მსოფლიო სტიქია და არ ვიცით მომავალში რა დარჩება ქვეყნის ეკონომიკისგან. მსოფლიოს ძლიერი ქვეყნები ეძებენ გამოსავალს და ჩვენ არ ვართ ისეთი ძლიერები ეკონომიკურად, რომ ბიზნესმა დარტყმა არ მიიღოს. არ ველოდები რამეს და არც ვთხოვ მთავრობას. რაც ამ ეტაპზე გასაკეთებელია კეთდება, ეს არის მინიმალური და ლოკალური ღონისძიებები და არა გრძელვადიანი, რასაც ვერც გააკეთებს მთავრობა. არავინ არ იყო ასეთი დარტყმისთვის მზად, თუ შევედრებით სხვა ქვეყნებს, ჩვენ 2-3 კვირით გავასწარით დანარჩენ მსოფლიოს ღონისძიებების განხორციელებაში. ახლა მთავარი ამოცანა არის ის, რომ ვირუსის გავრცელება არ იყოს დიდი, პროდუქტი არ შემცირდეს და ძველი ფასები შენარჩუნდეს. ეკონომიკა სად იქნება ერთი თვის მერე, არავინ იცის ეს მსოფლიო ომია და ჩვენ ვართ ასეთი ძლიერი ქვეყნების კარიკატურა, რომლებიც თავს იმტვრევენ ამ სიტუაციიდან გამოსავლის მოსაძებნად.“ - განმარტავს ირაკლი იაშვილი.
შეგახსენებთ, რომ კორონავირუსის გავრცელების პრევენციის მიზნით, კერძო სექტორი სახელმწიფოს ფინანსურ დახმარებას სთავაზობს. ქვეყანაში შექმნილი გარემოების გამო, საქართველოს ეკონომიკა შესაძლებელია სერიოზული საფრთხის წინაშე დადგეს, ამის გამო ბიზნესის ნაწილს მიაჩნია, რომ სახელმწიფოს მათი დახმარება სჭირდება, ნაწილი კი აცხადებს, რომ არსებულმა მდგომარეობამ კერძო სექტორზეც უარყოფითად იმოქმედა.
მარიამ მორგოშია