მსოფლიოში, გასული კვირის განმავლობაში, კოვიდ 19-ით ინფიცირების 4 მილიონზე მეტი ახალი შემთხვევა გამოვლინდა, რაც წინა კვირასთან შედარებით 3 %-ით მეტია, - ამის შესახებ ჯანდაცვის მსოფლიო ორგანიზაციის ყოველკვირეულ ანგარიშშია აღნიშნული. ორგანიზაციის ინფორმაციით, დაინფიცირების შემთხვევების ყოველკვირეული რაოდენობა ბოლო 1 თვეზე მეტი ხნის განმავლობაში იზრდება.
მზარდი ტენდენცია დიდწილად განპირობებულია აღმოსავლეთ ხმელთაშუაზღვისპირეთსა და წყნარი ოკეანის დასავლეთ ნაწილში შემთხვევების ზრდით, სადაც დაინფიცირების ახალი შემთხვევების რაოდენობა წინა კვირასთან შედარებით 37% და 33% -ითაა გაზრდილი.
ჯანდაცვის მსოფლიო ორგანიზაციის ინფორმაციით, დაინფიცირების ახალი შემთხვევებიდან ყველაზე მეტი - 543 420 შემთხვევა აშშ-ში გამოვლინდა, რაც წინა კვირაში დაფიქსირებულ შემთხვევებზე 9%-ით მეტია. შემდეგ მოდის ინდოეთი 283 923 ახალი შემთხვევით, რაც წინა კვირაში გამოვლენილ შემთხვევებს 7 %-ით აჭარბებს, მესამე ადგილზეა ინდონეზია, 273 891ახალი შემთხვევით, რაც იმას ნიშნავს, რომ ქვეყანაში დაინფიცირების მაჩვენებელი წინა კვირასთან შედარებით 5 %-ითაა შემცირებული, აღნიშნულ ქვეყნებს კი ბრაზილია და ირანი მოჰყვებიან.
ჯანდაცვის მსოფლიო ორგანიზაციის ანგარიშის თანახმად, გასული კვირის განმავლობაში კორონავირუსს 64 000-მდე ადამიანის სიცოცხლე ემსხვერპლა, რაც წინა კვირაში დაფიქსირებულ ფატალურ შემთხვევებზე 8 %-ით ნაკლებია. ამასთან, ორგანიზაციის ყოველკვირეულ ანგარიშში აღნიშნულია, რომ კორონავირუსის ახალი, ე.წ. შემაშფოთებელი ვარიანტები მთელი მსოფლიოს მასშტაბით გავრცელებას აგრძელებენ.
„ალფა“ ვარიანტი, რომელიც პირველად გაერთიანებულ სამეფოში გამოვლინდა და ამის გამო „ბრიტანულ ვარიანტად“ მოიხსენებენ, მსოფლიოს დაახლოებით 182 ქვეყანაშია გამოვლენილი, „ბეტა“, ე.წ. „სამხრეთ აფრიკული“ ვარიანტი 132 ქვეყანაში, - „გამა“, ანუ ე.წ. ბრაზილიური ვარიანტი - 81 ქვეყანაში. რაც შეეხება „დელტა“ შტამს, რომელიც „ინდური ვარიანტის“ სახელითაა ცნობილი, ამ დროისთვის ის მსოფლიოს 135 ქვეყანაშია დაფიქსირებული.
IPN.GE