საქართველოს ჯანდაცვის სამინისტრო აცხადებს, რომ თბილისის ინფექციური საავადმყოფოს დირექტორი, თენგიზ ცერცვაძის მათ მიმართ ცრუ ბრალდებებს ავრცელებს. ბრალდებებთან დაკავშირებით რადიო თავისუფლებას სამინისტროს პოზიცია უწყების პრესსამსახურმა მიაწოდა.

"საქართველოს შრომის, ჯანმრთელობისა და სოციალური დაცვის სამინისტრო, თენგიზ ცერცვაძის მიერ გაკეთებულ განცხადებას არ იზიარებს. მიგვაჩნია, რომ თბილისის ინფექციური საავადმყოფოს დირექტორის, ბატონი თენგიზ ცერცვაძეს ბრალდებები სამინისტროს მიმართ ცრუ და უსაფუძვლოა", - აცხადებენ უწყებაში.

მათივე განმარტებით, სამინისტრომ 2020 წლის თებერვალში კლინიკას უფლება მისცა 2017 და 2018 წელს მიღებული მოგება, მილიონ ლარზე მეტი, ცენტრს გამოეყენებინა. უწყება განმარტავს, რომ მსგავსი თხოვნა კლინიკისგან 2019 წლის თებერვალში მიიღეს.

გუშინ თბილისის ინფექციური პათოლოგიისა და შიდსის ცენტრის დირექტორმა, თენგიზ ცერცვაძემ თქვა, რომ მძიმე პირობების გამო კლინიკა იძულებული იყო პაციენტების მიღება შეეწყვიტა.

თბილისის ინფექციური საავადმყოფო საქართველოში კოვიდინფექციასთან ბრძოლაში ჩართული ერთ-ერთი მთავარი კლინიკაა. დაწესებულება წლებია, პაციენტებს იღებს იჯარით აღებულ და მოუწესრიგებელ შენობაში, რომელშიც ძლიერი წვიმის დროს წყალი ჩადის.

radiotavisupleba.ge