C ჰეპატიტის მკურნალობასთან დაკავშირებულ პროგრამას ჯანდაცვის სამინისტროში გამართულ პრესკონფერენციაზე მსოფლიოში სამაგალითო უწოდეს. 

ამასთან, აუდიტის დასკვნის საპასუხოდ ჯანდაცვის სამინისტროში განაცხადეს, რომ სახელმწიფო ვალდებულია, მედიკამენტები მარაგის სახით ჰქონდეს და ეს საპროგნოზო მაჩვენებელს სრულიად აკმაყოფილებს. საუბარია დაახლოებით 2000 პაციენტისთვის მორჩენილ საჭირო მედიკამენტზე. 

როგორც დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ სამინისტროში გამართულ პრესკონფერენციაზე განაცხადა, 58 000 ადამიანმა დაასრულა მკურნალობა, 98,7 პროცენტი განკურნების ეფექტით და ეს არის საქართველოს მედიცინის უზარმაზარი მიღწევა. 

მისი ინფორმაციით, საქართველოში 2020 წლისთვის პროგნოზირებული გეგმის შესასრულებლად სავარაუდოდ, კიდევ ორი-სამი წელი იქნება საჭირო და ეს კრიტიკის საგანი არ უნდა გახდეს.

„ჯანმრთელობის მსოფლიო ორგანიზაციის პროგნოზით,  მსოფლიომ 2030 წლისთვის დაგეგმა, რომ 90 პროცენტი, 71 მლნ ადამიანი, ინფიცირებული გამოავლინოს და უმკურნალოს. პირველადი ჩვენი პროგნოზით, ეს გეგმა გვქონდა 2020-ში, მაგრამ ვფიქრობთ, რომ დაახლოებით კიდევ დაგვჭირდება ორი-სამი წელიწადი. ეს არ უნდა იყოს კრიტიკის საგანი. აქ ჩვენ ყველა, პოზიცია და ოპოზიცია უნდა ვიყოთ ერთად, რადგან უპრეცედენტო პროგრამაა და ადამიანების ჯანმრთელობას ეხება. ამ პროგრამამ ათასობით ადამიანის სიცოცხლე გადაარჩინა და პრევენცია მოახდინა უმძიმესი დაავადებების განვითარების. აქ ყველამ ერთი პოზიციით უნდა შევხედოთ ამ საკითხს და ერთმანეთს დავეხმაროთ“, - განაცხადა ამირან გამყრელიძემ.

მისივე თქმით, დღევანდელი მონაცემებით, გამოკვლეულია მოზრდილი მოსახლეობის 60 პროცენტი, მკურნალობაში ჩართულია 65 000 ადამიანი.

 „58 000 ადამიანმა დაასრულა მკურნალობა, 98,7 პროცენტი განკურნების ეფექტით. ეს გახლავთ საქართველოს მედიცინის უზარმაზარი მიღწევა, რადგან მკურნალობაში ჩართულ 65 000 ადამიანს, მათ შორის, ვინც დაასრულა, საუბარია 58 000-ზე, აღარ განუვითარდება ღვიძლის კიბო, აღარ განუვითარდება ღვიძლის ცეროზი და იცოცხლებს დაახლოებით 15-20 წლით მეტს, ვიდრე ეს დაავადებები რომ განვითარებულიყო. კიდევ ერთხელ ხაზს ვუსვამ, ეს გახლავთ უპრეცედენტო მიღწევა საქართველოს ჯანდაცვის და ამ თვალსაზრისით, საქართველო განიხილება მთელ მსოფლიოში, როგორც სამოდელო ქვეყანა“, - განაცხადა ამირან გამყრელიძემ.

რაც შეეხება შეკითხვას იმის შესახებ, რომ შესაძლოა, დონორმა ქვეყნებმა მედიკამენტების მოწოდება შეგვიზღუდონ, ან პროგრამა ჩავარდეს, ჯანდაცვის სამინისტროში განმარტავენ, რომ ეს სიმართლეს არ შეესაბამება. 

სახელმწიფო აუდიტის სამსახურის ინფორმაციით, C ჰეპატიტის მართვის პროგრამის ფარგლებში საქართველოს მიერ უსასყიდლოდ მიღებული, 560 645 083 ლარის ღირებულების მედიკამენტებს ვადა გაუვიდა. ამის შესახებ ჯანდაცვის სამინისტროს ფინანსურ აუდიტში წერია.