საყოველთაო ჯანდაცვის პროგრამის ფარგლებში მიწოდებული სერვისების ტარიფების გათანაბრებისთვის 520-ე დადგენილება ორი თვეა ამოქმედდა. რეფორმამ კლინიკებს და პაციენტებს პირველადი უარყოფითი შედეგი უკვე მოუტანა. სწორედ ამიტომ, საპარლამენტო ფრაქცია „დამოუკიდებელი დეპუტატები“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პარლამენტში მისვლას ითხოვენ. დეპუტატებთან ერთად ეკატერინე ტიკარაძისთვის კითხვების დასმას ჰოსპიტალური სექტორის წარმომადგენლებიც გეგმავენ. „კომერსანტი“ დაინტერესდა ჯანმრთელობის დაცვისა და სოციალურ საკითხთა კომიტეტის სხდომაზე რა კითხვებს დაუსვამენ თეთრ ხალათიანები მინისტრს, რომლის მიერ გატარებულ პირველივე რეფორმამ სამედიცინო სფერო წარმომადგენლების მწვავე კრიტიკა დაიმსახურა.
რუსუდან ლაგვილავა - „ჰელსიკორი“- ის დირექტორი
„ყველა სხვა საკითხს თავი რომ დავანებოთ, ერთ კონკრეტულ ოპერაციაზე მაქვს კითხვა. არის ესეთი ოპერაცია, რომელსაც ჰქვია თავის სარქველის ოპერაცია და რომელიც მხოლოდ ჩვენთან ტარდება. სარქველი, რომელიც ამ ოპერაციის დროს გამოიყენება 24 000 დოლარი ღირს. ჯანდაცვის სამინისტრომ ეს სერვისი 12 000 ლარად შეაფასა და გვითხრა რომ პაციენტს თანხა არ უნდა დავამატებინოთ. ძალიან მაინტერესებს ამ შეკითხვაზე რა პასუხს გამცემს ქალბატონი ეკატერინე. 24 000 დოლარიანი სარქველი როგორ გავაკეთოთ 12 000 ლარად?“
ზვიად ბახუტაშვილი - აკად. გ. ჩაფიძის სახელობის გადაუდებელი კარდიოლოგიის ცენტრის ქირურგიის დეპარტამენტის ხელმძღვანელი
„ჩვენი ძალზედ კრიტიკული პოზიციების შემდეგ, პრემიერის თხოვნით შეიქმნა სამუშაო ჯგუფი, სადაც პრობლემური საკითხები უნდა განგვეხილა. სამუშაო ჯგუფი შეიქმნა, თუმცა 10 იანვრის შემდეგ არაფერი მომხდარა. ჩვენ ვამბობთ, რომ კონკრეტული მანიპულაციები დადგენილ ფასებში ვერ ეტევა. როდესაც პირად საუბრებში არსებულ არგუმენტებს ვიშველიებთ, სამინისტროს წარმომადგენლები თითქოს გვეთანხმებიან, მაგრამ გადაწყვეტილება არ შეცვლილა და რა უნდა უნდა ვკითხო ახლა ტიკარაძეს? არანაირი კითხვა არ მაქვს. ფაქტია რომ პროცედურები ვაი-ვაგლახით დადგენილ ტარიფებში ეტევა, მაგრამ ზოგიერთი კატეგორიულად თანხაში ვერ ეტევა. კითხვაზე, რატომ არ იყო აქამდე ესეთი დაბალი ფასი, იმიტომ რომ თანხები დარგის განვითარებაშია ჩადებული, ხომ გვინდა, რომ მედიცინა 21- ე საუკუნეს არ ჩამორჩეს?“
კახაბერ ეცადაშვილი - „საქართველოს გულის რიტმის ასოციაციის“ პრეზიდენტი
„მინისტრთან ერთადერთი კითხვა მაქვს, დაპირებული ცვლილება ძალაში როდის შევა? თვითონ სამინისტრომაც აღიარა, რომ ფასწარმოქმნაში შეცდომა იყო დაშვებული და თქვეს, რომ დეფიბრილატორების და პეისმეიკერების ანაზღაურება ფაქტობრივი დანახარჯით უნდა მოხდეს. 10 იანვარს დაგვპირდნენ რომ ყველაფერი გამზადებულია ხელმოსაწერად და ცვლილებების შესატანად და დღემდე არაფერი ხდება დაველოდებით როდის შევა ეს დაპირება ძალაში. არითმოლოგიური სამსახური ამ რეფორმის პირობებში ვერ იმოქმედებს, გვრჩება ერთ კამერიანი სტიმულატორი და რესინქრონიზატორი დეფიბრილატორის გარეშე, ეს ემსახურება ჩვენი პაციენტების 20 პროცენტს, 80 პროცენტს ამ დანადგარებით მომსახურებას ვერ გავუწევთ“.
ბაჩო ადამია