„საქართველოს ეროვნული ბანკმა“ „საქართველოს კაპიტალის ჯგუფი“, რომელიც „საქართველოს ჯანდაცვის ჯგუფს“ (GHG) ფლობს, მოქმედი რეგულაციების დარღვევის გზით, საქართველოს საბანკო სისტემიდან დასაშვებზე მეტი დაფინანსების მიღების მცდელობაში დაადანაშაულა.
„საქართველოს ჯანდაცვის ჯგუფი“ (GHG) ეროვნული ბანკის მიერ გამოქვეყნებული განცხადების პასუხად აღნიშნავს, რომ მარეგულირებლის მიერ გავრცელებული ინფორმაცია, იმის თაობაზე, თითქოს კომპანია ცდილობს, რომ კრიზისული ვითარებით ისარგებლოს და რეგულაციების მოთხოვნების დარღვევით მიიღოს დაფინანსება „საქართველოს ბანკისგან“ ცალსახად არ შეესაბამება სინამდვილეს და ამგვარი ინტერპრეტაცია ყოვლად მიუღებელია.
„კომერსანტმა“ საკითხის შეფასება ეროვნული ბანკის ყოფილ პრეზიდენტს და პარლამენტში ერთიანი ნაციონალური მოძრაობის ფრაქციის თავმჯდომარეს რომან გოცირიძეს სთხოვა, თუმცა მან კომენტარისგან თავი შეიკავა. რომან გოცირიძემ აღნიშნა, რომ ამ თემასთან დაკავშირებით პოსტი სოციალურ ქსელში 12 აპრილს უკვე გამოაქვეყნა და დამატებით შეფასებას არ აკეთებს.
სოციალურ ქსელში გამოქვეყნებულ პოსტში რომან გოცირიძე წერდა, რომ სებ-მა არ უნდა გადადგას ნაბიჯები „საქართველოს ჯანდაცვის ჯგუფის“ მიერ გაკეთებული განცხადების გამო და „საქართველოს ბანკს“ მასზე სესხის გაცემის უფლება არ უნდა მიეცეს.
„ეს საცოდავი ეროვნული ბანკი ისევ ჩემი დასაცავი რომ გახდება?! არა და არაა ღირსი.
მიმდინარეობს საჯარო შეტევა ეროვნულ ბანკზე ქვეყანაში ყველაზე დიდი სამედიცინო ჰოლდინგის “საქართველოს სამედიცინო ჯგუფის”( “ევექსი”, “იმედი L”) მხრიდან. ეროვნულ ბანკს აიძულებენ, როგორც საბანკო სისტემის ზედამხედველს, დაარღვიოს კანონი და ერთ-ერთ კომერციულ ბანკს მისცეს უფლება გასცეს იმაზე მეტი ოდენობის სესხი, ვიდრე არსებული რეგულაციები ითვალისწინებს. იშველიებს რა კორონავირუსთან ბრძოლის საჭიროებას, ამ კომპანიას სურს საკუთარი ფინანსური პრობლემები მოაგვაროს სხვისთვის ( მათ შორის მეანაბრეებისათვის) პრობლემის შექმნის გზით.
საბანკო სისტემა თუ ჩამოიშალა, კორონავირუსი მონაგონი იქნება. იყო ამის რისკი და პირველი ნიშნები მაშინ გამოჩნდა, როდესაც ლარში განთავსებული დეპოზიტების გატანა დაიწყო ხალხმა. ეროვნულმა ბანკმა ინტერვენციებით ( თუმცა დაგვიანებულით) ჩააცხრო ეს პროცესი. მიუხედავად ამისა, ვითარება კვლავ სარისკოა.
ეროვნული ბანკის მიერ ზემოთმოყვანილი და სხვა ქმედებებით მაქსიმალურად იქნა შერბილებული კომერციულ ბანკებზე საზედამხედველო მოთხოვნები, ეკონომიკაში შექმნილი უკიდურესად კრიტიკული ვითარების გამო. ბეწვის ხიდზე გავდივართ ფაქტობრივად. ასეთ დროს ზეწოლა ეროვნულ ბანკზე (და ეს იქნება მთავრობიდანაც ამ კომპანიის კავშირებიდან გამომდინარე) სარისკო სესხების გაცემის ნებართვის მოთხოვნით, ნიშნავს იმას, რომ სერიოზული რისკის ქვეშ დააყენო ქვეყნის ფინანსური სტაბილურობა.
ვნახოთ, ეყოფა თუ არა ეროვნულ ბანკს პრინციპულობა“,- წერდა რომან გოცირიძე.
ნინო თამაზაშვილი