კორონავირუსის გამო ქვეყანაში არც თუ სახარბიელო მდგომარეობაა. კომპანიები მაქსიმალურად ცდილობენ სურსათზე ფასი შეინარჩუნონ.თუმცა, დისტრიბუტორთა ასოციაციის თავმჯდომარის ივა ჭყონიას განცხადებით, ფასის ცვლილება საერთაშორისო ბაზარზეა დამოკიდებული, რასაც ადგილობრივი კომპანიები ვერც შეცვლიან და ვერც წინ გაუსწრებენ.
ივა ჭყონიას თქმით, დღევანდელი ლარის კურსი ადგილობრივი ბიზნესისთვის კრიტიკულია.
როგორც ჭყონიამ აღნიშნა, ლარი იმ ნიშნულს მკვეთრად გასცდა, რომელზეც სადისტრიბუციო კომპანიებს ხელშეკრულება ჰქონდათ გაფორმებული, დღეს კი გათვლა 3.0 ლარზე აქვთ.
დისტრიბუტორთა ბიზნესასოციიაციის ხელმძღვანელი იმასაც ამბობს, რომ დისტრიბუტორები კომპანიებს სარეალიზაციაო ფასის პარალელურად, საკუთარი კომპანიების შესანარჩუნებლად უწევთ ბრძოლა, რადგან ლარის გაუფასურების გამო გადასახადები გაეზარდათ.
„გაუფასურებული ლარის პირობებში, იმ 9 პროდუქტზე, რომელსაც სახელმწიფო ასუბსიდირებს ფასი არ შეიცვლება. ესენია, რძის ფხვნილი, წიწიბურა, ბრინჯი, ლობიო, შაქარი, ზეთი, ბურჟულეული, ფქვილი, ხორბალი, მაკარონი.
კომპანიები 3.0 ნიშნულით იხდიან ამ პროდუქტებზე, დანარჩენს სახელმწიფო ასუბსიდირებს. მდგომარეობა უკონტროლო გახდება თუ საერთაშორისო ბაზარზე მდგომარეობა შეიცვალა და გარკვეულ პროდუქტზე ფასი გაიზარდა, როგორც გარკვეული პერიოდის წინ შაქრის შემთხვევაში იყო, ჩვენ ამ დროს უძლურები ვიქნებით, შესაბამისად, მოგვიწევს ფასების ზრდა“-ამბობს ივა ჭყონია.
შეგახსნებთ, რომ ლარი გაუფასურებას განაგრძობს. დღეის მდგომარეობით Bloomberg-ის სავაჭრო სისტემაში დილიდან ვაჭრობა $1/3.4762-ით დაიწყო, 12:20 საათისთვის 1 დოლარი 3.4731 -ის ნიშნულზეა. ეროვნული ბანკის მიერ გამოქვეყნებული მონაცემების თანახმად, 24 მარტის ვაჭრობის შედეგად აშშ დოლარის ღირებულებამ 3.4494 ლარი შეადგინა.
ნათია ლომიძე