„დისტანციურ რეჟიმში საგანმანათლებლო პროგრამის განხორციელებისას, სკოლის ხარჯები არ შემცირებულა. მეტიც, საათობრივად რომ შევხედოთ, მთელ აკადემიურ კოლექტივს ახლა უფრო მეტი დროის გატარება უწევს რესურსების მოძიებაზე და სასწავლო პროცესის ორგანიზებაზე“ -   „ბაქსვუდის“ კერძო სკოლის აკადემიური დირექტორი არჩილ სუმბაძე „კომერსანტთან“ სწავლების ონლაინ რეჟიმთან დაკავშირებულ ძირითად გამოწვევებზე საუბრობს. 

შეგახსენებთ, რომ საქართველოში კორონავირუსის გავრცელების პრევენციის მიზნით განათლების სამინისტრომ სკოლებს სწავლების ონლაინ მეთოდის გამოყენება შესთავაზა,რის შედეგადაც კერძო და საჯარო სკოლებმა სწავლების დისტანციური მოდელისთვის საკომუნიკაციო არხების ორგანიზება მოახდინეს.

ამ მეთოდს იყენებენ საქართველოში მოქმედი კერძო სკოლებიც. არაერთ კერძო სკოლაში, მოსწავლეებს დამატებით სერვისს სთავაზობდნენ დამატებითი საფასურის სანაცვლოდ,  როგორებიცაა კვება და ტრანსპორტირება, ხოლო ახლა ამ სერვისის გამოყენების საშუალება  მშობლებს და მოსწავლეებს ფიზიკურად არ აქვთ.

„კომერსანტი“ დაინტერესდა აპირებენ თუ არა კერძო სკოლები  სწავლების გადასახადის კორექტირებას, რა გამოწვევების წინაშე დადგება ონლაინ სწავლების რეჟიმი, თუკი პროცესები იმაზე დიდხანს გაგრძელდა, ვიდრე დაანონსებულია?

„ბაქსვუდის“ სკოლის აკადემიურმა დირექტორმა არჩლ სუმბაძემ, საუბრისას აღნიშნა, რომ ხარჯები საგანმანათლებლო მომსახურებასთან დაკავშირებით არ შეცვლილა. მეტივ, გაიზარდა პერსონალის საათობრივი დატვირთვა. შესაბამისად, დამატებითი სერვისების მოხსნასთან დაკავშირებით ფასების კორექტირება სკოლის მხრიდან აუცილებლად მოხდება.

„იმ სკოლებისთვის, ვისაც დამატებითი სერვისები გვაქვს ანგარიშგებაში გარკვეული კორექტირება უნდა მოხდეს და მოხდება კიდეც. გუშინ ჩვენ ვაცნობეთ მშობლებს, რომ დამატებითი სერვისების ვერ გამოყენება (კვება, ტრანსპორტირება  და ა.შ.) ჩვენი ხელშეკრულების პირობებში აუცილებლად აისახება.

როგორც კი დაიწყო ეს პროცესები და სკოლების ონლაინ სწავლებაზე გადასვლა გახდა საჭირო, დავიწყეთ შესაბამისად გადაწყობა. პირველი ამოცანა იყო ყველაზე შესაფერისი და მოსახერხებელი პლატფორმის პოვნა, რომელიც ერთის მხრივ, მასწავლებლების შიდა კომუნიკაციისთვის და მეორეს მხრივ, მასწავლებლებისა და მშობლებისთვის იქნებოდა ხელმისაწვდომი. რამდენიმე პროგრამა მოვსინჯეთ, საბოლოდ ყველაზე ოპტიმალურად  Zoom-ის გამოყენება  ჩავთვალეთ.

მეორე გამოწვევა სასკოლო ცხრილის გადაწყობა იყო ონლაინ სწავლების რეჟიმზე და მისი მისადაგება დისტანციურ სწავლებაზე. საბოლოოდ, 16 მარტიდან სრულად გადავედით ამ მოდელზე და ჩართულობაც საკმაოდ მაღალია.  მთავარი გამოწვევა, რაზეც სამინისტროსთან აქტიურად ვსაუბრობთ არის ის, თუ რამდენად ექნება მნიშვნელობა და ვალიდურობა ამ დისტანციურ მოდელს და თუ ჩაეთვლებათ მოსწავლეებსა და მასწავლებლებს სწავლის ეს პერიოდი. ამ ეტაპზე ეს პროცესი დაძრულია. მაგრამ, თუ ძალიან გახანგრძლივდა ეს რეჟიმი და სხვა ქვეყნებმა გაზარდეს საერთაშორისო მოხმარება აღნიშნულ პლატფორმებზე, საკითხავია რამდენად შეძლებენ ეს პროგრამები მდგრადობის შენარჩუნებას. ვცდილობთ, საერთაშორისო პრაქტიკა გავიზიაროთ და ჩათვლა, გამოცდა და  შეფასების სისტემა სრულად შევიმუშავოთ.“- აღნიშნა არჩილ სუმბაძემ.

იოანე პეტრიწის სახელობის კერძო სკოლა „იბერია“ გადასახადის შემცირებას არ განიხილავს, თუმცა, სკოლის დირექტორის თქმით, სკოლა იჯარის სოლიდურ გადასახადს იხდის, რომელიც არ გაუქმებულა, ხოლო მასწავლებლები უფრო მეტი დატვირთვით მუშაობენ.

„სწავლის საფასურის გადახედვა არ გამოვა იმიტომ, რომ მაღალანაზღაურებადი სკოლებიც არ განიხილავენ ამას. გააჩნია მშობელი რას იხდის, ჩვენთან არ არის ისეთი გადასახადი, რომ შემცირება გახდეს საჭირო. ამ პერიოდში არ გაჩერებულა სწავლება და მასწავლებლებები დღესა და ღამეს ასწორებენ. მასწავლებელიც უნდა გავითვალისწინოთ, რომელიც ხელფასზე არიან დამოკიდებული. კერძო სკოლაში ვისაც ჰყავს ბავშვი, იმათ შესაბამისი ხელფასი აქვთ და არ ვთვლი საჭიროდ ფასის დაკლებას.საკმაოდ რთული ჩასატარებელია ონლაინ გაკვეთილი, დილის 10 სათიდან 3 საათამდე მასწავლებელი ზის და მუშაობს ბავშვებთან.  მართალია კვების ხარჯი სკოლას აკლდება, მაგრამ მეხუთე კლასის ჩათვლით ფაქტობრივად უფასოდ იკვებებოდნენ ბავშვები ჩვენთან და მე-5 კლასის ზემოთ ვინმეს თუ კვებაზე ჰქონდა დადებული ხელშეკრულება, ეს უკვე მოხსნილია. ჩვენ ქირით ვართ სკოლაში და არავის არ გაუჩერებია ჩვენთვის იჯარის გადასახადი, რომელშიც საკმაოდ სოლიდურ თანხას ვიხდით.“ -  განმარტა „იბერია“-ს დირექტორმა ნინო ზაქარეიშვილმა.

ვინ არეგულირებს კერძო სკოლებში სწავლის გადასახადის კორექტირებასთან დაკავშირებულ პროცესებს, ამასთან დაკავშირებით „კომერსანტი“ განათლების სამინისტროს დაუკავშირდა, სადაც აცხადებენ, რომ მათ უწყებას, კერძო სკოლასა და მშობელს შორის ფინანსური ვალდებულებების რეგულირებაში ჩარევის იურიდიული უფლება არ აქვს. 

„კერძო სკოლა თვითონ არეგულირებს სწავლის საფასურს. განათლების სამინისტროს ჩარევა შეუძლია მხოლოდ მაშინ, თუ სასწავლო პროცესში  სკოლას დარღვევა აქვს და ეროვნულ სასწავლო გეგმას უხვევს. ასეთი პრობლემა თუ შეიქმნა და ტრანსპორტის თანხის გადახდა მაინც უწევს მშობელს ამ პერიოდში, მას შეუძლია უჩივლოს, ეს უკვე მოლაპარაკების თემაა. კერძო სკოლის ფინანსურ ანგარიშსწორებაში სამინისტრო არ მონაწილეობს“— აცხადებენ განათლების სამინისტროში. 

მარიამ მორგოშია