თეკლე ორთოიძე, კომპანიაში „მეღვინეობა ხარება“, კონკურსის გავლის შემდეგ, ჯერ დაასაქმეს და შემდგომ პირველივე სამუშაო დღეს გაათავისუფლეს. მიზეზი თეკლეს შეზღუდული შესაძლებლობა აღმოჩნდა. ამის შესახებ ინფორმაციას არასამთავრობო ორგანიზაცია პარტნიორობა ადამიანის უფლებებისთვის ავრცელებს. იურიდიული დახმარებისთვის თეკლემ სწორედ მათ მიმართა, რის შემდეგაც ორგანიზაციამ ქალის შშმ ნიშნით დისკრიმინაციული ფაქტის დადგენის მიზნით ღვინის კომპანიის მხრიდან, სახალხო დამცველის აპარატს მიმართა. როგორც ირკვევა თეკლე ორთოიძემ დამსაქმებელს მიაწოდა ინფორმაცია, რომ მარცხენა ხელზე აქვს სამეანო დამბლა, რის გამოც ხელფასის დარიცხვისას ეკუთვნის საგადასახადო შეღავათი. აღნიშნულის შემდგომ, განმცხადებელს უთხრეს, რომ მას კომპანია უნდა დაეტოვებინა.
„ჩემი სურვილი იყო „მეღვინეობა ხარება“- ს და მათ თანამშრომლებს დაენახათ, რომ არასწორად მოიქცნენ, კანონი დაარღვიეს და დისკრიმინაციის ფაქტის დადგენის შემდეგ თუ ისინი ამას დაინახავენ ეს იქნება გამარჯვება. მინდა, რომ დაინახონ და ასე არასდროს მოექცნენ სხვას“- ამბობს თეკლე არასამთავრობო ორგანიზაციასთან ინტერვიუში.
როგორც არასამთავრობო ორგანიზაციის მიერ გავრცელებულ ინფორმაციაშია ნათქვამი, „მეღვინეობა ხარებაში“, მიიჩნევენ, რომ თეკლეს დასაქმება, მისი ჯანმრთელობის მდგომარეობის პირობებში, კომპანიის მხრიდან იქნებოდა უპასუხისმგებლო მოქმედება.
მათივე ინფორმაციით „მეღვინეობა ხარება“-მ არც კი შეაფასა, რეალურად შეუშლიდა თუ არა ხელს შეზღუდული შესაძლებლობის სტატუსი დასაქმებულს დაკისრებული მოვალეობის შესრულებაში.
საქმეში არსებული გარემოებებისა და მტკიცებულებების გაანალიზების საფუძველზე, სახალხო დამცველი კომპანიას მიუთითებს, რომ განმცხადებლის უფლებაში ჩარევის საფუძველს რეალურად წარმოადგენდა მისი შეზღუდული შესაძლებლობა, რომელიც მიუღებელი აღმოჩნდა დამსაქმებლისთვის. კომპანიამ ვერ წარმოადგინა არგუმენტაცია, რომელიც სახალხო დამცველს დაარწმუნებდა რომ დისკრიმინაციას არ ქონდა ადგილი.
შესაბამისად, 2020 წლის 17 ნოემბერს, საქართველოს სახალხო დამცველმა შეზღუდული შესაძლებლობის ნიშნით პირდაპირი დისკრიმინაცია დაადგინა და შესაბამისი რეკომენდაციით მიმართა კომპანიის „მეღვინეობა ხარებას“ დირექტორს, ალექსანდრე ხარებავას რათა კომპანიამ საქმიანობა წარმართოს თანასწორობის პრინციპის დაცვით.
„...მომავალში არ დაუშვას შრომით ურთიერთობებში შეზღუდული შესაძლებლობის ან სხვა ნიშნით დისკრიმინაციული მოპყრობა და უზრუნველყოს თანასწორობის პოლიტიკის გატარება შპს „მეღვინეობა ხარებას“ შიდა სამართლებრივი აქტებისა და სხვა დოკუმენტების „დისკრიმინაციის ყველა ფორმის აღმოფხვრის შესახებ“ საქართველოს კანონის შესაბამისად და მომავალში საქმიანობა წარმართოს თანასწორობის პრინციპის დაცვით“ - იხილეთ სახალხო დამცველის რეკომენდაცია სრულად.