ტურისტული ატრაქცია Dinner In The sky Goergia, იგივე „ვახშამი ცაში” რამდენიმე თვეა დახურულია. საქართველოს ერთ-ერთი ყველაზე ძვირადღირებული რესტორანი რეგულაციებისა და შეკრებების აკრძალვის გამო ოპერირების განახლებას ვერ ახერხებს, თუმცა როგორც კომპანიაში „კომერსანტს“ განუცხადეს, ფრანჩიზული რესტორანი გახსნილია იტალიაშიც, ბელგიაში, ბრაზილიასა და თითქმის ყველა ქვეყანაში, მიუხედავად ეპიდსიტუაციის სიმძიმისა.
„ჩვენ რამდენიმე თვეა დავხურეთ რესტორანი და არც გაგვიხსნია წელს, თუმცა სექტემბერში ვაპირებდით მუშაობის განახლებას, მაგრამ covid 19-ის შემდეგი ტალღა დაიწყო და ახლა მოლოდინის რეჟიმში ვართ. დაინტერესება ადგილობრივების, თუ საქართველოში მცხოვრები უცხოელების მხრიდან დღემდე ძალიან დიდია, ისინი გველოდებიან როდის გაიხსნება ჩვენი ატრაქცია. პანდემიის გამო, ველოდებოდით მთავრობის გადაწყვეტილებას, რესტორნების გახსნის ნებართვაზე, შემდეგ მეორე ტალღამ გამოიწვია ის, რომ შეკრებები და ღონისძიებები აიკრძალა საქართველოში. ჩვენი ყველაზე დიდი პრობლემა დისტანციაა. ყველა რეგულაციას ვაკმაყოფილებდით, თუმცა ჩვენს რესტორანში 22 ადგილია და მომსახურება საკმაოდ ძვირადღირებული, შესაბამისად ადამიანების რაოდენობის შემცირება ჩვენც ძალიან ძვირი დაგვიჯდებოდა. საკმაოდ რთულია ბიზნესისთვის მსგავს შეღავათზე წასვლა, ჩვენ სრულად დატვირთული მაგიდა გვჭირდება.
Dinner in the sky არაერთ ქვეყანაში უკვე გაიხსნა პანდემიის მიუხედავად - ბელგიაში, ბრაზილიაში, მექსიკაში, მათ შორის იტალიაში. თუმცა, საართველოში სამწუხაროდ გაჩერებულბი ვართ. იტალიაშიც კი ერთერთი პირველები ვიყავით, სადაც ეს ბიზნესი ამუშავდა,“ - განმარტავს Dinner In The sky-ს წარმომადგენელი.
როგორც ჩანს, მიუხედავად არსებული სიტუაციისა, ბელგიური კომპანიის სათავო ოფისში ქართული ფრანჩიზის შენარჩუნებას კითხვის ნიშნის ქვეშ არ აყენებენ, რაგან რესტორანი ძალიან დიდი ინტერესითა და პოპულარობით სარგებლობს.
„2020 წელი ყველასთვის მძიმე იყო, ვფიქრობთ საზღვრები გაიხსნება, ტურისტები დაბრუნდებიან და უფრო მეტად პოპულარული იქნება ჩვენი რესტორანი. იმდენად დიდი ინტერესია ხალხისგან ჩვენს მიმართ, რომ ბაზრის დატოვების სურვილი არ გვაქვს. ისნი ნომრებს გვიტოვებენ და გვლოდებიან, როდის გავიხსნებით. ნამდვილად ვრჩებით საქართველოში,“ - ამბობს “კომერსანტთან“ Dinner in the sky-ს წარმომადგენელი.
ტურისტული ატრაქცია - Dinner in the Sky მსოფლიოს 70 ქვეყანაში ოპერირებს. პლატფორმა სპეციალური ამწეთი 50 მეტრის სიმაღლეზეა ჩამოკიდებული, სადაც სტუმრები დაკიდებულ მაგიდასთან სადილობენ.
მარიამ მორგოშია