„იმ პრობლემებიდან გამომდინარე რაც სასტუმროებს დღეს აქვთ, მთავარია სწორი საგადასახადო სისტემის შექმნა. დიფერენცირებული საგადასახადო სისტემა თუ არ შევიმუშავეთ ასე ბიზნესი არ განვითარდება“, - ამის შესახებ „კომერსანტს“ ბიზნესმენმა თემურ ჭყონიამ განუცხადა.
თემურ ჭყონიას განმარტებით, მთავრობამ ყველაზე დაზარალებული სექტორისთვის, მათ შორის სასტუმროებისთვის, შეღავათების და გადავადებების დაწესების ნაცვლად, გადასახადების შემცირება უნდა მოახდინოს.
„სასტუმრო Kobuleti Georgia Palace Hotel & Spa შიდა ტურიზმზე არის გათვლილი, ივლის-აგვისტოსა და სექტემბრის შუა რიცხვებამდე 60-70% ადგილობრივი დამსვენებლები გვყავდა. ის საერთაშორისო სტანდარტები რაც სასტუმროს აქვს, მომხმარებელი აფასებს და წლების განმავლობაში მუდმივი დამსვენებლებიც გვყავს. ყველა რეგულაციები დავიცავით და შავიზღვისპირეთში ყველაზე დაცული შემოსაზღვრული ტერიტორია გვაქვს. 15 ივნისს გავიხსენით და ჯერჯერობით ხალხი საკმარისად არის, მოლოდინიც კარგი გვაქვს. რაც შეეხება ფასებს, განსაკუთრებული ცვლილება არ ყოფილა, ფასების ცვლილება დამოკიდებულია ბაზარზე არსებულ მოთხოვნაზე.
იმ პრობლემებიდან გამომდინარე რაც სასტუმროებს დღეს აქვთ, მთავარია სწორი საგადასახადო სისტემის შექმნა. შეღავათები და გადავადებები კი არ უნდა დააწესონ, არამედ რამდენიმე წლის განმავლობაში გადასახადების შემცირება უნდა მოხდეს. ყველაფერი იმაზე უნდა იყოს მორგებული, რომ არც სახელმწიფო და არც კერძო სექტორი არ დაზარალდეს. ამისათვის საჭიროა სწორი საგადასახადო სისტემის შემუშავება, ის უნდა იყოს დიფერენცირებული, მაგალითად შავიზღვისპირეთში სხვა საგადასახადო სისტემა იყოს და მთაში სხვა. დიფერენცირებული სისტემა თუ არ შევიმუშავეთ ასე ბიზნესი არ განვითარდება, ერთიანი საგადასახადო სისტემა იმის ბრალია, რომ ადამიანებს არ შეუძლიათ მენეჯმენტი და ბიზნესის სწორი მართვა. შეღავათები და მსგავსი სისულელები არ უნდა იყოს, უნდა მოხდეს გადასახადების შემცირება, მაშინ არც სახელმწიფო დაზარალდება და არც ბიზნესი“, - განაცხადა თემურ ჭყონიამ.
ნინო თამაზაშვილი