ყველას, ვინც სტრესს განიცდის და შიმშილს გრძნობის ჩახშობას ცდილობს, ნებისმიერი ქალაქის ქუჩაში სწრაფ კვების ობიექტებს ადვილად იპოვის. მეცნიერებმა „ფასტ-ფუდი“ მენიუს და რეცეპტების ბოლო ათწლეულების მანძილზე ცვლილების ტენდენცია შეისწავლეს და შემაშფოთებელ დასკვნამდე მივიდნენ. ბოლო პერიოდში ფიტნესის და დიეტების საყოველთაო გატაცების მიუხედავად, სწრაფი კვების რესტორნები არსად გამქრალა და ათწლეულების მანძილზე არსებობას ჯიუტად განაგრძობენ.
სოციოლოგიური კვლევების ინსტიტუტის Forsa-ს ინფორმაციით, გერმანიის ყოველი მეოთხე მოქალაქე როგორც მინიმუმ კვირაში ერთხელ „ფასტ-ფუდების“ მომსახურეობით სარგებლობს. თანაც სწრაფი კვების პროდუქტების ხარისხი ბოლო წლების მანძილზე არათუ არ გაუმჯობესდა, არამედგაუარესდა.
ბოსტონის უნივერსიტეტის მკვლევარებმა სწრაფი კვების 1000-ზე მეტი კერძი შეისწავლეს, მათ შორის ისეთი ცნობილი ტრანსნაციონალური ბრენდების როგორც McDonalds და KFC-ია. მათ ულუფების ზომები, კალორიულობა და მარილის შემცველობა გააანალიზეს. განსაკუთრებული ყურადღება გარნირებს და დესერტებს დაეთმო. მკვლევარებმა მიღებული მონაცემები1980-იან, 1990-იან და 2000-იან წლებთან შეადარეს. აღმოჩნდა, რომ წლების მანძილზე ყველა შესწავლილი პარამეტრების ხარისხი გაუარესდა. ეს განსაკუთრებით გარნირებს და დესერტებს ეხება, რომლებიც ძირითად კერძებად არ ითვლება, თუმცა მათი ულუფები საგრძნობლად გაიზარდა. მეცნიერების აზრით, ეს გამოწვეულია იმით, რომ როგორც წესი, უფრო დიდ კერძში მომხმარებლები მეტ თანხას იხდიან და უფრო მონდომებით ყიდულობენ. შედეგად, კერძები უფრო კალორიული გახდა - მაგალითად, წინა ათწლეულებთან შედარებით ზოგიერთი კერძის კალორიულობა 60%-ით გაიზარდა. ასევე იზრდება მარილის შემცველობაც, ზოგ შემთხვევაში ზრდამ 14% შეადგინა.
თუმცა აღსანიშნავია, რომ 10 „ფასტ-ფუდიდან“ 4-ის კერძებში ადამიანისთვის სასარგებლო კალციუმის და რკინის შემცველობაც გაიზარდა, რაც პოზიტიური მოვლენაა.
მთლიანობაში კერძების მრავალფეროვნება 200%-ით გაიზრდა - საშუალოდ, ბაზარზე წლის მანძილზე 23 ახალი კერძი ჩნდება. თუმცა, როგორც წესი ახალი პროდუქტები უკვე არსებულ, კლასიკური კერძებზე ბევრად უფრო მავნეა.
თუმცა ფაქტია, რომ ამას ვერავითარი კვლევა და მეცნიერების მხრიდან მკაცრი კრიტიკა ვერაფერს შეცვლის მანამ, სანამ მომხმარებლები მზად არიან მავნე კერძები იყიდონ.
წყარო welt.de
მოამზადა თენგიზ აბლოთიამ