აშშ-ს საპრეზიდენტო არჩევნებს ბევრ ქვეყანაში თვალს ყურადღებით ადევნებენ. ზოგიერთს ბაიდენის, ზოგიერთს კი ტრამპის გამარჯვება აწყობს.
ევროკავშირი
სხვებზე მეტად ევროპელები ნერვიულობენ. ამ კონტინენტზე ისე, როგორც არსად, ბაიდენის გამარჯვება სურთ, რადგან ტრამპმა თავისი პრეზიდენტობის 4 წლის მანძილზე ევროპელ ლიდერებს ბევრი უსიამოვნება მოუტანა. კერძოდ, ის ნატო-ს ქმედითუნარიანობას ეჭვქვეშ აყენებდა, ამბობდა, რომ ამერიკა ამ ბლოკის ფარგლებში თავის ვალდებულებებს არ შეასრულებს და ევროპელებისგან სამხედრო ხარჯების ზრდას მოითხოვდა. ის ასევე ევროპას ირანის საკითხში დაუპირისპირდა, პარიზის კლიმატური შეთანხმებიდან გავიდა, ევროკავშირთან სატარიფო ომი გააჩაღა და ა.შ.
ევროპა ბაიდენის გამარჯვებას მოუთმენლად ელოდება. შესაძლოა დემოკრატის პრეზიდენტის პირობებში ამერიკის და ევროპის ურთიერთობა იდეალური ვერ იქნება, თუმცა, რიტორიკა ნამდვილად შერბილდება.
რუსეთი
კრემლში ბაიდენი-პრეზიდენტისგან არაფერს კარგს არ ელიან. ჯერ კიდევ ტრამპის დროს, პუტინისადმი მისი კარგი პიროვნული დამოკიდებულების მიუხედავად, ურთიერთობები ქვეყნებს შორის უკიდურესად გაუარესდა. ბაიდენის მოსვლით არაფერი შეიცვლება, ყოველ შემთხვევაში უკეთესობისკენ. დემოკრატი კანდიდატი, რომელიც მკვეთრი ანტირუსული განცხადებებით გამოირჩევა, გაპრეზიდენტების შემთხვევაში არსებულ კურსს აუცილებლად შეინარჩუნებს. მეტიც, ის შესაძლოა გამკაცრდეს, კერძოდ, უკრაინისთვის სამხედრო დახმარება გაიზარდოს.
კრემლში ბაიდენის გაპრეზიდენტებას განსაკუთრებული ენთუზიაზმის გარეშე ელიან. მათ ესმით, რომ 2016 წელს რუსეთის მხრიდან ტრამპის დახმარებას და ჰილარი კლინტონის დისკრედიტაციის კამპანიაში მონაწილეობას კიდევ დიდხანს არ აპატიებენ.
ახლო აღმოსავლეთი
ტრამპის ხელმეორედ არჩევის შემთხვევაში ის თავის პოლიტიკას ამ რეგიონში განაგრძობს. კერძოდ, მკაცრ მიდგომას ირანისადმი. ბაიდენი მის ვიცე-პრეზიდენტობის პერიოდში მიღწეული ბირთვული შეთანხმების აღდგენას გეგმავს, ოღონდ ირანისთვის გამკაცრებული პირობებით. ასეა თუ ისე, ბაიდენის პრეზიდენტობა იძლევა შანსს, რომ ის ფსონს მოლაპარაკებებზე და არა ზეწოლაზე გააკეთებს.
დემოკრატი-კანდიდატის გამარჯვებას მოუთმენლად პალესტინაშიც ელიან. ტრამპი ცალსახად ისრაელის მხარეზეა, ბაიდენი კი უფრო დაბალანსებული მიდგომის მომხრეა.
ჩინეთი
ტრამპის დროს აშშ-ს და ჩინეთის ურთიერთობები უკიდურესად დაიძაბა და მისი პრეზიდენტად დარჩენა პეკინისთვის კატასტროფის ტოლფასი იქნებოდა. თუმცა, საამური ცხოვრება ჩინელებს არც ბაიდენის პირობებში ელის. პრობლემა იმაშია, რომ დემოკრატებს და რესპუბლიკელებს შორის კონსენსუსი ჩამოყალიბდა, რომ ჩინეთის მიმართ მიდგომა უნდა გამკაცრდეს, განსაკუთებით, სავაჭრო საკითხებში.
შესაძლოა, ბაიდენი ჩინეთისთვის უარესიც აღმოჩნდეს. დემოკრატმა-კანდიდატმა უკვე განაცხადა ევროპასთან თანამშრომლობის გააქტიურებაზე და ეს პეკინისთვის კარგი ამბავი არაა ევროპაში ზრდადი ანტიჩინური განწყობების ზრდის გათვალისწინებით.
იაპონია და სამხრეთ კორეა
ორივე ქვეყნის მთავრობას დონალდ ტრამპის ადმინისტრაციასთან ნაყოფიერი თანამშრომლობის გამოცდილება აქვს, თუმცა, პრეტენზიებიც არის. მაგალითად, სამხრეთ კორეა უკმაყოფილოა ტრამპის მხრიდან ჩრდილოეთ კორეელი დიქტატორისადმი დამოკიდებულების შერბილებით. სავარაუდოდ, ბაიდენი ამ მხრივ გაცილებით უფრო ხისტი იქნება. თუმცა, ამ საკითხის გარდა, ზოგადად, ტოკიოსა და სეულისთვის საპრეზიდენტო არჩევნების შედეგებისგან განსაკუთრებით არაფერი იცვლება.
welt.de
თენგიზ აბლოთია