კვირას, დილის 4 საათზე, სომხეთს და აზერბაიჯანს შორის მორიგი ომი დაიწყო.
საომარი შეტაკებები ორ ქვეყანას შორის მუდმივად ხდება იმის შემდეგ, რაც 90-ანი წლების დასაწყისში ხანგძლივი და სისხლისმღვრელი ომის შედეგად, აზერბაიჯანის შემადგენლობაში მყოფი მთიანი ყარაბახის ტერიტორია სომხეთმა დაიკავა.
1994 წელს მხარეებმა ზავი გააფორმეს, თუმცა ის მუდმივად ირღვევა. ბოლოს ეს ივლისში მოხვდა, როდესაც 2 აზერბაიჯანელი ჯარისკაცი დაიღუპა, ხოლო რამდენიმე დაიჭრა. როგორც წესი, მსგავსი ლოკალური შეტაკებები ხდებოდა საზღვრისპირა რეგიონებში და რამდენიმე დღეში სრულდებოდა. თუმცა, დღეს ეს ასე არაა.
აზერბაიჯანის ჯარმა სადავო ტერიტორიას მასიურად შეუტია, სომხეთში, აზერბაიჯანში და თავად ყარაბახში სამხედრო მდგომარეობა და საყოველთაო მობილიზაცია გამოცხადდა.
ეს ომი სავსებით მოსალოდნელი იყო - საქმე იმაშია, რომ ბოლოდროინდელი სასაზღვრო ინციდენტის შემდეგ აზერბაიჯანს მხარდაჭერა თურქეთმა გამოუცხადა - პრეზიდენტის რეჯეპ ტაიპ ერდოგანის თქმით, სომხეთს ნებისმიერი თავდასხმისთვის დიდი ფასის გადახდა მოუწევს.
აი უკვე 30 წელია აზერბაიჯანი თურქეთის ერთგული მოკავშირეა, ანკარა კი მას თანამედროვე შეიარაღებას აწვდის.
თუმცა, სამხრეთ კავკასიაში ერდოგანის ჰეგემონიზმს სერიოზული მოწინაამღდეგე ჰყავს - რუსეთი, რომელსაც სომხეთის ტერიტორიაზე სამხედრო ბაზები აქვს. თურქეთი უკვე წლების მანძილზე ეპაექრება მოსკოვს ლიბიაში და სირიაში, შესაბამისად, არაა გამორიცხული, რომ ერდოგანმა იგივე კავკასიაშიც გაიმეოროს.
მოსკოვის პირველი რეაქცია საკმაოდ სუსტი იყო - იმის მიუხედავად, რომ ერევანი მოსკოვის სამხედრო მოკავშირეა, კრემლი, როგორც ჩანს, კონფლიქტში ჩარევის დიდ სურვილს არ ავლენს.
თანაც პუტინს არ სურს ომი თურქეთთან და მისი ინტერესია სომხეთს და აზერბაიჯანს შორის არსებული მტრობის შენარჩუნება. ამიტომაც, ის იარაღს ორივე მხარეს მიაწვდის.
თავის მხრივ ერდოგანი ფსონს დაშინებაზე დებს. ძალისმიერი ჩარევა ყარაბახის კონფლიქტში მისი მხრიდან ევროპისთვის ძალის დემონსტრირება იქნება. უკვე არის ინფორმაცია, რომ აზერბაიჯანში თურქეთის მიერ კონტროლირებადი 1000-მდე სირიელი დაქირავებული გამოჩნდა - ამბობენ, რომ ყოველ მათგანს თვეში 2500 დოლარს უხდიან.
სირიული მას-მედიას ინფორმაციით, პირველი ჯგუფი აზერბაიჯანში ჯერ კიდევ 1 თვის წინ ჩავიდა, ახალ ომამდე დიდი ხნის წინ.
სექტემბრის დასაწყისში სომხეთის საგარეო საქმეთა სამინისტრომ თურქეთი აზერბაიჯანში „უცხოელი მებრძოლების“ შეყვანაში დაადანაშაულა. უწყების ხელმძღვანელის ზოგრაბ მნაცაკანიანის თქმით, ეს იყო ძალის გამოყენების პირდაპირი მუქარა.
დღეს ორ ქვეყანას შორის პირდაპირი და ღია ომი მიმდინარეობს.
სოციალურ ქსელებში გავრცელდა ინფორმაცია, რომ კვირას შეტაკებების დროს 20 სირიელი დაქირავებული დაიღუპა, თუმცა ეს ცნობები ოფიციალურად არავის დაუზუსტებია, მათ შორის არც სომხურ მხარეს.
სირიაში, ოპოზიციის ბასტიონში, იდლიბის რეგიონში, დაღუპულების სახელები უკვე გამოქვეყნდა.
ადგილობრივი ჟურნალისტების თქმით, ამჟამად მებრძოლების აზერბაიჯანში სრულმასშტაბიანი გადასროლისთვის მზადება მიდის.
„ბოლო პერიოდში ლიბიაში და სირიაში მებრძოლებს ხელფასები მნიშვნელოვნად შეუმცირეს. ასე თურქეთი ცდილობს მათ აზერბაიჯანში გამგზავრება აიძულოს“ - აცხადებს ანონიმური წყარო.
Die welt
მოამზადა თენგიზ აბლოთიამ
მთიანი ყარაბაღი
