ამერიკელი მილიარდერები გადასახადებს თითქმის არ იხდიან - ასე დასკვნის გაკეთება შეიძლება კონფიდენციალური მონაცემების გაჟონვის შედეგად, წერს გამოცემა Die Welt.

ეს აღშფოთებას იწვევს, თუმცა, კითხვებსაც ბადებს - ვინ დგას ამ გაჟონვის უკან? იქნებ ისევ რუსი ჰაკერები?

შტატებში მართლაც სენსაცია მოხვდა  - თუ გამოქვეყნებული მონაცემები რეალობას შეესაბამება, ეს აღმაშფოთებელია - 2014-2018 წლებში 25-მა ამერიკელმა მილიარდერმა ფედერალური გადასახადის სახით შემოსავლის მხოლოდ 3,4% გადაიხადეს, რაც რამდენჯერმე ნაკლებია რიგითი ამერიკელების მიერ საკუთარი ხელფასებიდან გადახდილ გადასახადებზე.

საიტ ProPublica-ს მონაცემებით, Amazon-ის დამფუძნებელი, მსოფლიოს უმდიდრესი ადამიანი ჯეფ ბეზოსი თვეების მანძილზე გადასახადებს საერთოდ არ იხდიდა. იგივეს ილონ მასკიც ახერხებდა, ხოლო უორენ ბაფეტი, რომელიც მდიდრებისთვის გადასახადების მომატების მომხრეა, თავად საგადასახადო სამსახურში თავისი შემოსავლის მხოლოდ 0,1%-ს რიცხავდა.

დღეს ყველას ერთი კითხვა აქვს - როგორ გახდა ეს შესაძლებელი? როგორ მოახერხეს ტოპ-ბიზნესმენებმა წლების მანძილზე მილიარდობით გადასახადების დამალვა მაშინ, როდესაც საგადასახადო სამსახური რიგით ამერიკელებს რამდენიმე ასეული დოლარის დავალიანებასაც კი არ პატიობს?

თუმცა, მეორე პრობლემა არავის აწუხებს - საიდან და როგორ გაჟონა ამ ინფორმაციამ?

ცნობილი ამერიკელი ბლოგერი და ეკონომისტი ტაილერ კოენი მიიჩნევს, რომ ეს დაგეგმილი აქცია იყო.

„მე უარესის მოლოდინში ვარ. წარმოუდგენელია, რომ აშშ-ის ფინანსთა სამინისტროს ერთ არაკეთილსინდისიერ თანამშრომელს ამდენი კონფიდენციური ინფორმაციის თავმოყრა და ღილაკის ერთი დაჭერით გაზიარება შეეძლო. ჩემი აზრით ამ დაგეგმილი აქციის უკან რუსეთი დგას“,  - წერს ის.

შესაძლოა, ვინმეს ეს შეთქმულების თეორიად მოეჩვენოს, მაგრამ თავად საიტი  ProPublica, რომელმაც ეს სენსაციური ინფორმაცია გამოაქვეყნა, ასეთ შესაძლებლობას არ გამორიცხავს.

„შესაძლოა ინფორმაცია სახელმწიფო სუბიექტმა გაავრცელა, რომელიც ამერიკის ეროვნული ინტერესებისთვის ზიანის მიყენებას ცდილობს. ბოლო პერიოდში აშშ-ის სახელმწიფო უწყებები რუსი ჰაკერების შეტევის მსხვერპლი ხშირად ხდებიან“, - მიიჩნევენ გამოცემის რედაქციაში.

ამის მიუხედავად, ProPublica-ში მიიჩნევენ, რომ წყაროს გაურკვევლობის მიუხედავად, მათ ინფორმაცია გამოაქვეყნეს, რადგანაც ამერიკელმა ხალხმა თავისი ბიზნეს-ელიტის შესახებ სიმართლე უნდა იცოდეს და ეს უფრო მნიშვნელოვანია საკითხია, ვიდრე გაჟონვის წყაროს დადგენა.

ჯერ კიდევ 2020 წლის მარტში ჰაკერებმა, სავარაუდოდ რუსეთის მთავრობის მხარდაჭერით, აშშ-ის საგადასახადო სამმართველოს ქსელში შეაღწიეს. მაშინ გამომძიებლებმა განაცხადეს, რომ კონფიდენციურ მონაცემთა მოპარვის ნიშნები არ დაფიქსირებულა.

შესაძლოა, ამჟამინდელი გაჟონვის წყარო სწორედ ის კიბერ-შეტევა იყო.