ეკონომიკის ნაწილობრივ გახსნასთან ერთად, ახალი კორონავირუსით გამოწვეული ნეგატიური შედეგების დათვლა ბიზნესმა უკვე დაიწყო. დაიწყეს იმაზე ფიქრიც თუ , როგორ გამოვიდნენ კრიზისიდან მინიმალური ზარალით. სწორედ ამიტომ "კომერსანტი" დაინტერესდა რა საფასო პოლიტიკით დაბრუნდნენ რითეილ კომპანიები ბაზარზე და რა მდგომარეობა დახვდებათ ახლად გახსნილ მოლებში მომხმარებლებს.
Gtex ჯგუფის ხელმძღვანელმა გიორგი ბასილაძე აცხადებს, რომ კომპანია ზარალზე მუშაობს. ბიზნესმენი ამბობს, რომ აქტივობა მაღალია, თუმცა განვლილი პერიოდის გამო რითეილ კომპანიები, რთულ მდგომარეობაში არიან.
„იქიდან გამომდინარე, რომ ეს პერიოდი ჩავარდნილი იყო ცუდ მდგომარეობაში ვართ და არსებული ნაშთის გასწორება გვიწევს. რეალიზაციაა კუთხით ნორმალური მდგომარეობაა, თუმცა იქედან გამომდინარე რომ დიდი ფასდაკლებები გვაქვს არამომგებიანი რეალიზაციაა. პირველი კვირა მოჩვენებითი იყო. ამდენი ხანი დაკეტილები რახან ვიყავით აქტივობა მაღალი იყო, თუმცა მეორე-მესამე კვირას იქნება ნამდვილი თებერვალი, კოვიდის გავლენებით“, - განაცხადა გიორგი ბასილაძემ.
ფასდაკლება ძირითადად ზამთრის კოლექციას ეხება. როგორც Gtex ჯგუფის ხელმძღვანელი ამბობს, კომპანია კოლექციის განახლებისგან დროებით თავს იკავებს, რადგან კომპანია იმპორტის დღგ-ს წინასწარ გადახდას ვერ შეძლებს.
„ახალი კოლექციები ჯერჯერობით არ მიგვიღია. ახალ კოლექციას როდესაც ვიღებთ 5 დღის ვადაში გვიწევს დღგ-ს გადახდა. რამდენჯერ ვთხოვეთ ეკონომიკურ გუნდს, რომ საავანსოდ გადახდილი დღგ იქნებ ამ რთულ პერიოდში წინასწარ გადახდა გადაევადებინათ, მაგრამ არაფერს აკეთებენ. შესაბამისად გვიწევს თავის არიდება ახალი საქონლის შემოტანისგან. ახალი საქონელი რომ შემოვიტანოთ, 5 დღეში დღგ გვექნება გადასახდელი, რასაც ვერ გადავიხდით. ამიტომ მაქსიმალურად ვწელავთ დროს, თუ ახალ კოლექციას ჩვეულებრივ პირობებში ამ კვირაში მივიღებდით შექმნილი მდგომარეობიდან გამომდინარე 3-4 კვირით გადავწიეთ, ასევე შევამცირეთ მოცულობებიც. შესაბამისად ჩვენი სახელმწიფოც ნაკლებ გადასახადებს მიიღებს, რასაც აკეთებენ იმას მოიმკიან“, - აცხადებს გიორგი ბასილაძე .
მომხმარებლების მაღალ აქტივობაზე საუბრობს, გალერია თბილისის დირექტორი ნიკა ცინცაძემ, რომელიც ვარაუდობს, რომ საზოგადობრივი ტრანსპორტის მუშაობის დაწყებასთან ერთად მოლების დატვირთვა კიდევ უფრო გაზირდება. ცინცაძე „კომერსანტთან„ საუბარში ასევე აღნიშნავს, რომ მიმდინარე თვეს ყველა მოიჯარეს გადასახადი დაუკორექტირდება.
„ჩვენ რეალურად ველოდებით თვის ბოლოს, რა დროსაც უკლებლივ ყველა მოიჯარეს ექნება შეღავათები. ჩვენ ვაკვირდებით პანდემიურ ვითარებას, სწორედ ამიტომ ვფიქრობთ, რომ შეღავათები მხოლოდ თებერვლის თვით არ შემოიფარგლება და კიდევ რადენიმე თვე გაგრძელდება. იმის გათვალისწინებით, რომ საზოგადოებრივი ტრანსპორტი არ მუშაობდა პირველი კვირა საკმაოდ კარგი იყო, მოლოდინი გვაქვს რომ დღეიდან დატვირთვა კიდევ უფრო გაიზრდება. ჩვენი გათვლებით, შემოსავლები რაც მოიჯარეებს უნდა მიეღოთ ისინი ამ შემოსავლებს იღებენ. რამდენიმე მოიჯარესთან ურთიერთობა დავასრულეთ, თუმცა ეს საიჯარო ფართის 3 პროცენტს შეადგენს. ჩვენი სტრატეგია არის, რომ შევიყვანოთ ისეთი ბრენდები, რომლებიც ქართულ ბაზარზე არ ოპერირებენ, იქედან გამომდინარე, რომ ვართ ყველაზე ცენტრალიზებული მოლი. სწორედ ამიტომ მიმდინარე წელს ამ კუთხით სიახლეები იქნება“, - განაცხადა ნიკა ცინცაძემ.