დიდი ბრიტანეთი, რომელიც ამჟამად ევროპული ოჯახიდან გამოსვლის პროცესშია, პოტენციურ სავაჭრო პარტნიორებთან ახალ მჭიდრო კავშირებს ამყარებს და ამრავალფეროვნებს უკვე არსებულ ურთიერთობებს. როგორც ცნობილია, საქართველო დიდ ბრიტანეთთან თავისუფალი სავაჭრო ურთიერთობით სარგებლობს, როგორ შეიძლება ბრექსიტის შემდეგ საქართველომ ეს შეთანხმება საექსპორტო პროდუქციის დივერსიფიცირებისთვის გამოიყენოს და რა მოლოდინები აქვთ ბრიტანეთში მცხოვრებ ქართველებს?
„კომერსანტი“ ბრიტანეთში მოღვაწე კიდევ ერთ ქართველ ბიზნესმენს, ბაჩი გაბუნიას ვაჭრობაზე, ბრიტანეთში ქართული პროდუქციისადმი განსაკუთრებულ მოთხოვნებზე და ბრიტანელი ბიზნესმენების განწყობაზე ესაუბრა. ამავდროულად 20 წლიანი საქმიანობის შემდეგ, ბიზნესმენმა ბრიტანულ-ქართულ სავაჭრო პალატასთან ერთად ბრიტანულ-ქართული სავაჭრო ჰაბი შექმნა.
ბაჩი გაბუნიას თქმით, საქართველოს აქვს უნიკალური შესაძლებლობა გახდეს დიდი ბრიტანეთის ერთ-ერთი უმსხვილესი სავაჭრო პარტნიორი, რადგან გარდა რესურსებისა, ლარისა და ფუნტის მიმართება ქართველი მეწარმისთვის ბრიტანულ ბაზარს მომგებიანს ხდის.
„მოგეხსენებათ, რომ ბრიტანეთი ბრექსიტის ბოლო ეტაპებს გადის, რომელიც დეკემბრის ბოლოს დასრულდება, ხოლო იანვრის დასაწყისში ბრიტანეთი ევროკავშირის წევრი აღარ იქნება. ეს დასრულებული ურთიერთობა დღესდღეობით იქამდე მიდის, რომ ბრიტანეთი და ევროპა ვერ შეთანხმდა საქონლის ბრუნვის კოდირების და განბაჟების სისტემის შესახებ, რაც საქართველოს უნიკალურ პოზიციაში აყენებს ბრიტანულ -ქართული თავისუფალი ვაჭრობის გამოყენების ყველაზე დიდ და პერსპექტიულ ნაწილში. ეს საქართველოს აძლევს საშუალებას, რომ პოტენციურად ზოგიერთი ევროპული საქონელი, რაც ტრადიციულად ევროპიდან ჩამოდიოდა საქართველოში წარმოებული პროდუქციით ჩაანაცვლოს.
ბრექსიტის წყალობით და ქართულ-ბრიტანული თავისუფალი ვაჭრობის ხელშეკრულების დადებით, რომელიც საქართველოს ხელისუფლებამ დროულად დადო ბრიტანეთის სახელმწიფოსთან, ჩვენ ვართ ერთ-ერთი გამონაკლისები იმ ქვეყნების შორის, რომლებსაც ხელშეკრულება უკვე ხელთ აქვთ .
როგორ შეიძლება ბაზრის დივერსიფიცირება ორ ქვეყანას შორის? - ბიზნესმენი განმარტავს, რომ სხვა ქვეყნის ბაზრიდან ქართული პროდუქციის სახელით ინგლისში ბევრი პროდუქტი შემოდის, რადგან მოთხოვნა დიდია. ახლა კი ბრიტანეთის ბაზარს საქართველოში წარმოებული სოფლის მეურნეობის პროდუქტები, კონსერვები და სხვა პროდუქტები შეიძლება მიეწოდოს. ქართული ღვინო კი ბრიტანეთის მაღაზიებში ისედაც საკმაოდ მაღალ საფასო სეგმენტში გადის.
ბრიტანეთში ბიზნესმენები ცდილობენ იმ პროდუქციის ალტერნატივები მოძებნონ, რომლებიც მათ დღეს გააჩნიათ, რომ არ მოხდეს მათ სავაჭრო რესურსებში პროდუქციის დეფიციტი, ამიტომ დღესდღეობით საქართველოს აქვს უნიკალური საშუალება საქართველოში წარმოებული პროდუქციის დიდი ნაწილი ბრიტანულ ბაზარზე აღმოჩნდეს. ეს ეკონომიკის განვითარებას ხელს შეუწყობს, როგორც სოფლის ისე სხვა ტიპის წარმონაქმნებში იმდენად, რამდენადაც ლარისა და ფუნტის მიმართება საკმაოდ მომგებიანს ხდის ქართველი მეწარმისთვის ბრიტანულ ბაზარს.
ღვინის გარდა, ჩვენ შეგვიძლია დავიწყოთ ისეთი პროდუქციის ექსპორტი, როგორც არის, წყალი, წვენები როგორიც არის მურაბები. ამასთან ერთად, პოსტ-საბჭოთა სივრციდან გამოსულ ხალხს მოთხოვნა აქვთ მაგალითად მჭადის ფქვილზე და ბევრ ისეთ პროდუქციაზე, რომელიც არ არის საქართველოდან შემოსული, მაგრამ არის ქართულს მიმსგავსებული პროდუქტები და იწარმოება ლატვიაში, გერმანიასა და რუსეთში. ამ ჰაბის მეშვეობით უკვე ქართული პროდუქცია, სოფლის მეურნეობის თუ სხვა, შეგვიძლია წამოვიღოთ ბრიტანეთში.
ბრიტანეთი საკმაოდ დიდი და ნოყიერი ბაზარია, რომელსაც ნებისმიერი პროდუქცია, რომელიც საქართველოში არის წარმოებული შეუძლია, რომ ისე აითვისოს, რომ ბრიტანეთის ბაზარს არც კი შეეტყოს,“- განმარტავს ბაჩი გაბუნია.
ცოტა ხნის წინ ბრიტანეთის სავაჭრო პალატის ინიციატივით შეიქმნა ბრიტანულ-ქართული სავაჭრო ჰაბი, რომლის ფუნქციაა მცირე და საშუალო ბიზნესისთვის ხელშეწყობა ერთი ფანჯრის პრინციპით საქონლის ბრიტანეთის ბაზარზე გასატანად.
„ბრიტანულ ქართული სავაჭრო ჰაბი, რომელიც დაარსდა არც თუ ისე დიდი ხნის წინ, ძირითადად საქართველოსა და ბრიტანეთს შორის ვაჭრობის გაღრმავებას ემსახურება, ამ პროექტში გათვალისწინებული იყო ის, რომ მცირე და საშუალო ბიზნესებს მიეცეთ საშუალება მინიმალური ინვესტიციით მოხვდნენ ბრიტანულ ბაზარზე, სცადონ თავიანთი საშუალებები და კარგ შემთხვევაში ისინი დაიმკვიდრებენ თავს. თითოეულ ბიზნესმენს პროდუქციის წამოსაღებად ბრიტანეთის ბაზარზე სჭირდებოდა 4-5 კომპანიასთან ურთიერთობა, როგორიც არის გადამზიდი, შემდეგ საწყობში მიმღები, დამსაწყობებელი , შემდეგ დისტრიბუტორი და კონსულტანტი, რომელიც მარკეტინგულ კონსულტაციებს გაუწევს. ამ ხუთი ორგანიზაციის ცალ-ცალკე მუშაობის აუცილებლობა აღარ არის და იქნება ქართული კომპანიებისთვის ჩვენი, რომელიც ერთი ფანჯრის პრინციპით ქართულ კომპანიებს მოემსახურება და მათ შეეძლებათ მინიმუმ 1 ევროპალეტის წამოღება ბრიტანეთში მოსასინჯად.
პროდუქციას არ აქვს მნიშვნელობა - ეს შეიძლება იყოს საკვები, სუვენირული პროდუქცია, შეიძლება იყოს სოფლის მეურნეობის პროდუქცია. ჩვენ გვყავს დაინტერესებული კომპანიები, რომლებსაც ჰყავთ დამწყები დიზაინერები, რომლებსაც გააჩნიათ, როგორც ტანსაცმლის ასევე ფეხსაცმლის ხაზები, არანაირი შეზღუდვა არ არის , ეს არის ბიზნესი ნებისმიერი მიმართულებით,“ - ამბობს ჰაბის დამფუძნებელი.
ბაჩი გაბუნიას თქმით, უკვე პროექტში ჩართვის ბევრი მსურველია და მათი რიცხვი დღითიდღე იზრდება.
მარიამ მორგოშია
დიდი ბრიტანეთი
