საქართველოს ეროვნული ბანკის პრეზიდენტმა კობა გვენეტაძემ დღეს, 27 ოქტომბერს გამართულ ბრიფინგზე ქვეყანაში არსებული ინფლაციის შესახებ ისაუბრა და IMF-ის სტატისტიკასაც გამოეხმაურა. IMF-ის ოქტომბრის შეფასებით, საქართველო მსოფლიოში ინფლაციის სიდიდით მეთექვსმეტე ადგილზეა.
“არის ხოლმე კომენტარი, რომ საქართველოში ინფლაცია ერთ-ერთი ყველაზე მაღალია და რეგიონში თურქეთის შემდეგ მეორე ადგილზეა და მსოფლიოში მაღალ ინფლაციებს შორის მეთექვსმეტე ადგილზეა, მაგრამ მათ უნდა გაითვალისწინონ, რომ საქართველო არის ტურიზმზე დამოკიდებული ქვეყანა და ასეთი ქვეყნები იმის გამო, რომ პანდემიამ მობილობა სრულიად შეზღუდა, უფრო მეტად დაზარალდნენ, ვიდრე არატურისტული ქვეყნები.
თუ 2019 წელს ტურიზმის კონტრიბუცია მშპ-ში დაახლოებით 12% იყო, ეს 2020 წელს 2%-მდე შემცირდა, შესაბამისად საქართველოსთვის შოკი არის უფრო მაღალი და უფრო დიდი, ბევრ სხვა ქვეყანასთან შედარებით. ამავე დროს არ დაგვავიწყდეს, რომ საქართველოში ფისკალური დეფიციტი 9%-ზე მეტი იყო 2020 წელს, წელსაც საკმაოდ მაღლა ნარჩუნდება და აქედან გამომდინარე, როდესაც ვამბობთ, რომ ერთ-ერთი მაღალი ინფლაციაა, დიახ, არის ინფლაცია მაღალი, მაგრამ ამას აქვს წინაპირობა,”- ამბობს კობა გვენეტაძე.
საქსტატის მონაცემებით, სექტემბერში ინფლაცია, წინა წლის ანალოგიურ პერიოდთან შედარებით, 12,3%-ით გაიზარდა.