კლინიკებიდან გაწერილი პაციენტების უმეტესობა სამედიცინო პერსონალის მხრიდან არასათანადო მოპყრობასა და გაწეული სერვისის ხარისხზე ჩივის. მათზე, რომლებსაც  არ გაუმართლათ და საავადმყოფოში დაიღუპნენ, ოჯახის წევრები გაუგონარ ამბებს ჰყვებიან — რა გზა გაიარეს ინფიცირებულებმა  ჰოსპიტალიზაციიდან სიკვდილამდე.

ბევრი ისტორია ერთმანეთს ჰგავს. მიზეზი შეიძლება სხვადასხვაა, მაგრამ ამ ყველაფერს მივყავართ სისტემურ პრობლემამდე, რაც დღეს ჯანდაცვის მენეჯმენტშია. ადამიანები ხშირ შემთხვევაში იღუპებიან იმის გამო, რომ ექიმებს არ აქვთ დრო, ყველა პაციენტს გაწვდნენ, ქვედა რგოლს კი ამ საშიშ ვირუსთან გასამკლავებლად კომპეტენცია არ ყოფნის,  არასწორი მკურნალობის შედეგი კი პაციენტებისთვის ხშირად ლეტალურია.

სულ ცოტა ხნის წინ გორის მუნიციპალიტეტის  მკვიდრმა მაყვალა მამისაშვილმა დედა დაკარგა. ელენე ქუმსიაშვილი 3 კვირის განმავლობაში მკურნალობდა მცხეთის ერთ-ერთ საავადმყოფოში. კლინიკიდან გამოწერილმა პაციენტმა 1 დღეც ვერ იცოცხლა, ის მშობლიურ სახლში გარდაიცვალა.

მაყვალა მამისაშვილა:  „მიმდინარე წლის ოქტომბერში მე და ჩემი ოჯახის წევრებს კოვიდ19 დაგვიდასტურდა. რამდენიმე დღის განმავლობაში გვქონდა მაღალი ტემპერატურა, სუსტად ვგრძნობდით თავს, მაგრამ დროულად არავინ გამოგვეხმაურა. ოჯახის ექიმს ჩვენი ჯანმრთელობის მდგომარეობა არ მოუკითხავს. სასწაულად გადავურჩით სიკვდილს, თუმცა დედას არ გაუმართლა. 3 კვირა იწვა საავადმყოფოში. ტელეფონით ვუკავშირდებოდი, ხან რატომღაც ამის საშუალებაც არ მქონდა. მკურნალობდა ცუდ პირობებში, შეიძლება ითქვას, რომ გააგიჟეს ადამიანი, ხელებით ჰყავდათ საწოლზე დაბმული, ძალიან ცუდად ექცეოდნენ. უკეთდებოდა სისხლის გამათხელებელი, ე.წ ,,კლექსამი“, ეტყობა, ჭარბი დოზა მოუვიდათ. როცა სანახავად მივედი,  მკლავები და მუცელი სულ დაშავებული ჰქონდა, პირი - სისხლით სავსე,  უკვე ცუდად იყო.  კოვიდი გადატანილი აქვსო, გვითხრა ექიმმა, მაგრამ არასწორი მკურნალობით მისი ჯანმრთელობის მდგომარეობა დაამძიმეს. ექიმი გვარწმუნებდა, საშუალოდ არის, გამოკეთდაო, მაგრამ სინამდვილეში უფრო მეტად დამძიმდა, სახლში წამოვიყვანეთ და იმ ღამესვე გარდაიცვალა, ერთი დღეც ვერ იცოცხლა ამ სასტიკი და ჯოჯოხეთური ,,მკურნალობის“  შემდეგ. ახლაც სტრესში ვართ, რომ ვიჩივლო, ვერც ამის აზრს ვხედავ, რადგან გამიჭირდება ამ ფაქტების დადასტურება, ადამიანი გარდაიცვალა და ამ ყველაფერს უკვე აზრიც არ აქვს, თუმცა ძალიან მინდა, რომ  ამ სასტიკი შემთხვევის გამო ექიმი მკაცრად დაისაჯოს“.

კიდევ ერთი ყოფილი პაციენტი, რომელმაც ვინაობის გამხელა არ ისურვა,  ,,კომერსანტთან“ ჰყვება, რა მძიმე პირობებში უწევდა პაციენტებით გადატვირთულ კლინიკაში ყოფნა, სანამ შუამავლის დახმარებით მისთვის ადგილი მოიძებნებოდა.

„თავდაპირველად სახლში გავდიოდი მკურნალობის კურსს, მაგრამ  ჩემი ჯანმრთელობის მდგომარეობა დამძიმდა და ჰოსპიტალიზაცია გახდა საჭირო. ელემენტარული ყურადღებაც არ მექცეოდა, სანამ ახლობელთან არ დავრეკე და არ ვითხოვე დახმარება. მერე, როგორც იქნა, ცოტა ყურადღება დამითმეს. ამას არ ვამბობ იმის გამო, რომ ვინმე გულგრილობაში დავადანაშაულო, სურვილი ალბათ იყო, მაგრამ ექიმები ვერ ახერხებდნენ, რომ ყველასთვის ყურადღება მიექციათ, ყველა პაციენტს ვერ გასწვდნენ. მე გამიმართლა იმით, რომ პატრონი მყავდა და მიმკურნალეს, ამის შესაძლებლობას ბევრი პაციენტი მოკლებულია.  ჩემი აზრით, სიკვდილიანობის მაღალი მაჩვენებელიც ამით არის გამოწვეული, ადამიანები და ექიმებიც ჯოჯოხეთს გადიან კლინიკებში, მძიმე სურათის მოწმე გავხდი, საბედნიეროდ გადავრჩი, რათა ეს ყველაფერი მოვყვე“, - ამბობს ყოფილი პაციენტი ,,კომერსანტთან“.

ფაქტს, რომ პანდემიის მართვისას შეცდომებია დაშვებული, სპეციალისტებიც აღიარებენ. რამდენიმე დღის წინ ერთ-ერთი ცნობილი მედიკოსი ჩვენთან ამბობდა კიდეც, რომ პაციენტების გარკვეული ნაწილი მოკვდა მხოლოდ იმის გამო, რომ საავადმყოფოებში არასწორად უმკურნალეს. რა არის გარდაცვალების ზუსტი მიზეზი, ალბათ, ოდესმე გაირკვევა... ამასობაში კიდევ დიდხანს მოგვიწევს ყოველდღიურ რეჟიმში ახალი სტატისტიკის გაცნობა, რომელსაც დაავადებათა კონტროლის ეროვნული ცენტრი გვაწვდის.

25 ნოემბრის მონაცემით,  საქართველოში კორონავირუსით ინფიცირების 4 331 ახალი შემთხვევა გამოვლინდა.

გარდაიცვალა 57 პაციენტი. სულ კოვიდ პანდემიას საქართველოს 11 736 მოქალაქე ემსხვერპლა.

მარი ჩიტაია