დღის TOP10 საინტერესო ამბავი:
1. საქართველოში კოვიდინფიცირების 15 762 ახალი შემთხვევა დადასტურდა
Stopcov.ge-ზე გამოქვეყნებული ინფორმაციის თანახმად, დღევანდელი მონაცემებით, ჩატარდა 74 200 ტესტი, გამოვლინდა ინფიცირების 15 762 ახალი შემთხვევა.
2. საქართველომ კორუფციის აღქმის ინდექსში ერთი ქულა დაკარგა
„საერთაშორისო გამჭვირვალობის სამდივნოს მიერ გამოქვეყნებულ 2021 წლის „კორუფციის აღქმის ინდექსის (CPI) მიხედვით, საქართველოს 55 ქულა აქვს, რაც წინა წელთან შედარებით ერთი ქულით გაუარესებული შედეგია. რეიტინგში შემავალ 180 ქვეყანას შორის საქართველო 45-ე ადგილს და რეგიონში [აღმოსავლეთ ევროპა და შუა აზია] პირველობას ინარჩუნებს. ამის შესახებ ინფორმაციას „საერთაშიროსი გამჭვირვალობა საქართველო“ ავრცელებს.
3. ფოთის თიზ-ში 2022 წელს 3 ახალი საწარმო გაიხსნება
ფოთის თავისუფალი ინდუსტრიული ზონის (თიზ) გენერალური დირექტორი დავით ებრალიძე „კომერსანტთან” 2022 წლის გეგმებზე საუბრობს და აცხადებს, რომ მიუხედავად პანდემიისა, მიმდინარე წელს არაერთი ახალი პროექტი იგეგმება, მათ შორის 6000 კვ.მ საწარმოო ფართში განთავსდება ტექსტილის საწარმო, რომელის ექსპლუატაციაში ჩაშვება მოხდება 2022 წელს.
4. მიხეილ ჯაფარიძე: „ომიკრონის“ გავრცელების გამო ოჯახის ექიმებზე უპრეცედენტო დატვირთვა ფიქსირდება
სადაზღვევო კომპანიების ნაწილი ჯანდაცვის სამინისტროს პირველადი ჯანდაცვის რგოლში პაციენტების მართვის პროტოკოლის შეცვლას სთხოვს, რათა ოჯახის ექიმებზე დატვირთვა შემსუბუქდეს და მათ უკეთ შეძლონ კოვიდპაციენტების მართვა.
5. საქართველოს ენერგოდეფიციტმა 2001-2021 წლებში $17 მლრდ-ს გადააჭარბა
2001-2021 წლებში საქართველომ ექსპორტზე სულ $1.066 მლრდ-ის ელექტროენერგია, ნავთობი, ნავთობპროდუქტი, ბუნებრივი გაზი და ქვანახშირი გაიტანა, იმპორტში კი 1635%-ით მეტი - $18.501 მლრდ გადაიხადა.
6. 2020 წელს TAV Georgia-ს მოგება 90%-ით შეუმცირდა
კომპანიის ანგარიშგების მიხედვით, 2020 წელს TAV Georgia-ს შემოსავალმა 64,8 მლნ ლარი შეადგინა, რაც 195,8 მლნ ლარით (75%) ნაკლებია 2019 წლის მაჩვენებელთან შედარებით (260,6 მლნ ლარი).
7. 2021 წელს თბილისის გარეუბნებში უძრავი ქონება $200-ით გაძვირდა
პანდემიამ უძრავი ქონების ბაზარი შეცვალა. როგორც სამშენებლო კომპანიებში აცხადებენ, მშენებლობის თვითღირებულება 35-40%-ით გაძვირდა, რაც ბინის ფასებზეც აისახა.
8. ქართული ბანკების აქტივებმა 60,6 მილიარდს მიაღწია
2022 წლის პირველი იანვრის მდგომარეობით, საქართველოს საბანკო სექტორის ზომამ 60,568,300,000 ლარს მიაღწია. აქტივები წინა თვესთან შედარებით დაახლოებით 1 მლრდ ლარით გაიზარდა.
9. ტექინსპექტირება საქალაქთაშორისო ტრანსპორტის მხოლოდ 15%-ს აქვს გავლილი
ტრანსპორტისა და გზების ასოციაციის ხელმძღვანელმა დავით მესხიშვილმა ,,კომერსანტს“ აცნობა, რომ ორგანიზაციის მიერ ჩატარებული კვლევის თანახმად, 54 000 ერთეული რეგისტრირებული ავტობუსი და მიკროავტობუსიდან ტექინსპექტირება, 2021 წლის ივლისის მდგომარეობით, მხოლოდ 1602-ს ჰქონდა გავლილი.
10. საქართველოს ბანკს ფეისბუქმა, სავარაუდოდ, გვერდი დაუბლოკა
საქართველოს ბანკის გვერდი ფეისბუქზე აღარ იძებნება. მისი ვირტუალური სივრციდან გაქრობის მიზეზი ჯერჯერობით უცნობია.