დღის TOP10 საინტერესო ამბავი:
1. „მდუღარე ეკონომიკის“ ორნიშნა პროცენტული ზრდის ალბათობა შემცირდა
სექტემბერში ეკონომიკა 6.9%-ით გაიზარდა, რაც 2013-2019 წლებთან შედარებით მაღალია, მაგრამ მიმდინარე წლის გასულ თვეებთან შედარებით ტემპი შემცირებულია, რამაც დაანონსებული წლიური ორნიშნა ეკონომიკური ზრდა ეჭვქვეშ დააყენა.
2. რეკომენდაცია მთავრობას - რა უნდა გაკეთდეს საძოვრების ეფექტური მართვისა და გამოყენებისთვის
მთავრობა სახელმწიფო საკუთრებაში არსებული საძოვრების ხელმისაწვდომობის ახალი პროგრამაზე მუშაობს, რომლის დამტკიცების შემთხვევაში მსხვილფეხა და წვრილფეხა რქოსანი პირუტყვის მფლობელები საძოვრებს აუქციონის გზით მიიღონ და 3-წლიანი იჯარის ხელშეკრულების ფარგლებში განკარგვას შეძლებენ.
3. ისრაელი, თურქეთი, აზერბაიჯანი, უნგრეთი - ქართული ბანკების წარმომადგენლობები უცხოეთში
საქართველოში მოქმედი კომერციული ბანკების უმრავლესობა უცხოური ბანკის ფილიალს წარმოადგენს, თუმცა ისინი ქვეყნის ორ მსხვილ ბანკს კონკურენციას მაინც ვერ უწევენ. ბოლო პერიოდში საერთაშორისო საფინანსო ბაზარზე ქართული ბანკების ფილიალებიც გამოჩნდა, მათ შორის სიმრავლით საქართველოს ბანკის და თიბისი ბანკის შვილობილი ორგანიზაციები გამოირჩევიან, რომლებიც არაერთ ქვეყანაშია წარმოდგენილი.
4. მაღალი ფასების გამო საქართველოს მძიმე ზამთარი ელის
ფასების ზრდის ტენდენცია მომდევნო თვეების განმავლობაში გაგრძელდება. ამ თვალსაზრისით, როგორც სპეციალისტები ვარაუდობენ, საქართველოს უმძიმესი ზამთარი ელის. სტატისტიკოს გივი მომცელიძის ვარაუდით, საკვებსა და მედიკამენტებზე ფასების ზრდა სერიოზულ პრობლემას შექმნის და მასთან გამკლავება მოსახლეობის დიდ ნაწილს გაუჭირდება.
5. თუ დროულად არ შემოიღებენ შესაბამის საბირჟო პრინციპებს, ერთ დღეს შეიძლება სავალუტო კატასტროფა მივიღოთ - ფინანსისტი
საქართველოში ფულის საბაზრო ღირებულების დადგენა უკვე წლებია ბლუმბერგის სავაჭრო პლატფორმაზე ხდება. ეროვნული ბანკი თვლის, რომ ამ პლატფორმაში გადატანით პროცესი უფრო პროგრესული და გამჭვირვალე გახდა, რადგან სწორედ ეს არის საუკეთესო საერთაშორისო პრაქტიკა. თუმცა ექსპერტთა ნაწილი ამბობს, რომ ბლუმბერგის სისტემა ჩვენისთანა პატარა ქვეყნისთვის არამართებულია.
6. ლონდონის საფონდო ბირჟაზე 1 კვირაში თიბისის და საქართველოს ბანკის აქციების ფასი გაიზარდა, Georgia Capital-ის კი შემცირდა
ლონდონის საფონდო ბირჟაზე საქართველო სამი კომპანიის - “თიბისი ბანკის”, “საქართველოს კაპიტალის” და “საქართველოს ბანკის” მეშვეობით არის წარმოდგენილი.
7. ბანკების მიერ გაცემული სესხების მოცულობა სექტემბერში წლიურად 12.7%-ით გაიზარდა - Galt & Taggart
Galt & Taggart-ის კვირის მიმოხილვის მიხედვით, კომერციული ბანკების მიერ გაცემული სესხების მოცულობა 2021 წლის სექტემბერში წლიურად 12.7%-ით გაიზარდა (+2.3% თ/თ) და 41 მლრდ ლარი შეადგინა. ამასთან, გაცვლითი კურსის ეფექტის გამორიცხვით, სესხების პორტფელის წლიურმა ზრდამ სექტემბერში 15.8% შეადგინა (+2.5% თ/თ).
8. საქართველო სამეცნიერო კვლევებზე ისრაელთან შედარებით 16-ჯერ ნაკლებს ხარჯავს
სამეცნიერო კვლევებზე 2020 წელს საქართველოში, 2019 წელთან შედარებით, 5.7%-ით მეტი — 148.2 მლნ ლარი დაიხარჯა, რაც მშპ-ის 0.3%-ა. ეს კი, მშპ-სთან შეფარდების ჭრილში, გერმანიასთან შედარებით 10-ჯერ, შვეიცარიასთან შედარებით 11-ჯერ და ისრაელთან შედარებით კი 16-ჯერ ნაკლებია.
9. დონბასის ცაზე კიევმა „ბაირაქტარი“ ააფრინა - ესკალაციის ახალი ტალღა
ერთმა ვიდეოჩანაწერმა უკრაინაში და რუსეთში დიდი აღელვება გამოიწვია - უკრაინის შეიარაღებულმა ძალებმა დონბასში თურქული უპილოტო საფრენი აპარატი გამოიყენეს.
10. Financial times: მოლდოვამ „გაზპრომთან“ შეთანხმებას მიაღწია
მოლდოვამ „გაზპრომთან“ ახალი გრძელვადიანი კონტრაქტი გააფორმა, რაც ქვეყანაში რუსეთის მიერ გაზის მიწოდების შემცირებით გამოწვეული კრიზისის დაძლევის შესაძლებლობას ქმნის.