დღის ტოპ 10 საინტერესო ამბავი

1. რა შეიცვალა მგზავრებისთვის საზოგადოებრივი ტრანსპორტის ერთიან სისტემაზე გადასვლით

თბილისის მასშტაბით საზოგადოებრივ ტრანსპორტში გადახდის სააბონენტო სისტემა ამოქმედდა. მეტროსა და ავტობუსის ინტეგრირებულ ქსელს მიკროავტობუსი და საბაგიროც დაემატა. სხვადასხვა შეღავათით მოსარგებლეებისთვის ძველი ტარიფი შენარჩუნდა, ხოლო მათთვის, ვინც შეღავათებით არ სარგებლობდა, ერთჯერადი მგზავრობის საფასური გაორმაგდა და 1 ლარს გაუტოლდა. გრძელვადიანი აბონემენტის შეძენის შემთხვევაში მგზავრობის ღირებულება მცირდება, თუმცა ერთიანად 250 ან 100 ლარის გადახდის საშუალება ყველა მოქალაქეს არ გააჩნია. 

2. მკაცრი მონეტარული პოლიტიკა და მთავრობის ხარჯის შენელება - რატომ მყარდება ლარი?

ბოლო რამდენიმე თვეა ლარი სტაბილურობას ინარჩუნებს, უკანასკნელად ეროვნული ვალუტა ასეთი მყარი 2020 წლის სექტემბერში იყო. 2021 წელს ქართული ვალუტა მნიშვნელოვანი რყევებით გამოირჩეოდა. წლის პირველ ნახევარში ლარის მნიშვნელოვანი გაუფასურება დაფიქსირდა და 1 აშშ დოლარის ოფიციალურმა ღირებულებამ 3.45 ლარსაც კი გადააჭარბა, წლის მეორე ნახევარი შედარებით სტაბილური იყო. 2021 წელს ეროვნული ბანკის მიერ სავალუტო ინტერვენცია სულ 9-ჯერ განხორციელდა, მათგან 7 იანვარ-აპრილში, სადაც სულ 242.9 მლნ აშშ დოლარი გაიყიდა.

3. როგორ აღიქვამს ბიზნესი ეკონომიკური ზრდის გავლენას

2021 წლის ეკონომიკური ზრდა ბიზნესის საქმიანობაზეც პოზიტიურად აისახა. იშვიათი გამონაკლისის გარდა, თითქმის ყველა სექტორში ბიზნესმა შვება იგრძნო. კომპანიების წარმომადგენლები ,,კომერსანტთან“ მიღწეულ შედეგზე საუბრობენ, თუმცა ჰორეკა სექტორი კვლავ რჩება დარგად, სადაც მდგომარეობა ისევ მძიმეა და უარყოფითი დინამიკა ჯერჯერობით უცვლელია.

4. საქართველო ინფიცირების ახალ შემთხვევათა რაოდენობით მსოფლიოში პირველ ადგილზეა

საქართველოში 1-ელ თებერვალს, 31 იანვარს აღებული ტესტების საფუძველზე, კოვიდინფიცირების რეკორდული 24 201 შემთხვევა დაფიქსირდა, იმდენივე რაც პანდემიის დაწყებიდან პირველ 8 თვეში ერთად. მოსახლეობის რაოდენობის გათვალისწინებით, 12:00 საათისთვის 1 მლნ-დან 6085 შემთხვევით საქართველო პირველ ადგილზეა. სხვა ქვეყნების მიერ სტატისტიკის სრულად წარდგენის შემდეგ რეიტინგი შეიძლება შეიცვალოს, მაგრამ მხოლოდ უმნიშვნელოდ.

5. საქართველოში მწვანე პასპორტი სავალდებულო აღარ არის

„ომიკრონის“ გავრცელების სწრაფი ტემპისა და ვირუსის სუსტი მიმდინარეობის, ასევე მსოფლიო პრაქტიკის გათვალისწინებით, „მწვანე პასპორტის“ მოთხოვნის ვალდებულება უქმდება, - აღნიშნული გადაწყვეტილება უწყებათაშორისი საკოორდინაციო საბჭოს დღევანდელ სხდომაზე მიიღეს, რომელიც პრემიერ-მინისტრ ირაკლი ღარიბაშვილის ხელმძღვანელობით, ვიდეოკონფერენციის ფორმატში გაიმართა. ინფორმაციას მთავრობის ადმინისტრაციის პრესსამსახური ავრცელებს.

6. შრომის ინსპექტირება პანდემიამდე და პანდემიის პერიოდში - გამოწვევების დაძლევას ორიგინალური მიდგომა დასჭირდა

რას საქმიანობს შრომის ინსპექცია, რას გულისხმობს შრომის უსაფრთხოება და რა როლი ითამაშა შრომის ინსპექციამ პანდემიის მართვაში — ამ და სხვა თემებზე რადიო “კომერსანტის“ გადაცემაში “ბიზნეს ინსაიდერი“ შრომის პირობების ინსპექტირების დეპარტამენტის უფროსმა ბექა ფერაძემ ისაუბრა.

7. „მწვანე პასპორტი მხოლოდ და მხოლოდ ამძიმებდა სიტუაციას“ - შოთა ბურჯანაძე

დღეს, 1-ელ თებერვალს გამართულ სხდომაზე  საკოორდინაციო საბჭომ “მწვანე პასპორტების” მოთხოვნის ვალდებულება გააუქმა.  როგორც რესტორატორთა ასოციაციის  თავმჯდომარე შოთა ბურჯანაძე „კომერსანტთან” საუბრისას აღნიშნავს, “მწვანე პასპორტი” ვირუსის გავრცელების ბერკეტი ისედაც არ ყოფილა.

8. სინერჯი კაპიტალი სასამართლომ რეაბილიტაციის რეჟიმში გადაიყვანა

„სინერჯი კაპიტალი“ რეაბილიტაციის რეჟიმში გადავიდა. განჩინება თბილისის საქალაქო სასამართლომ კომპანიის დირექტორის პაპუნა ტოლიაშვილის განცხადების საფუძველზე მიიღო.

9. პარლამენტს ეროვნული ანტიკორუფციული სააგენტოს შექმნის ინიციატივით მიმართეს

პარლამენტს დამოუკიდებელი სახელმწიფო ორგანოს - ეროვნული ანტიკორუფციული სააგენტოს შექმნის ინიციატივით მიმართეს. ინიციატორები არიან არასამთავრობო ორგანიზაცია საერთაშორისო გამჭვირვალობა — საქართველო, მე-9 მოწვევის პარლამენტის წევრები თამარ ჩუგოშვილი, თამარ ხულორდავა, ირინე ფრუიძე, ნინო გოგუაძე და დიმიტრი ცქიტიშვილი.

10. პირველად ისტორიაში, უკრაინამ უნგრეთიდან გაზის იმპორტი დაიწყო

ისტორიაში პირველად, უკრაინამ უნგრეთიდან გაზის იმპორტი დაიწყო. აქამდე GTS სისტემა მხოლოდ უკრაინიდან უნგრეთის მიმართულებით მუშაობდა. ამის შესახებ კომპანიის აღმასრულებელმა დირექტორმა, სერგეი მაკოგონმა Facebook-ის საკუთარ გვერდზე განაცხადა.