დღის TOP 10 საინტერესო ამბავი:

1.თბილისში მუნიციპალური ტრანსპორტის აღდგენა მარტიდან იგეგმება

უწყებათაშორისი საკოორდინაციო საბჭოს გადაწყვეტილებით, ბათუმში, ზუგდიდში, გორში, ფოთსა და თელავში 1-ელი თებერვლიდან მუნიციპალური ტრანსპორტის, სკოლების, მაღაზიებისა და სავაჭრო ობიექტების მუშაობა აღდგება.

2.სათხილამურო კურორტებზე შეზღუდვები ძალაში რჩება

ამ ეტაპზე სათხილამურო კურორტებზე შეზღუდვები ძალაში რჩება. ამის შესახებ ვიცე-პრემიერმა მაია ცქიტიშვილმა უწყებათაშორისი საკოორდინაციო საბჭოს სხდომის დასრულების შემდეგ განაცხადა.

3.„სვის კაპიტალის“ ზარალი სესხების შესაძლო დანაკარგების მიხედვით 75%-ით გაიზარდა

სს „სვის კაპიტალის“ ზარალი სესხების შესაძლო დანაკარგების მიხედვით 2020 წლის სამ კვარტალში წინა წლის ანალოგიურ პერიოდთან შედარებით 75%-ით გაიზარდა. 2019 წლის ანალოგიურ პერიოდში ზარალი სესხების შესაძლო დანაკარგების მიხედვით 3, 901,225 ლარს შეადგენდა, ხოლო გასული წლის სამ კვარტალში 6,862,490 ლარი იყო.

4.“დღეს ფაქტობრივად შიმშილისთვის გაგვწირეს“ - მთის კურორტების სასტუმროები მთავრობის გადაწყვეტილებას აპროტესტებენ

„ისეთი შთაბეჭდილება მრჩება, რომ თითქოს როგორც ინდიელები ჰყავდათ რეზერვაციაში, ასე ვართ მოქცეული, ოღონდ იქ ყველანაირად სოციალურად უზრუნველყოფილები იყვნენ. დღეს ფაქტობრივად გაგვწირეს შიმშილისთვის, დღევანდელი გადაწყვეტილება მთის კურორტების არ გახსნის შესახებ, ჩემთვის შიმშილით გაწირვას უტოლდება.,“ - ამის შესახებ „კომერსანტთან“ მესტიის სასტუმრო „ელიტ ჰაუსის“ მეპატრონემ ისაუბრა.

5.ეს საკოორდინაციო კი არა, მავნებლების საბჭოა, რომელიც ადგენს მარცხნივ უფრო უკეთ გადაიჩეხება ეს ქვეყანა, თუ მარჯვნივ - რესტორატორთა ასოციაცია

1-ლი მარტიდან გახსნას აზრი აღარ ექნება, რადგან ბიზნესი ამ დროს უკვე აღარ იარსებებს - ამის შესახებ რესტორატორთა ასოციაციის დამფუძნებელმა კოტე გაბრიჩიძემ ,,ბიზნესპრესნიუსთან“ განაცხადა. მისი თქმით, საკოორდინაციო საბჭოს მოქმედებები აბსოლუტურად ალოგიკურია.

6.KTW Developement: „ფიროსმანის ქუჩაზე ახალი კომპლექსის მშენებლობა პანდემიის გამო გადაიდო, დღემდე მერიის ნებართვას ველოდებით“

„კახური ტრადიციული მეღვინეობის“(KTW ჯგუფი) შვილობილი კომპანია KTW Development-ი ფიროსმანის ქუჩაზე ახალ, მრავალფუნქციური კომპლექსის აშენებას გეგმავს. 15 მილიონი ლარის ინვესტიციით პროექტის განხორციელება 2020 წლის სექტემბერში უნდა დაწყებულიყო და 15 თვეში დასრულებულიყო, თუმცა პანდემიის გამო გადაიდო.

7.„ახლა ხომ შეიძლებოდა, დაეკეტათ მოლები და გაეხსნათ ბაზრობები“ - ლილო მოლი

„ლილო მოლის“ პრეზიდენტი ლევან გაგუა „ბიზნესპარტნიორთან“ შეზღუდვების მოხსნასთან დაკავშირებით მთავრობის გადაწყვეტილებას ეხმაურება და აცხადებს, რომ მათთვის 15 თებერვლამდე გახსნის გადავადება მოულოდნელი იყო.

8.„ელექტროენერგიის გაძვირების მიუხედავად, ივნისამდე ფასების ზრდას არ ვგეგმავთ“ - „კულა“

„გორის საკონსერვო ქარხანა კულას“ გენერალურმა დირექტორმა ვანო გოგლიძემ „კომერსანტს“ განუცხადა, რომ უკვე ნაყიდი ნედლეულის ხარჯზე კომპანია ივნისამდე ფასების კორექტირებას არ გეგმავს, რადგან მთავარი ხარჯი ნედლეულია. თუმცა, კომპანიის მასშტაბიდან გამომდინარე ძველი ტარიფითაც კი ელექტროენერგიის გადასახადი თვეში 20 000 ლარს აღწევდა და მისმა 60%-იანმა გაზრდამ მომავალში შესაძლოა ფასებზეც იქონიოს გავლენა.

9.მთავრობამ ფქვილზე სუბსიდია გაზარდა - ტომარა ფქვილი 15 ლარით დაფინანსდება

1 ტომარა ფქვილზე სახელმწიფო სუბსიდია გაიზარდა. ამის შესახებ დადგენილება უკვე გამოქვეყნდა.

10.„დღეს კომპანიები არა მოგებისთვის, არამედ გადარჩენისთვის მუშაობენ“ - ივა ჭყონია

„დღეს კომპანიები არა მოგებისთვის არამედ გადარჩენისთვის მუშაობენ, გარდა ამისა იჯარა ძალიან მაღალია და რესტორატორებს უწევთ დიდი გადასახადების გადახდა. დელივერის შემთხვევაში, რესტორანს შესაძლებლობა აქვს გაყიდოს მხოლოდ მზა პროდუქტი, რაც რესტორნისთვის მომგებიანი არ არის“, — ამის შესახებ საქართველოს დისტრიბუტორთა ასოციაციის ხელმძღვანელმა ივა ჭყონიამ „კომერსანტთან“ საუბრისას განაცხადა.