დღის TOP 10 მნიშვნელოვანი ამბავი:
1. მცირე ბანკებში დოლარის ანაბრებზე პროცენტი 4–ჯერ მეტია, ვიდრე მსხვილ ბანკებში
მცირე ზომის ბანკები კლიენტების მოზიდვას დომინანტ ბანკებთან შედარებით უცხოურ ვალუტაში 3-ჯერ ან ზოგ შემთხვევაში 4-ჯერ უფრო მაღალი საპროცენტო სარგებლის დარიცხვით ცდილობენ.
2. 82.7 მლნ ლარის დივიდენდს თიბისი სექტემბერში გადაიხდის
თიბისი შუალედური დივიდენდების გადასახდელად ემზადება და TBC Bank Group-მა აქციონერებს უკვე აცნობა, რომ თანხა 17 სექტემბერს ჩაერიცხებათ, თითო ჩვეულებრივ აქციაზე 1.5 ლარის (ექვივალენტი ფუნტში) ოდენობით.
3. ივლისში ექსპორტი 42%-ით გაიზარდა
ექსპორტი აგვისტოში გასული წლის ანალოგიურ პერიოდთან შედარებით 42%-ით, 2019 წლის ივლისთან შედარებით კი 21%-ით $391 მლნ-მდე გაიზარდა.
4. თხილის ბაზარზე განუკითხაობაა - 5–ლარიან თხილს ხალხი 3,5 ლარადაც ვერ ყიდის
ჩამბარებელ პუნქტებში თხილის სტანდარტის გამო 1 ტონა თხილში მოსახლეობა, სულ მცირე, 1500 ლარს კარგავს.
5. მოსახლეობის ფინანსური ზარალი მილიარდ ლარს აჭარბებს
პანდემიის გამო საქართველოშო ოჯახების შემოსავალი 2020 წელს 1,3 მილიარდი ლარით შემცირდა. ცალკეა აუნაზღაურებელი ზარალი, რასაც ჩვენი მოქალაქეები ინფიცირებულთა გარდაცვალების, ჯანმრთელობის გაუარესებისა და მორალური სტრესის გამო განიცდიან.
6. 3 ლარი – ფსიქოლოგიური ნიშნული რეგულარის მარკის ბენზინმაც გადალახა
საქართველოში ბრენდირებული ბენზინგასამართი სადგურების ნაწილზე ყველაზე იაფი რეგულარის მარკის ბენზინის ფასმა ახალი ფსიქოლოგიური ნიშნული – 3–ლარიანი ზღვარი გადალახა.
7. სავალუტო რყევებმა და ინფლაციამ ჯუთაში სასტუმრო „მეხუთე სეზონის“ ფასებზე იმოქმედა
როგორც „კომერსანტს“ ყაზბეგის რაიონის სოფელ ჯუთაში მდებარე სასტურმოს „მეხუთე სეზონის“ დამფუძნებელმა გელა არაბულმა უთხრა, მიუხედავად იმისა, რომ პანდემია ბიზნესზე დიდ გავლენას ახდენს, სასტუმრო დამსვენებლების რაოდენობას არ უჩივის და 2021 წელს მათთან მომხმარებელთა რაოდენობამ 2019 წლის ნიშნულს მიაღწია. თუმცა ბოლო ორი წლის განმავლობაში ფასების დაკორექტირება რამდენჯერმე მოუწიათ.
8. გერმანიაში სეზონური სამუშაოზე ნამყოფი მოქალაქეები საქართველოს სახელმწიფოს სასამართლოში უჩივიან
გერმანიაში სეზონურ სამუშაოზე დასაქმებული მოქალაქეები საქართველოს სახელმწიფოს წინააღმდეგ თბილისის საქალაქო სასამართლოში სარჩელს დღეს, 13 აგვისტოს შეიტანენ. მათ უფლებს „გაერთიანებული პროფკავშირები“ დაიცავს. როგორც ორგანიზაციის ხელმძღვანელი ირაკლი პეტრიაშვილი „კომერსანტთან“ ამბობს, გერმანიაში სეზონურ სამუშაოზე დასაქმებულთა უმეტესობა პროგრამით უკმაყოფილოა, თუმცა ამ ეტაპზე 11 მოსარჩელეა, რომლებსაც პროფკავშირები საკუთარი უფლებების დაცვაში დაეხმარება.
9. საქპატენტმა ბორჯომის დასახელების გამოყენებაზე ჩინურ კომპანიას დავა მოუგო
საქპატენტმა ჩინური კომპანიის წინააღმდეგ დავა მოიგო. საქმე ეხება ქართული მინერალური წყლის დასახელება „ბორჯომის“ გამოყენებას, რომელიც ჩინეთის სახალხო რესპუბლიკაში არაკეთილსინდისიერი განზრახვით იყო რეგისტრირებული ჩინური კომპანიის სახელზე.
10. Adidas Reebok–ის ბრენდს €2,1 მილიარდად გაყიდის
გერმანული Adidas AG უკვე შეუთანხმდა Reebok–ის ბრენდის გაყიდვაზე ამერიკულ კომპანიას Authentic Brands Group (ABG). მხარეები €2,1 მლრდ მოცულობის გარიგების დახურვას მომავალი წლის პირველ კვარტალში აპირებენ. Adidas–მა Reebok 2006 წელს $3,8 მილიარდად იყიდა.
მთავარი ამბები
