ბრიტანეთის ახალმა ინდუსმა ფინანსთა მინისტრმა რიში სუნაკიმ კორონავირუსით დაზარალებული ეკონომიკის დარგების გადარჩენის გეგმა შეიმუშავა. რამდენიმე დღის წინ მან ახალი ბიუჯეტი წარადგინა, სადაც აქცენტი რესტორნების, სასტუმროების, მუზეუმების, პარკებისა და სხვა გასართობი ადგილების ხელშეწყობაზეა გაკეთებული.
ახალი გეგმის მიხედვით, პირველ რიგში დღგ 20%-დან 5%-მდე მცირდება. გარდა ამისა, პროგრამა Eat out — help out (ჭამე და დაეხმარე) ამოქმედდა, რომელის მიხედვითაც, აგვისტოს თვეში მთავრობა, მომხმარებლებს საკვები ობიექტების ჩეკების მიხედვით, ყოველი საუზმის/სადილის/ვახშმის ღირებულების 50%-ს აუნაზღაურებს. სისტემა მხოლოდ სამუშაო დღეებში მოქმედებს, რადგან სავარაუდოდ, უქმეებზე რესტორნებს მომხმარებლები ისედაც არ მოაკლდებათ. ასევე განსაზღვრულია სუბსიდირებული სადილის მაქსიმალური ღირებულება - 10 ფუნტი. შესაბამისად, რაც უფრო იაფია რესტორანი, კომპენსაცია მით უფრო მაღალი იქნება.
ერთი ადამიანის მიერ ვიზიტების რაოდენობა შეზღუდული არაა. ბრიტანელებს შეუძლიათ რესტორანში დღეში სამჯერ მიირთვან და შეღავათითაც ისარგებლონ. თუმცა გასათვალისწინებელია, რომ ფასდაკლება ალკოჰოლურ სასმელებზე არ მოქმედებს. გარდა ამისა, ბრიტანეთში, ისევე როგორც ბევრ განვითარებულ ქვეყანაში, მოქმედებს სქემა furlough ანუ თუ ბიზნესი დახურულია, თანამშრომლის დათხოვნა არ ხდება და ის ბიუჯეტიდან თავისი ხელფასის 80%-ს მაინც იღებს.
რა იქნება, როდესაც ბიზნესები აღდგება და საბიუჯეტო დახმარების პროგრამა დასრულდება? დააბრუნებენ თუ არა დამსაქმებლები ყველა თანამშრომელს?- ამის საპასუხოდ ფინანსთა სამინისტრო ყოველ დაბრუნებულ თანამშრომელში დამსაქმებელს 1000 ფუნტს გადაუხდის. ეს ერთ-ერთი საუკეთესო ნაბიჯია, ბრიტანეთში უმუშევრობის ზრდის წინაამღდეგ. გარდა ამისა, მთავრობა დამსაქმებლებს 16-24 წლის ასაკის ყოველ ახალ აყვანილ თანამშრომელზე ასევე 1000 ფუნტს გადაუხდის. ეს იმისთვის კეთდება, რომ კრიტიკულ ასაკში ახალგაზრდები უმუშევრად არ დარჩნენ.
აღსანიშნავია, რომ დღეს ბრიტანეთში 40 000 პაბი, 28 000 რესტორანი, 15 000 კაფე და 7500 სასტუმროა, სადაც 2,4 მლნ. ადამიანი მუშაობს.
წყარო businessviews.com.ua
მოამზადა თენგიზ აბლოთიამ