კორონავირუსის გავრცელებით გამოწვეული პრობლემების შემსუბუქების მიზნით საქართველოს მთავრობა ბიზნესს საგადასახოდო შეღავათებს სთავაზობს. მათ შორის, საქართველოს მთავრობა გეგმით გათვალისწინებული დასაბრუნებელი 600 მლნ დღგ-ს ნაცვლად, ბიზნესს დამატებითი ღირებულების გადასახადის გაორმაგებულ ოდენობას დაუბრუნებს. პრემიერ-მინისტრის გიორგი გახარიას მტკიცებით, ამ რაოდენობის დღგ-ის დაბრუნებით, ჯამში ეკონომიკას განსაკარგად 1.2 მილიარდი ლარის ფინანსური რესურსი უბრუნდება.
BDO-ს მმართველი პარტნიორი ზურაბ ლალაზაშვილი მიიჩნევს, რომ არსებულ კრიზისულ სიტუაციაში, ბიზნესს ფულის ლიკვიდურობის პრობლემა აქვს და დღგ-ს გაორმაგებით დაბრუნება მასზე დადებითად აისახება, თუმცა, აქვე იმასაც დასძენს, რომ აუცილებელია სახელმწიფომ იმ ორგანიზაციებზეც გააკეთოს შეღავათები, ვისაც დღგ-ს ზედმეტობა არ წარმოექმნება.
„ზოგადად,მსგავსი კრიზისების დროს, ფულის ლიკვიდურობის პრობლემა იქმნება, როდესაც კომპანიებს არ აქვთ საკმარისი ფულადი სახსრები რომ ვალდებულებები გაისტუმრონ და ოპერირება განაგრძონ. შესაბამისად, დღგ-ს დაბრუნება ძალიან კარგია, უბრალოდ ბიზნესს უნდა ესმოდეს რომ ეს გავრცელდება არა ყველაზე, არამედ, მხოლოდ იმ კომპანიაზე,რომლსაც თავისი საქმიანობიდან გამომდინარე დღგ-ს ზედმეტობა წარმოექმნება, ესეთები არიან მაგალითად, ექსპორტიორები. როგორც დაანონსდა, ველოდებით მთავრობიდან უფრო ფართომაშტაბიან გეგმას, საინტერესო იქნება სახელმწიფოს მიერ როგორ მოხდება ყველა სხვა ბიზნესის მხარდაჭერა. საერთაშორისო ფინანსურ ინსტიტუტებთან არის საუბარი იმაზე, რომ საქართველოში გამოიგზავნოს უცხოური ფულადი სახსრები, რაც ძალიან გვჭირდება. ის უნდა მოხმარდეს როგორც ბიზნესს, ასევე სოციალური საკითხების მოგვარებას და ინფრასტრუქტურული პროექტების განხორციელებას“, - განმარტა ზურაბ ლალაზაშვილმა.
ეკონომისტი ირაკლი მაკალათია ამბობს, რომ დღგ-ს დაბრუნების ინიციატივა სწორია, ასევე აუცილებელია სხვა სახის საგადასახადო შეღავათების განხორციელებაც, თუმცა, შესაძლოა ბიუჯეტში მობილიზებული თანხები ამ ხარჯების დასაფარად საკმარისი არ იყოს.
„მსგავსი ინიციატივები აუცილებელია, საგადასახადო მიმართულებით მაქსიმალურად დიდი შეღავათების მიცემა უნდა მოხდეს, თან მაშინ როცა ბიზნესი ფაქტობრივად გაჩერებულია, მას კიდევ დამატებითი საგადასახადო ტვირთის გაწევა არ შეუძლია და თუ ამ პერიოდს მთავრობა შეუმსუბუქებს, შესაძლებლობას მისცემს, რომ გადარჩნენ. ჩვენი მიზანია იმ ზარალის მინიმუმამდე დაყვანა, რომელიც გვემუქრება, ერთ-ერთი საშუალება კი დღგ-ს დაბრუნება და გადასახადების შემსუბუქებაა. პრობლემა გვაქვს იმპორტზეც, რადგან როდესაც მასზე ვართ დამოკიდებული, გაუფასურებული ლარის და მაღალი გადასახადების პირობებში იმპორტირებული პროდუქცია ძვირდება, ამიტომ ასეთ სიტუაციაში გადასახადების შემცირება აუცილებელია. ბიუჯეტის ნაწილიც გასათვალისწინებელია, არ ვიცი მთავრობას რამდენად ეყოფა თანხები რომ ადმინისტრაციულ ხარჯებსაც გაუმკლავდეს და შემდეგ ბიზნესს დაეხმაროს. განსაკუთრებით იმ პირობებში, როდესაც დღგ-ს წილი მთლიან გადასახადებში დაახლოებით 40%-მდეა, ყველაზე დიდი წნეხი შესაბამისად საგადასახადო შერბილების კუთხით დღგ-ზე წამოვა და მსგავსი გადაწყვეტილება ბიუჯეტს დააცარიელებს, თუმცა ალტერნატიული გზები არის მოსანახი, რადგან სახელმწიფო თავისი ხარჯებით ამ ეტაპზე ბიზნესს ბევრით ვერ შეეშველება“, - აცხადებს ირაკლი მაკალათია.
ნინო თამაზაშვილი