ზაფხული აჭარაში ყველაზე აქტიური სეზონია, „კომერსანტი“ დაინტერესდა თუ როგორ ემზადება საზღვაო კურორტი ქობულეთი 2022 წლის ზაფხულის სეზონისთვის და სასტუმრო „ჯორჯია პალასის“ საზოგადოებასთან ურთიერთობის მენეჯერს რუსუდან ცეცხლაძეს დაუკავშირდა. მისი თქმით, უკრაინაში განვითარებულმა მოვლენებმა მომხმარებელთა ზრდის ტემპი მნიშვნელოვნად შეამცირა.
„მოგეხსენებათ ზაფხული აჭარაში და განსაკუთრებით ქობულეთში დასვენებისთვის ყველაზე სასურველი პერიოდია, შესაბამისად 2022 წლის ზაფხულიც არ არის გამონაკლისი, თუმცა მოლოდინი უფრო მაღალი იყო. მიმდინარე წელს რეალურად გაზრდილი იყო მოლოდინები, თუმცა უკრაინასთან დაკავშირებულმა მოვლენებმა ზრდის მკაფიო შენელება გამოიწვია. ზაფხულის პერიოდში უკრაინელი სტუმრების წილი საკმაოდ მაღალი იყო. დღევანდელი მდგომარეობით, მიმდინარე ზაფხული შარშანდელზე გაცილებით დაბალი ტემპით იჯავშნება. დამსვენებელთა 95% ადგილობრივია.
სასტუმრო “ჯორჯია პალასის“ დამსვენებელთა ყველაზე დიდი წილი, რა თქმა უნდა, ადგილობრივ ტურისტზე მოდის. რაც შეეხება უცხოელ სტუმრებს, ამ ეტაპზე მხოლოდ მინიმალური პროცენტულობა მოდის ყაზახ ტურისტებზე. დიდი ბაზრები იყო რუსეთი, უკრაინა, ყაზახეთი და სხვა“, - აღნიშნა რუსუდან ცეცხლაძემ.
რუსუდან ცეცხლაძემ ასევე აღნიშნა, რომ ამ ეტაპზე ადგილობრივი დამსვენებლისგანაც ინტერესი შედარებით შენელებულია, რაც როგორც უკრაინის მოვლენებს, ასევე ინფლაციას და ფასების ზრდას უკავშირდება.
„ნებისმიერი სახის აგრესია, რომელსაც ერთი ქვეყანა მეორეზე ახორციელებს, მსოფლიოს მასშტაბით დიდ ზიანს აყენებს ტურიზმს. ამ მხრივ გამონაკლისი ვერც ჩვენი ქვეყანა იქნებოდა. უკრაინელი ტურისტები ძირითად სამეულში შედიოდნენ, სეზონზე ეს ბაზარი დიდი აქტიურობით გამოირჩეოდა.
ამ ეტაპზე შეგვიძლია თამამად ვთქვათ, რომ ადგილობრივი ტურისტის ინტერესიც შედარებით შენელებულია, რაც ალბათ უკრაინაში მიმდინარე მოვლენებსაც უკავშირდება, რადგან არის რიგი ფაქტორები, რაც ამ ტემპზე გავლენას ახდენს – ინფლაცია, ზოგადად ფასების ზრდა და ა.შ.“, - აღნიშნა რუსუდან ცეცხლაძემ.
რუსუდან ცეცხლაძე ამბობს, რომ სასტუმრო „ჯორჯია პალასი“ მომხმარებელს ყოველ წელს სიახლეებს სთავაზობს და ამ მხრივ არც 2022 წელი იქნება გამონაკლისი.
„ყოველი ზაფხულის მოახლოება ჩვენი სტუმრებისთვის ყველაზე სასიამოვნო პერიოდია. მათ აქ ყოველთვის ელოდებათ სუფთა გარემო და სიახლეები. როგორც ყოველთვის, 2022 წლის ზაფხულიც არ იქნება გამონაკლისი სიახლეების მხრივ. “ჯორჯია პალასის“ გამაჯანსაღებელი სპა ცენტრი სტუმრებს სთავაზობს განახლებულ აიურვედას, ინდურ პანჩაკარმა სერვისს. წელს შესაძლებელია თითოეული პროცედურა უკვე ექიმის ჩართულობით და რჩევით ჩაიტაროს სტუმარმა, მიიღონ კვალიფიციური კონსულტაცია და ეზიარონ უძველეს, 5000–წლოვან ინდურ მედიცინას. აქ იქნება აიურვედას 5 სპეციალისტი და ექიმი. სტუმრებს ვთავაზობთ არაერთ გასართობ სპორტულ აქტივობას, წელს ჩვენს ჩამონათვალს დაემატა ცხენით ჯირითი“, - აღნიშნა რუსუდან ცეცხლაძემ.
რაც ეხება ფასებს, რუსუდან ცეცხლაძე ამბობს, რომ სასტუმრო როგორც ქართული, ასევე უცხოელი ტურსიტებისთვის ფასების დასტაბილურებას ცდილობს, თუმცა ის მაინცცვალებადია და მუდმივად საჭიროებს კორექტირებას.
„როგორც ყოველთვის, ვცდილობთ ფასების სტაბილურობა შევინარჩუნოთ როგორც ადგილობრივი, ისე უცხოელი ტურისტებისთვის. ფასები ცვალებადია და მუდმივად გადის კორექტირებას. ინდივიდუალურად ვუდგებით ჩვენს ლოიალურ მომხმარებლებს და კომფორტული გადახდის მექანიზმს ვთავაზობთ. ფასები დამოკიდებულია თვეზე, კვების ტიპზე, ოთახის ტიპზე და ა.შ.“, - აღნიშნა სასტუმროს საზოგადოებასთან ურთიერთობის მენეჯერმა.
სასტუმრო „ჯორჯია პალასი“ 157 ნომერს მოიცავს ზღვისა და ბაღის ხედებით.
თაკო კვაჭანტირაძე
ქობულეთი
