ერეკლე მეორის მოედანზე, სადაც ძველ თბილისს მორგებული 15-ამდე სხვადასხვა ბარი თუ რესტორანი მუშაობდა, დღეს სამამდე ბარია დარჩენილი. ერთერთია ნატურალური ღვინის ბარი „ჯი.ვინო“, რომელიც 2015 წელს შეიქმნა. როგორც ბარის მფლობელი გიორგი აივაზიანი „კომერსანტთან“ ამბობს, დღეს ქუჩა სრულად დაცარიელდა და „ჯი.ვინოს“ ღვინის ბარიც დღეში თითო მომხმარებელს მასპინძლობს.
„ჯი.ვინო მდებარეობს ერეკლე მეორის ქუჩაზე და უნდა გავუსვა ხაზი, რომ აქ სრული კატასტროფაა მომხმარებლებისა და ბიზნესის მიმართულებით. ჩვენი ნატურალური ღვინის ბარი გახსნიდან ძალიან კარგად მუშაობდა, ყოველგვარი მცდელობის გარეშე, ლოკაციისა და ღვინის გამო, ბარი სულ სავსე იყო. დღეს ამ ქუჩაზე ერთი სულიერიც არ დადის. ერეკლე მეორის ქუჩაზე 15-მდე რესტორანი და კაფე-ბარი იყო, დღეს სამი დარჩა. ლოქდაუნის მერე ყველამ გახსნა თავისი ობიექტი, მაგრამ ზოგმა ერთ კვირაში, ზოგმა 2 კვირაში დახურა. ჩვენ ვმუშაობთ იმიტომ, რომ მაინც ერთგული კლიენტები გვყავს, ვისაც უყვარს ჩვენი ღვინო. ასეთ სიტუაციაში, კომერციულად არანაირად საინტერესო არ არის ამ ბარის მართვა და ზარალზე ვმუშაობთ.
მეიჯარემ მცირე შეღავათი გაგვიკეთა - მოვახერხეთ, რომ გაყიდვებიდან პროცენტის მიცემაზე მოვლაპარაკებოდით და გარკვეულწილად პარტნიორული გარიგება გამოვიდა. ეს ძალიან გვეხმარება, რადგან ფიქსირებუბული რომ იყოს იჯარის გადასახადი, ვერ გავწვდებოდით. წარმოიდგინეთ დღეში ერთი მაგიდა თუ დაკავდება თითო ერთგული კლიენტის მიერ.“ - ამბობს გიორგი აივაზიანი.
მარიამ მორგოშია