„აწარმოე საქართველოში“ თანადაფინანსების მექანიზმი შეიცვლება და სახელმწიფოს მონაწილეობა პროცენტის დაფინანსებაში გაიზრდება“, – ამის შესახებ პრემიერ-მინისტრმა გიორგი გახარიამ უწყებათაშორის საკოორდინაციო საბჭოსთან არსებული ანტიკრიზისული ეკონომიკური ჯგუფის სხდომაზე განაცხადა, სადაც საქართველოს პრემიერმა ეკონომიკური გეგმა წარადგინა.
ამასთან, პრემიერმა აღნიშნა, რომ ბიზნესის მხარდაჭერისთვის დამატებით გამოიყოფა 500 მლნ ლარი, საიდანაც საკრედიტო საგარანტიო სქემის მიმართულებით – 300 მლნ დაიხარჯება და ძირითადი ჯგუფები იქნება მცირე და საშუალო ბიზნესი. გარდა ამისა, ახალი სესხის 90%-ზე გარანტიას სახელმწიფო მისცემს. იმ კომპანიებს კი, რომლებსაც ძველი სესხები აქვთ, რესტრუქტურიზაციის სახით სახელმწიფო 30%-ის გარანტირების ნაწილში შეეხიდება.
გიორგი გახარიას განმარტებით, ცვლილებები შევა სახელმწიფო პროგრამა "აწარმოე საქართველოში" თანადაფინანსების პირობებში: სესხსის/ლიზინგის პირობები 24-დან 36 თვემდე გაიზრდება; შეიცვლება საპროცენტო განაკვეთის თანადაფინანსების მექანიზმი და პროცენტის დაფინანსებაში სახელმწიფოს მონაწილეობა გაიზრდება; გაიზრდება საქმიანობის სახეობებიც; სესხის/ლიზინგის მინიმალური ზღვარი დაიწევს; გაიზრდება საბრუნავი საშუალებების დაფინანსებაც.
შესაფუთი მასალების მწარმოებელი კომპანია „გრინპაკის დამფუძნებელი პაატა აბრამია, რომელიც პროგრამის „აწარმოე საქართველოში“ ფარგლებში დაფინანსდა, „კომერსანტთან“ საუბრისას აცხადებს, რომ მთავრობის გეგმა კარგია, თუმცა ბევრი დეტალი დაზუსტებას საჭიროებს.
„აქ მთავარი არის ეკონომიკის სამინისტრო როგორ გააკეთებს ამ ყველაფრის ფორმულირებას, ყოველ შემთხვევაში ჩვენ მონაწილე ვართ „აწარმოე საქართველოს“ პროგრამის და რამდენად შეგვეხება ზუსტად არ ვიცით, თუნდაც თანადაფინანსების მექანიზმი. თუმცა, კარგია, რომ სესხის პირობები 24-დან 36 თვემდე გაიზარდა, ეს თავიდანვე რომ ყოფილიყო უკეთესი იქნებოდა, რადგან არ შეიძლება ერთნაირ პირობებში ჩააყენო არსებული ბიზნესი და სტარტაპი, ეს ყოვლად მიუღებელია, თუმცა ახლაც რომ შეიცვალა კარგია. თანადაფინანსებას რაც შეეხება ადრეც იყო საუბარი ამაზე და რამდენჯერმე მქონდა მცდელობა, მაგრამ ვერ ვისარგებლე, საჭირო იყო ბევრი დეტალის დაკმაყოფილება. ჯერ ამაზე საუბარი რთულია, რადგან კონკრეტული დეტალები არ ვიცით, თან 300 მლნ-იან ფინანსურ რესურსზეა საუბარი, მაგრამ რამდენად საკმარისი იქნება ეს და ბანკები როგორ იმოქმედებენ - ეს არის საინტერესო. ადრე სახელმწიფოს ერთხელ ჰქონდა გაცხადებული, რომ ბანკებს 9%-ზე მაღალი სესხი ჩვენთვის არ უნდა მოეცათ, მაგრამ 12-13%-ში აკეთებდნენ სესხებს და 2-3%-ს სხვადასხვა მომსახურებებში ატარებდნენ, საინტერესოა ახლა როგორ იქნება. თუმცა, საერთო ჯამში უკეთესი პირობები იქნება, იმასთან შედარებით რაც ადრე იყო. დღეს ყველას სჭირდება რისკების დაზღვევა და თუ სახელმწიფო იქნება ბიზნესის გარანტორი ეს საუკეთესო ვარიანტია“, - განაცხადა პაატა აბრამიამ.
„ჯეოკეპის” დამფუძნებელი და დირექტორი ენრიკო მოსულიშვილი, რომელიც ასევე „აწარმოე საქართველოში“ პროგრამის მონაწილეა, ამბობს, რომ პრემიერ-მინისტრის მიერ წარმოდგენილი გეგმა, სტარტაპებისთვის ხელშემწყობი ფაქტორი იქნება.
„ველოდებით, რომ პრემიერ-მინისტრის ამ ინიციატივის საფუძველზე, ბიზნესს კარგი წინსვლა ექნება. განსაკუთრებით კარგია, რომ სესხის ვადა გაიზარდა და ვფიქრობ ბევრი ისარგებლებს. მეტის საშუალება ალბათ მთავრობას არც ჰქონდა, რა თქმა უნდა კარგი იქნებოდა უფრო მეტი შეღავათები დაეწესებინა სტარტაპერებისთვის, მაგრამ იმას უნდა დავჯერდეთ რაც არის. ჩვენს კომპანიასაც აქვს ახალი გეგმები, თუმცა ამ ეტაპზე შევჩერდით, მაგრამ თუ იქნება შესაძლებლობა გამოვიყენებთ ამ ახალ ინიციატივას და ბიზნესს გავაფართოვებთ“, - ამბობს ენრიკო მოსულიშვილი.
ნინო თამაზაშვილი