„ისეთი შთაბეჭდილება
მრჩება, რომ თითქოს როგორც ინდიელები
ჰყავდათ რეზერვაციაში, ასე ვართ მოქცეული, ოღონდ იქ ყველანაირად სოციალურად
უზრუნველყოფილები იყვნენ.
დღეს ფაქტობრივად გაგვწირეს შიმშილისთვის, დღევანდელი გადაწყვეტილება მთის კურორტების არ გახსნის შესახებ, ჩემთვის შიმშილით გაწირვას უტოლდება.,“ - ამის შესახებ „კომერსანტთან“ მესტიის სასტუმრო „ელიტ ჰაუსის“ მეპატრონემ ისაუბრა.
სათხილამურო კურორტებზე შეზღუდვები ძალაში რჩება. ამის შესახებ ვიცე-პრემიერმა მაია ცქიტიშვილმა უწყებათაშორისი საკოორდინაციო საბჭოს სხდომის დასრულების შემდეგ განაცხადა. ბაკურიანის სასტუმროს მეპატრონე განმარტავს, რომ ზაფხულის ქაოსის შემდეგ მთავრობის ამგვარი გადაწყვეტილებები, მაშინ როცა სხვა რეგიონის სასტუმროები მუშაობენ, უსამართლოა.
„თავს ვგრძნობთ ძალიან დაჩაგრულად, კახეთს აქვს მუშაობის უფლება, შეკვეთილი სავსეა. საქართველოს ყველა რეგიონი მუშაობს, გარდა ოთხი ადგილისა, ესენია, მესტია, ბაკურიანი, გუდაური და გოდერძი.
ბაკურიანმაც ასე თუ ისე იმუშავა, რადგან იქ ბინები იყო და დიდად ვერ გააკონტროლეს ბინების გაქირავება. ზაფხულში საერთოდ ქაოსი მოგვიწყვეს, მუშაობის უფლება მოგვცეს 22 ივლისს, გავაკეთთ ინვესტიციები , ვიყიდეთ პლაკატები, მოვამზადეთ სასტუმრო, აღვჭურვეთ რეგულაციების შესაბამისად - 9 აგვისტოს კი მთელი მესტია 40 შემთხვევის გამო დაკეტეს.
ზაფხულში ვიმუშავეთ ზუსტად 15 დღე, აგვისტოში, როდესაც ყველაზე მაგარი მუშაობა უნდა გვქონოდა , ჩაკეტილები ვიყავით. იმის მერე მე მესტიაში სტუმარი არ მინახავს, შემთხვევით თუ მოხვდა ვიღაც გზაბნეული.
საბაგიროს ჩართვა არ ჩართვაზე აღარ ვსაუბრობ, უბრალოდ მუშაობის უფლებას ვითხოვთ - ამბობს ლევან დადვანი, სასტურმო "ელიტ ჰაუსის" მეპატრონე.
სასტუმროები „მარკო პოლო“ და „ალპინა“-ს ადმინისტრაციაში განმარტავენ, რომ დღევანდელი გადაწყვეტილებით, მთის კურორტების სასტუმროებს უკანასკნელი იმედის ნაპერწკალიც გაუქრათ.
„სიმართლე გითხრათ, მოლოდინი იმისა, რომ შეზღუდვები გაგრძელდებოდა გვქონდა , იმიტომ რომ ბოლო პერიოდში რამდენჯერაც მივმართეთ მთავრობას, წერილები დავაგზავნეთ, რეაგირება არ იყო, მაგრამ იმედის რაღაც ნაპერწკალს მაინც ვიტოვებდით.
ძალიან რთულია ჩვენთვის, ფაქტობრივად ერთი წელი გადის, რაც არ ვმუშაობთ და დახურულები ვართ. ჩვენ ორი სასტუმრო გვაქვს , ერთი „ალპინა“ და მეორე „მარკო პოლო“, ორივე გუდაურშია. „ალპინამ“ შარშან კოვიდ სასტმროდ იმუშავა, მარტიდან 15 მაისამდე, მხოლოდ პირველ ეტაპზე, ჩვენ მერე აღარ გვიმუშავია. რა შეგიძლია გააკეთო, პირდაპირ სამთო სათხილამურო კურორტებზეა მითითება, რომ არ უნდა ვიმუშავოთ.
მე ძალიან მიხარია, რომ დანარჩენი რეგიონების სასტუმროები მუშაობენ, მაგრამ რატომ არ შეიძლება მუშაობდეს სასტუმრო?
ჩვენ აბსოლუტურად ყველანაირი პირობა გვაქვს შექმნილი იმისათვის, რომ რეგულაციები დავიცვათ , გადავამზადეთ თანამშრომლები ვიყიდეთ ყველაფერი, რაც რეგულაციებით იყო გათვალისწინებული, მაგრამ გახსნის საშუალება არ მოგვეცა.
გასაგებია, რომ არ მუშაობს საბაგირო, მაგრამ საბაგირო არის დამატებითი პლუსი, მაგრამ იმ ადამიანებს ვისაც სრიალი საერთოდ არ უნდათ და ჰაერზე ასვლა და გუდაურში დასვენება სურთ, რატომ არ გვაძლევენ იმის საშუალებას, რომ სტუმარი მივიღოთ, „- განმარტავს სასტუმრო მარკო პოლოს და სასტუმრო ალპინას გაყიდვებოს ამსახურის უფროსი, სალომე კვარაცხელია.
„ძალაში რჩება სათხილამურო კურორტებზე დაწესებული შეზღუდვები და ამ ეტაპზე ასევე შეზღუდული იქნება საქალაქთაშორისო ტრანსპორტის მუშაობა. ყველას ბუნებრივია, ისევ მოეთხოვება სავალდებულო პირბადის ტარება. ყველა სავაჭრო ობიექტს ასევე მოეთხოვება მომხმარებელთა ნაკადების რიგების მართვა, დისტანციის დაცვა და იმ მეთოდით მუშაობა, რაც უკვე დანერგილია და აპრობირებული იყო მუშაობის ბოლო პერიოდის გათვალისწინებით“,- ამის შესახებ დღეს მაია ცქიტიშვილმა საკოორდინაციო საბჭოს სხდომაზე განაცხადა.