2021 წელს აშშ-ს შეუძლია ჩინეთისთვის ენერგორესურსების მთავარი მიმწოდებელი გახდეს, და ჩაანაცვლოს რუსეთი, საუდის არაბეთი, ანგოლა, და ავსტრალია . ასეთი დასკვნამდე გერმანიის ეკონომიკის ინსტიტუტი ამერიკულ-ჩინური სავაჭრო შეთანხმების შესწავლის შედეგად მივიდა.
როგორც ცნობილია, დოკუმენტს ხელი 15 იანვარს ხანგძლივი სავაჭრო ომის შემდეგ მოეწერა.
კერძოდ, ჩინეთი იღებს თავის თავზე ვალდებულებას 2 წლის მანძილზე 200 მლრდ. დოლარით გაზარდოს იმპორტი ამერიკიდან მხოლოდ ენერგომატარებლების კუთხით, ამერიკული ექსპორტი ჩინეთში 2 წლის მანძილზე 52,4 მლრდ. დოლარით გაიზრდება.
თუ გავითვალისწინებთ, რომ ათვლის წერტილად აღებულია 2017 წელი, როდესაც ჩინეთმა შეისყიდა შტატებისგან 6,8 მლრდ. დოლარის ენერგომატარებლები, სავარაუდოდ, 2021 წელს ეს მაჩვენებელი 40,7 მლრდ. დოლარამდე გაიზრდება.
შედეგად, ამერიკის წილი ჩინეთის ენერგოიმპორტში გაიზრდება დღევანდელი 3,2-დან 19%-მდე. შესაბამისად, შტატები ჩინეთის ენერგოიმპორტის სტრუქტურაში მე-11 ადგილიდან პირველზე გადაინაცვლებს.
ინსტიტუტის ექსპერტის სონია ბერის მონაცემებით, 2017 წელს ჩინეთში ენერგომატარებლების უმსხვილესი მიმწოდებელი იყო რუსეთი (იმპორტის 12.6%), მეორე ადგილზე იყო საუდის არაბეთი (10,1%), მესამეზე - ანგოლა (9,6%).
თუმცა, ექსპერტის აზრით, 19% - ეს არის მხოლოდ პირობითი ციფრი და ის არის მხოლოდ ორიენტირი, რეალურად იქნება მეტი, რადგანაც ჩინეთის ენერგომოხმარება ყოველწლიურად იზრდება, შესაბამისად, იმპორტიც.
შეთანხმება გულისხმობს, რომ ჩინეთი იყიდის შტატებში თხევად გაზს, ნავთობპროდუქტებს და ნახშირს, თუმცა, არაა დაზუსტებული, რომელი ენერგომატარებელი იქნება პრიორიტეტული, ამიტომაც, ზუსტი გათვლების გაკეთება შეუძლებელია.
თუმცა, ეჭვგარეშეა, რომ შეთანხმების შესრულების შემთხვევაში, ამერიკა საგრძნობლად გაზრდის თავის წილს ჩინეთის ენერგომომარაგებაში.
„ჯერ ბოლომდე არაა გარკვეული, როგორ განხორციელდება მიღწეული შეთანხმებები. დღეს ჩინეთში მოქმედებს 25%-იანი საბაჟო ტარიფები ამერიკულ თხევად გაზზე. თუ ტარიფები არ დაიწია, სავარაუდოდ ჩინეთი იყიდის შტატებში ძირითადად ნავთობპროდუქტებს. ძნელი სათქმელია, როგორ შეიცვლება ამ შემთხვევაში სავაჭრო ნაკადები, თუმცა, სავარაუდოდ, რუსეთი და საუდის არაბეთი დაზარალდებიან“ - აღნიშნა სონია ბერმა.
მეორე სცენარის თანახმად, ჩინეთი შეამცირებს ტარიფებს ამერიკულ გაზზე და შეისყიდის სწორედ მას, რაც რუსეთის გარდა უარყოფითად აისახება ავსტრალიაზე, ყატარზე და რუსული გაზის მიწოდების ზრდის პერსპექტივაზე.
„არც ისაა გამორიცხული, რომ ჩინეთის ენერგოიმპორტი იმდენად გაიზრდება, რომ აშშ-დან გაზის და ნავთობის იმპორტის ზრდის მიუხედავად, სხვა ქვეყნები მოახერხებენ საკუთარი წილების შენარჩუნებას. თუმცა, ჩინეთის ეკონომიკის ზრდის შენელების ფონზე, ეს სცენარი ნაკლებად რეალისტურია“ - მიიჩნევს სონია ბერი.
წყარო: Deutche welle
თენგიზ აბლოთია