მთელს მსოფლიოში, მათ შორის ევროპაში, კორონავირუსთან ბრძოლაში შემოღებული შეზღუდვების შერბილების პროცესი მიმდინარეობს, თუმცა ამის მიუხედავად, დაინფიცირებულთა რაოდენობა მცირდება. ახალი რეალობის ერთ-ერთი კარგი მაგალითია გერმანია.რესტორნები, სავაჭრო ქუჩები და პარკები სავსეა ადამიანებით, ვირუსის შეკავების მკაცრი ზომები წარსულს ჩაბარდა, თუმცა, ყოველდღე ახალი დაინფიცირების შემთხვევები სულ უფრო და უფრო მცირე რაოდენობით ფიქსირდება.
შეზღუდვების მოხსნამდე ბევრი ექსპერტი შესაძლო გართულებებზე საუბრობდა, თუმცა, ნეგატიური პროგნოზები არ მართლდება. ბოლო პერიოდში რობერტ კოხის ინსტიტუტში ყოველდღიურად დაინფიცირების 200-300 შემთხვევა რეგისტრირდება მაშინ, როდესაც აპრილში ეს მაჩვენებელი ზოგჯერ 6000-ს აღწევდა.
ასეთი დადებითი დინამიკა ბევრ ფაქტორთანაა დაკავშირებული. ერთ-ერთი შეუიარაღებელი თვალითაც ჩანს - სუპერმარკეტებში, მაღაზიებში, თუ საზოგადოებრივ ტრანსპორტში ყველა პირბადით დადის.
ავტორიტეტულმა მეცნიერულმა ჟურნალნა Science-მა კალიფორნიის უნივერსიტეტის კვლევა გამოაქვეყნა, რომლის თანახმად, პანდემიის შეკავებაში ყველაზე წარმატებულები სწორედ ის ქვეყნები არიან, რომელთა მოსახლეობის დიდი ნაწილი პირბადეებს ატარებს.მკვლევართა აზრით, პირბადის სწორი ტარება უსიმპტომოდ დაავადებულების მიერ ვირუსის ძლიერ გავრცელებას აფერხებს.
ეპიდემიოლოგის და პოლიტიკოსის კარლ ლაუტერბახის აზრით, მცდარი აღმოჩნდა რობერტ კოხის ინსტიტუტის პოზიცია, რომელიც პანდემიის პირველ პერიოდში პირბადეების ტარებას უსარგებლოდ მიიჩნევდა.
„კვლევამ დაადასტურა, რომ ხველების და დაცემინების დროს ვირუსის შემცველი წვეთები გაცილებით უფრო შორს გადაადგილდებიან, ვიდრე ეს თავიდან ითვლებოდა. ჯანდაცვის მსოფლიო ორგანიზაციის ინფორმაცია 2-მეტრიან გავრცელებაზე 1930-ანი წლების კვლევებს ეყრდნობა, დღეს კი უკვე ცნობილია, რომ ნაწილაკები არა 2, არამედ 6 მეტრზეც ვრცელდება. ამიტომაც ძალიან მნიშვნელოვანია პირბადეების ტარება“ - მიიჩნევს ის.
მეცნიერებაში ასევე სულ უფრო მეტად ხდება იმ ფაქტის აღიარება, რომ ინფექციის გავრცელებაში სითხის მიკრონაწილაკები, რომლებიც გამოიყოფა მათ შორის საუბრის დროს, ძალიან დიდ როლს თამაშობენ. თანაც, შენობაში დავირუსების ალბათობა თითქმის 20-ჯერ მაღალია, ვიდრე სუფთა ჰაერზე.
„იმის გამო რომ თბილ სეზონზე ადამიანების სუფთა ჰაერზე გაცილებით მეტ დროს ატარებენ, ინფექციაც ნაკლებად ვრცელდება. პრობლემები შესაძლოა შემოდგომაზე დაიწყოს. არაა გამორიცხული, რომ აცივებასთან ერთად, ინფიცირების მასშტაბიც გაიზარდოს“ - მიიჩნევს ლაუტერბახი.
დადებით გავლენა დაინფიცირების შემცირებას ასევე მოსახლეობის მიერ კორონავირუსის პრობლემის სერიოზულმა აღქმამაც მოახდინა. ადამიანები თავად, მთავრობის გადაწყვეტილებებისგან დამოუკიდებლად, უსაფრთხოების ზომებს იღებდნენ და სოციალურ დისტანციას იცავდნენ.
გემგოლცის ინსტიტუტის ვირუსოლოგის მელანი ბრინკმანის თქმით, დღესაც კი, როდესაც შეზღუდვები თითქმის მოხსნილია, ადამიანები მაინც ცდილობენ მაღაზიებში ნაკლების დრო გაატარონ და რესტორნებში დისტანცია დაიცვან.„ეს დაინფიცირების შემთხვევების შემცირებას ხელს პირდაპირ უწყობს“ - ამბობს ის.
მეცნიერები პანდემიის უკან დახევაში სახელმწიფოს მიერ შემოღებული შეზღუდვების როლსაც ერთხმად აღიარებენ.„რომ არა ადრეული ინფორმირება, დიაგნოსტირება, ტესტირება და კარანტინის შემოღება, დღეს გერმანიაში 50 – 100 ათასით მეტი დაღუპული იქნებოდა“ - მიიჩნევს ბრინკმანი.
ასევე მნიშვნელოვანია იმის გაცნობიერება, რომ ვირუსის გავრცელება დაავადებულთა მცირე რაოდენობიდან, ე.წ. „სუპერ-გამავრცელებებიდან“ იწყება.
ავსტრიული სამთო-სათხილამურო კურორტის იშგლის პრეცედენტი ადასტურებს, რომ ინფიცირებულები „სუპერგამავრცელებლები“ ადამიანთა დიდ რაოდენობასთან კონტაქტის და ხალხმრავალი ადგილებში ყოფნის შემდეგ ხდებიან. ამიტომაც, შეზღუდვების მოხსნის მიუხედავად, მასობრივი ღონისძიებები დღესაც აკრძალულია.
„,მასშტაბური და ხალხმრავალი ღონისძიებების ჩატარება სავარაუდოდ დაინფიცირებულების დიდ რაოდენობას გამოიწვევდა, და ჩვენ ამას სხვა ქვეყნების მაგალითზე ვხედავთ“ - მიიჩნევს ფრანკფურტის უნივერსიტეტის ვირუსოლოგი სანდრა ციზეკი.
ექსპერტების აზრით, დამაიმედებელი სტატისტიკა ყურადღების მოდუნების მიზეზი არ უნდა გახდეს.ციზეკის აზრით, მოვლენათა შემდგომი განვითარება ადამიანების მიერ პირბადეების ტარების წესის დაცვაზეა დამოკიდებული.„იქნება თუ არა პანდემიის ახალი ტალღა, და რამდენად ძლიერი იქნება ის, დამოკიდებულია ადამიანების ქცევაზე“ - ამბობენ ექსპერტები.
წყარო: Der Spiegel
მოამზადა თენგიზ აბლოთიამ