შეტევა ამერიკულ მაღალტექნოლოგიურ კომპანია SolarWinds-ზე გერმანიასაც შეეხო, ეს საკითხი ქვეყნის პრემიერ-მინისტრის კანცელარიაშიც განიხილებოდა.
ეს შეტევა ბოლო წლებში შპიონაჟის და კიბერშეტევების ერთ-ერთ ყველაზე შთამბეჭდავ მაგალითად ითვლება. ჰაკერებმა სამიზმედ კომპანია SolarWinds აირჩიეს, რომელიც პროგრამულ უზრუნველყოფას მრავალ დარგში ამუშავებს და აწარმოებს. მის კლიენტებს შორის მთელს მსოფლიოში საჯარო უწყებები და კერძო კორპორაციებია.
ბოროტმოქმედებმა პროგრამულ უზრუნველყოფაში მავნე განახლება ჩატვირთეს, რის გამოც SolarWinds-ის კლიენტების საიტებზე უცხო თვალისთვის შეუმჩნეველი ხვრელები წარმოიქმნა.
შესაბამისად, ჰაკერებს თვეების მანძილზე სხვადასხვა ობიექტების დახურულ, შიდა ინფორმაციასთან სრულიად თავისუფალი წვდომა ჰქონდათ და ეს მოცემულობა არა რამდენიმე საათი ან თუნდაც დღე, არამედ რამდენიმე თვე გრძელდებოდა.
ამ ოპერაციის სირთულე ნათლად მეტყველებს სახელმწიფოს ჩარევაზე. შეტევის ობიექტებს შორის აშშ-ს სახელმწიფო დეპარტამენტი, თითქმის ყველა მხსვილი საჯარო სტრუქტურა, რამდენიმე მსხვილი კორპორაცია, მაგალითად, Microsoft აღმოჩნდა.
გერმანიაში ჰაკერებმა სხვა ობიექტებთან ერთად პოლიციის ფედერალურ სამსახურში და რობერტ კოხის კვლევითი ინსტიტუტის შიდა ქსელში შეაღწიეს. თუმცა, დეკემბრის შემდეგ, როდესაც შეტევა აღმოჩენილ იქნა, დაზარალებული ობიექტების ჩამონათვალმა 300-ს გადააჭარბა.
იყო თუ არა მათი ინფორმაცია ჰაკერებისთვის ხელმისაწვდომი - ამ ეტაპზე უცნობია. თავისთავად ხვრელის არსებობა არ ნიშნავს, რომ მონაცემები მაინც და მაინც მოიპარეს. თანაც ცნობილია, რომ შეტევა 2 ეტაპიდან შედგებოდა და დღეისთვის გერმანიაში 300 დაზარალებული ობიექტიდან მხოლოდ 13-მა განაცხადა, რომ მეორე ეტაპის მსხვერპლი გახდა.
მთავრობა ასევე არ ასახელებს იმ 300 დაზარალებული ობიექტის ვინაობას, ცნობილია მხოლოდ უკვე ხსენებული პოლიციის სამმართველო და კოხის ინსტიტუტი, დანარჩენებზე არავითარი ინფორმაცია არ ვრცელდება.
ვინ დგას SolarWinds-ზე შეტევის უკან - ჯერ უცნობია, თუმცა, კიბერუსაფრთხოების დარგში სპეციალისტებმა რუსეთში მიმავალი კვალი აღმოაჩინეს. ჰაკერების ხელწერა ძალიან ჰგავს ჰაკერული ჯგუფის Turla-ს, რომელიც რუსეთის სპეცსამსახურების ბრძანებებს ასრულებს.
აშშ-ს ეროვნული უსაფრთხოების სააგენტოს და გამოძიებათა ფედერალური ბიუროს ინფორმაციით, შეტევის მიზანი ქსელების შიგნით შპიონაჟი და ინფორმაციის შეგროვება იყო.
გამომდინარე იქედან, რომ შეტევა პირდაპირ გერმანიასაც შეეხო, ეს საკითხი ბერლინშიც, კანცლერის ადმინისტრაციაში განიხილებოდა.
აშშ-ს პრეზიდენტის ადმინისტრაცია ამ შეტევის გამო რუსეთის წინაამღდეგ სანქციების დაწესების საკითხს განიხილავს, თუმცა, გერმანიის მთავრობა ჯერ თავის პოზიციას ამ საკითხზე საჯაროდ არ გამოხატავს.
Spiegel.de
მოამზადა თენგიზ აბლოთიამ