დეპოზიტების მოცულობა 1 წელიწადში 13.8%-ით გაიზარდა და 2021 წლის 1-ლი სექტემბრის მდგომარეობით 36.3 მლრდ ლარს მიაღწია. ლარიზაციის მაჩვენებელი კი კვლავ 40%-ზე დაბალია. ფიზიკური პირების შემთხვევაში კი მხოლოდ 15%-ს შეადგენს. ინფორმაციას ეროვნული ბანკი ავრცელებს.
თუ მიმდინარე ანგარიშებში ლარიზაციის წილი 55%-ს აღწევს, ხოლო 1 თვემდე ვადის ანაბრებში 94%-ს, 1 წლიან დეპოზიტებში მისი წილი 35%-მდე მცირდება.
დეპოზიტებზე საშულო შეწონილი საბაზრო საპროცენტო განაკვეთი 1 წელიწადში 0.1 პროცენტული პუნქტით 6.4%-მდე შემცირდა, თუმცა იმავე პერიოდში ლარში განთავსებულ დეპოზიტებზე საპროცენტო სარგებელი 2.1%-ით 10.4%-მდე გაიზარდა, უცხოურ ვალუტაში განთავსებულ დეპოზიტებზე კი პირიქით 2.8-დან 0.9 პროცენტამდე შემცირდა.
ლარიზაციის მაჩვენებელი ფიზიკურ პირებში გაცილებით დაბალია და ის 15%-ს შეადგენს, რისგ გამოც ფიზიკური და იურიდიული პირების ანაბრებს განსხვავებული საპროცენტო სარგებელი ერიცხებათ. იურიდიული პირებისთვის ლარსი განთავსებულ ვადიან ანაბარზე სარგებელი 10%-ს შეადგენს, ფიზიკური პირებისთვის - 11.3%-ს, ამის საპირისპიროდ, უცხოურ ვალუტაში განთავსებულ ანაბრებზე იურიდიულ პირებს 1.6% ერიცხებათ და ფიზიკურ პირებს მხოლოდ 0.8%. დიდ ბანკებში ეს მაჩვენებელი კიდევ უფრო დაბალია და ევროში საერთოდ ნულდება.
ფიზიკური პირების უმრავლესობისთვის 13.4-ჯერ უფრო მაღალი საპროცენტო განაკვეთი ლარის მოსალოდნელი უფრო მკვეთრი გაუფასურების შიშით არჩევანის გაკეთებისას გადამწყვეტი ფაქტორი არ აღმოჩნდა. მათ მაღალ რისკსა და შესაძლო მეტ მოგებას, მეტი სტაბილურობა ამჯობინეს.