2022 წლის ოქტომბერში, საბანკო სექტორის სადეპოზიტო ვალდებულებები წლიურად 5.99 მლრდ ლარით (თვიურად 246.7 მლნ ლარით) გაიზარდა და 42.4 მლრდ ლარი შეადგინა. ინფორმაციას ეროვნული ბანკი ავრცელებს.
„სადეპოზიტო ვალდებულებები წლიურად 16.48%-ით გაიზარდა, მეტწილად უცხოური ვალუტის დეპოზიტების მატების გავლენით. კერძოდ, ოქტომბერში წინა თვესთან შედარებით, უცხოური ვალუტის სადეპოზიტო ვალდებულებები 261.4 მლნ ლარით (1.1%-ით) გაიზარდა და 24.3 მლრდ ლარი შეადგინა. აღნიშნული ზრდა, მეტწილად ფიზიკური პირების დეპოზიტების მატებამ გამოიწვია. რაც შეეხება ეროვნული ვალუტის დეპოზიტებს, წინა თვესთან შედარებით, 14.7 მლნ ლარით შემცირდა, რაც ძირითადად სამთავრობო სექტორის დეპოზიტების კლებას უკავშირდება. ოქტომბერში, სამთავრობო სექტორის დეპოზიტების 211.8 მლნ ლარით შემცირდა“, — აცხადებენ სებ-ში.
მიმდინარე წლის ოქტომბერში დეპოზიტების საშუალო შეწონილი საპროცენტო განაკვეთები (მთავრობის გარეშე) წინა თვესთან შედარებით 0.1 პპ-ით შემცირდა და 5.69% შეადგინა. ეროვნული ვალუტით დეპოზიტებზე საშუალო შეწონილი წლიური საპროცენტო განაკვეთი 0.2 პპ შემცირდა და 8.1% შეადგინა, ხოლო უცხოური ვალუტით გაცემულ დეპოზიტებზე - 0.02 პპ-ით, 0.8%-მდე გაიზარდა.
„რეზიდენტების ვადიანი დეპოზიტების საპროცენტო განაკვეთები შემცირდა, რაც მეტწილად ლარისა და დოლარის ვადიანი დეპოზიტების საპროცენტო განაკვეთის კლებამ განაპირობა. კერძოდ, ლარისა დეპოზიტების საპროცენტო განაკვეთმა წინა თვესთან შედარებით 0.3 პპ-ით შემცირდა და 11.9% შეადგინა, ხოლო დოლარის ვადიანი დეპოზიტის საპროცენტო განაკვეთი 0.05 პპ-ით, 1.0%-მდე შემცირდა. ევროს დეპოზიტების საპროცენტო განაკვეთი წინა თვესთან შედარებით უცვლელია და 0.6%-ს შეადგენს.
უცხოური და ეროვნული ვალუტის დეპოზიტების ზრდის ტემპებიდან გამომდინარე, დეპოზიტების დოლარიზაცია, 2022 წლის ოქტომბერში წინა თვესთან შედარებით 0.8 პპ-ით გაიზარდა და 57.4% შეადგენს. ოქტომბრის ბოლოს, იურიდიული პირების დეპოზიტების დოლარიზაცია 0.6 პპ-ით გაიზარდა 45.1% შეადგინა, ფიზიკური პირების დეპოზიტების დოლარიზაცია 0.2 პპ-ით 72.2%-მდე გაიზარდა. აღსანიშნავია, რომ ოქტომბერში ფიზიკური პირების ვადიანი დეპოზიტების დოლარიზაციამაც მოიკლო და წინა თვესთან შედარებით 0.9 პპ-ით 68.2%-მდე შემცირდა“, — ნათქვამია სებ-ის ანგარიშში.