„დენდროლოგიური პარკი - ყველაზე დიდი სოციალური პროექტი ყინულმჭრელის ფუნქციით „ - ასე აფასებს ჟურნალ „ანტერპრენერის”-ის მთავარი რედაქტორი გიორგი შარაშიძე შეკვეთილში დენდროლოგიური პარკის გახსნას.

მისი თქმით, მსგავსი მასშტაბურ პროექტების გამო ჟურნალ „ანტერპრენერის“ რედაქციამ, ბიძინა ივანიშვილი და „ქართუს“ მიერ განხორციელებული პროექტები სოციალური ანტრეპრენერშიფის უნიკალური მაგალითად დაასახელა.

“ერთი წელიც არ არის გასული მას შემდეგ, რაც მქონდა საშუალება ინტერვიუ ჩამეწერა ბატონ ბიძინა ივანიშვილთან, როდესაც ის საუბრობდა მის მიერ დაგეგმილ მასშტაბურ პროექტებზე და ჩვენ, ჟურნალ „ანტერპრენერის“ რედაქციამ მაშინ მისი და მისი პროექტების ფენომენი შევაფასეთ, როგორც სოციალური ანტერპრენერშიფის უნიკალური მაგალითი საქართველოს რეალობაში. დღეს, როდესაც პირადად მე და უამრავი დამთვალიერებელი ვეცნობით ამ მართლაც უნიკალურ დენდროლოგიურ პარკს, ვრწმუნდები, რომ ეს შეფასება იყო ზუსტი, რადგან ამ ტიპის პროექტებს პირველ რიგში გააჩნია სოციალური დატვირთვა, ანუ, ერთგვარი ყინულმჭრელის ფუნქცია, რომელიც ემსახურება რეგიონის და მთლიანობაში ქვეყნის ტურისტული კონკურენტუნარიანობის ზრდას გლობალურად, გლობალურ ბაზარზე ტურისტული სეზონის გაზრდას“ - განაცხადა შარაშიძემ.

მისივე თქმით, ბიძინა ივანიშვილის მიერ აქამდე განხორციელებულმა პროექტებმა რეგიონს სრულიად ახალი სიცოცხლე შესძინა.

„მახსოვს, მაშინ ბატონი ბიძინა საუბრობდა, რომ არ უნდა ყოფილიყო 3-4 თვით შემოფარგლული და სეზონი 5-6 თვემდე უნდა გაზრდილიყო. მე ვიტყოდი, რომ დღეს შესაძლებელია ჩვენ მივიღოთ 4 სეზონიანი ტურისტული სეზონი. ვხედავთ სრულიად სახეშეცვლილ რეგიონს, სადაც არა მხოლოდ დენდროლოგიურმა პარკმა, რომელიც სიახლეა, არამედ აქამდე განხორციელებულმა ისეთმა დიდმა პროექტებმა, როგორიც არის „ბლექ-სი-არენას“ საკონცერტო დარბაზი, სასტუმრო „პარაგრაფი“ შეკვეთილში, სრულიად ახალი სიცოცხლე შესძინა რეგიონს, რომელიც ყოველთვის გამოირჩეოდა თავისი ბუნებრივი სილამაზით, მაგრამ არ გამოირჩეოდა ინფრასტრუქტურული განვითარებით. ვფიქრობ, დღეს დროა, უკვე მცირე და საშუალო მეწარმეებმა, ბიზნესმა ისარგებლოს იმ უნიკალური შესაძლებლობით, რაც დენდროლოგიური პარკის და აქ განხორციელებული სხვა პროექტების შედეგად მათთვის შესაძლებელი გახდება“ - განაცხადა გიორგი შარაშიძემ.